鍾鎮濤破產終極大翻身 倒賺過億

鍾鎮濤(B哥)的人生經歷就像坐過山車,黃金時期他是當紅歌手,與章小蕙豪婚並誕下一子(鍾嘉浚)一女(鍾嘉晴),其後因97金融風暴投資失利,負債逾2億港元,02年申請破產,絕處逢生的B哥捲土重來,4年後解除破產令又是一條好漢。
在低潮時,B哥幸得現任太太范姜素貞在身邊扶持,患難見真情,再添了兩個可愛的女兒(鍾懿與鍾幗),幸福家庭讓B哥增添無限動力,他努力不懈重整事業與財政,周圍飛走埠登台、拍戲又拍劇,由當初負債變成年賺過千萬,B哥揚言隨時可退休無憂,彈藥足以養全家。在家,B哥是兒女的廿四孝爸爸,在外,他是吸金力強的藝人,65歲的B哥永不言敗,值得敬佩。

撰文:東方新地|圖片:新傳媒圖片庫

鍾鎮濤:胡亂投資有風險

鍾鎮濤的人生故事,精彩得足以寫成自傳,當年與前妻章小蕙在市好時豪氣大手掃入多項豪宅,其後因金融風暴樓市急轉直下,一度坐擁數億元資產的B哥身家霎眼煙消雲散,更欠下2億元巨債申請破產,02年宣布破產。在財困時與章小蕙離婚,女友范姜素貞卻願意陪伴B哥度難關,4年的破產期不易過,B哥仍然保持樂觀心態,事過境遷感觸良多。

對於投資,B哥見過鬼怕黑,最大領會是絕對不要胡亂投資,他說:「理財方面,真係唔好亂投資,唔識嘅嘢真係唔好亂買。除非買樓啦!起碼有嚿實際嘅嘢喺度,我依家會投資番喺我自己熟嗰行,電影啦、音樂啦,合適嘅project都會投資少少,唔會擺晒成副身家、唔會百分百,係會參與少少。我鍾意唱歌、玩音樂同拍戲,依家會選擇性咁做,以前做仔,依家咪做人老竇囉,以前可以打,依家梗係打唔到啦!近年會去大陸拍電視劇,收入真係好好,佢哋好捨得畀錢,呢樣嘢係sure win。投資唔係一定有錢賺,一定有風險,但係投入自己時間拍電視劇最穩陣最有把握,賺硬,點解唔做呢?」

玩夠先退休

工作基地已轉移到內地的B哥,坦言自己就是最大的本錢,破產後大翻身,他全靠肯捱肯做,現時在國內開工作室、在港又投資千萬搞band房,保守估計一年接超過50場內地登台騷,再加上拍戲拍劇上綜藝節目,收入閒閒地過千萬。對於身家過億,B哥笑言多年來做騷賺唔少,投資的海外物業亦升值,不過仍要返去計計數先知。

破產令解除至今已12年,B哥倒賺過億身家,經濟上無憂,退休享福指日可待,他說:「依家我已經生活得好好,可以話隨時退休,都生活無憂,呢種生活可以維持到嘅。我有樓,不過唔喺香港,唱歌拍戲,一年唱幾十場,其實已經好唔錯,夠我退休。我個人生好豐盛,人到65歲,乜都經歷過,唔係起起落落,而係大起大落。好在呢一刻,我唔係埋怨緊、羨慕緊人哋,我個人心態幾好,唔需要大富大貴,可以養得起仔女、可以一年放幾次假,已經覺得自己喺好多人之上,已經唔錯啦!講番去以前,咪笑一笑囉!」

揸半億物業

B哥話多得破產經驗,學識唔熟嗰樣唔好亂投資。事實上比起溫拿其他成員飲食、娛樂涉足多瓣,B哥近年的確少出手投資,數年前與友人合資娛樂公司,亦被人借名騙財損失七位數字。據悉雖然目前居所是租住,B哥還是將大部分收入用作買磚頭,除咗自置工廈單位做band房,又喺海外及內地都有購入物業,各地不動產總值據悉亦過半億。

年賺七千萬

B哥自爆年中多數在內地搵食,所以一旦留港盡量不接工作全天候陪老婆同女。到底年中北上幾多次?由去年4月至今,粗略估計B哥一年至少北上商演50場,是全年收入最大來源。

讀者留言