鍾鎮濤自認呷醋岳父 支持阿女入行

鍾鎮濤(B哥)在家是兒女的廿四孝爸爸,面對逆境懂得自強的B哥,除了有太太范姜做後盾,還有四個子女做原動力,當年破產,B哥坦言被人睇低自己無所謂,最難忍受是子女在學校裡也被同學歧視。

撰文:東方新地|圖片:新傳媒圖片庫

鍾鎮濤 陪住子女成長

B哥向來是個與子女沒有代溝的好爸爸,為了捍衞家庭,B哥工作家庭兩兼顧。為了陪著子女成長,有時更會放棄賺錢,「我唔會為咗賺錢而放棄屋企人。盡量每年都可以同啲仔女去到五次旅行,帶細路去唔同地方見多啲唔同嘅嘢。所以每逢學校假期,我盡量唔會接嘢做。為咗仔女,事業有時都要有所犧牲,如果唔係我大可以去北京住,因為工作主要喺大陸,上去住可能更加幫到我事業。但係為咗陪佢哋我覺得值得。由入學開始,每次見家長、每甩一隻牙、每次睇醫生,我都跟得好足,都係一齊經歷,我冇錯過佢哋成長任何一樣嘢。有好多爸爸因為做嘢,會覺得做乜啲細路突然大咗咁多,佢哋miss咗好多嘢,但我唔會。」

買定樓做嫁妝

影相當日,B哥帶住二女鍾懿與細女鍾幗前來影樓,兩個囡囡與爸爸又錫,關係不言而喻,講到他日女兒要嫁人,B哥十個不情願,對於會否買定每人一層樓當嫁妝,B哥說:「最緊要養大佢哋,讀完書長大後生活基本嘅嘢已經準備晒,車、樓嗰啲基本需要冇問題,但我唔會買架法拉利畀佢哋。我絕對百分之百係呷醋岳父,最好就唔好嫁,陪我幾耐得幾耐啦!其實我要求好簡單,如果有人錫佢哋多過我錫佢哋,咁我就願意畀個女嫁喇!呢啲都係講笑,都係隨緣啦!」

父女檔上陣

四名子女當中,二女鍾懿的表演慾最強,亦遺傳了B哥的音樂天份,對於女兒想入行,B哥持開放態度,「鍾懿鍾意藝術,唱歌亦係最好嘅,佢想入行我一定幫,如果入演藝界會比一般人著數好多,成日都有人想斟佢,我唔係推,不過都係讀書為先,讀書先係對佢哋將來最有保障最有利。佢哋仲細,仲會變。」

「細女鍾幗呢三、四年都話想做科學家,唱歌都係玩吓,佢睇好多天文地理科學書,睇愛因斯坦呀,成日講嘅嘢我都聽唔明,佢最大機會做專業人士,四個仔女個個性格都唔同,你估仲係以前咩,要仔女繼承父業,佢哋鍾意做咩,我都會支持。做咩都好,希望佢哋唔好怕蝕底,呢樣嘢好重要,有時行多步理想達到。」

在B哥眼中,子女永遠是最優秀的,所以經常把他們掛在口邊,女兒的生日他一定會記得,如此痛錫子女,難怪仔女都爭住黐實呢個廿四孝爸爸啦!

自小跟住爸爸走埠與表演的鍾懿,見慣大場面,比起哥哥、姐姐及妹妹,她與B哥相處的時間最多,對於有個像超人無所不能的爸爸,鍾懿說:「好多人話好羨慕我有 個咁型嘅爸爸,話我爸爸唱歌叻、又可以同佢去咁多好靚嘅地方,仲有好多經驗,可以教我好多嘢。我覺得我爸爸最值得我學習嘅就係勇敢同正面。」有個好太太與四個乖仔女陪住走高山低谷,難怪B哥正能量爆燈。

讀者留言