阿v 360秒人生課堂 印度 棟篤笑 plt 360秒人生課堂

360秒人生課堂|棟篤笑阿V分享印度裔爆笑遭遇 家住半山無奈面對種族歧視

最新娛聞

廣告

《360秒人生課堂》有印度裔的阿V分享他的故事。在香港土生土長的阿V(Vivek Mahbubani)會講流利廣東話,以棟篤笑娛樂大家。笑聲背後,他不時承受文化差異的無奈對待。阿V勇於面對根深蒂固的種族偏見,以愛兼容不同膚色的和諧;嘉賓河國榮也分享了類似遭遇⋯⋯

呢位印度人叫做Vivek Ashok Mahbubani(音:we wet阿叔 媽保班lee,人稱V叔),強項係玩中文美式棟篤笑(即1場10分鐘棟篤笑show內,每分鐘需要出現6-7個笑位)。

《360秒人生課堂》印度裔阿V大談種族歧視

呢個喺香港土生土長嘅印度人今年快踏入40歲,讀拔萃但自細受歧視,最叻玩自殘(自我挖苦呀)……09年頭成功突圍,佢喺YouTube嘅搞笑騷點擊率有40萬人次,比林海峰《踎低噴飯》嘅11萬重勁!

早在現身《360秒人生課堂》之前,阿V在09年曾經每逢星期五、六,都喺Soho區開show,個個追睇, 連Citibank都搵佢拍廣告,港台又過搵佢主持《香港故事》。佢嘅自嘲、逆境自強、歡樂爛gag,話俾香港人知,逆境都要開心快樂!

中學讀拔萃男書院 阿V點睇香港人?

阿V星中學年代就讀拔萃男書院,佢已經感受到香港人鍾意人人鬥叻鬥大話,佢仔讀書時,已經被人勁玩,感受到香港人嘅蠱惑底!

「我喺中學年代已經勁被香港人玩,讀Form 3嗰年,有個死黨叫我同佢考試齊齊唔好溫書,點知一派卷,佢好高分,又話自己係好彩撞啱。實情係佢踩低我呢個差仔,當我傻咩!之後連friend都冇得做!」哈哈哈!搞笑V星覺得香港人勢利又聰明,最識保護自己!

遇花心女友!同港女拍拖睇清對方

阿V話香港女仔好現實,最鍾意騎牛搵馬,飛仔唔使本!

「我呢啲黑掹掹嘅差仔,冇得學人媾女!型鬼佬先有!喺04年曾經同個港女拍拖, 一直好好哋,有日食完飯俾晒錢,佢發SMS俾我,話:『This is not I’m looking for!』佢啲friends話佢最鍾意一腳搭兩船,最冧有錢仔!」阿V話稍為靚啲嘅港女,最buy靚仔同有錢仔,同港女天長地久?佢點都唔信!

笑港男扮型!有錢冇涵生活喺香港,阿V亦見盡有錢冇內涵嘅港男,身邊朋友個個住半山,大部分係有錢仔,但愛扮型,不過就超冇內涵!

「港男好好笑!唱K時有女仔喺度,會扮深情唱情歌,好似以前古巨基首〈愛與誠〉,人人爭唱『做隻貓做隻狗不做情人』,邊唱邊望住對方或眯起眼扮震音,其實咪又係echo effect,有錢仔好多唔係想像中咁有內涵。」唔識學港男交戲,亦令阿V長時間冇拖拍!

搭港鐵無人敢埋身

港人太緊張!要識放鬆皮膚黑掹掹,搭港鐵時,飽受香港人歧視!

「港鐵一排6個位,我坐喺最中間,身邊係唔會有港人敢坐埋嚟,驚我有咖喱味,當我係恐布分子,唉!由細到大都慣咗咁啦!」阿V重話,香港人最鍾意講大話掩飾自己!「有次我打電話俾條友,佢明明喺toilet屙緊屎,但佢就話自己搭緊,不過我又聽到沖廁聲,佢重要吹水,話部係有水聲!哈哈!」佢話香港人唔使下下死撐,做人放鬆啲先開心啲。

阿V會考24分遇上爛英文警察

阿V,一身街頭look,睇落似足band友,港產式警察夜晚街頭必查問的名單,有次就遇上激爛英文差人。

「有次被個差佬check ID card,一見我個名,死火,唔識讀。亂拼之下叫我Mohamme(穆罕默德),又用英文問我:『From where are you are come?』英文超爛都算,大佬,咪當我係恐怖分子、黑工,咁我咪同佢講番廣東話,但佢又唔領情,我講英文又鬧我,大佬,我會考24分,英文攞A!」

阿V話,自此之後再被警察查身分證,最鍾意講番「from where are you are come」嚟串番啲警察!佢話香港人最鍾意睇外表,連警察都係!哈哈!咁又係,如果嗰個差佬知道阿V其實係住半山,被查問機會實會減少。

爆笑!印度表哥教Yoga

另一個爛gag,就係阿V試過喺街被sell瑜伽課程!

「有次行尖沙咀被一個香港人sales派傳單問我做唔做瑜伽,我心諗你問1個印度人做唔做瑜伽?都幾搞笑喎!但我有時間,又睇下佢點sell!點知佢一開口就話做瑜伽可以將腳擺喺頭度,又會教點呼吸!頂,我點呼吸唔係要你教呀!最正係佢show張瑜伽導師相出嚟,話保證係正宗印度Yoga,點知相入面幅相就係我喺香港嘅表哥,哈哈哈!」個故事都係想講,香港人印度人一樣咁醒,只要諗下計,一樣搵到銀。所以逆境牛年,大家諗下計,一定可以抗海嘯狂搵銀!

阿V遇靚女sales!幽默挑逗

「有次我入I.T買衫,啲sales一見我就唔敢行嚟埋sell我,驚要講英文嘛!冇幾耐有個行埋嚟同我講:『Accuse me(中文解控告)can I held(擁有) you?

』咁我一聽到咁爛咪同佢講, I won’t accuse you, but you may hold me,即係話我唔會告你,但你可以擁有我!」阿V話因為個sales係靚女囉!哈哈哈!

終極!賺300萬美金退休

家住中環半山柏道嘅阿V,家底富庶,因為佢老爸有錢,但佢想有啲骨氣,唔靠屋企人,目標係35歲前賺到300萬美金退休!

「我計過300萬美金,每個月至少有2萬利息,咁起碼我養得起自己,唔使family擔心。不過錢都係其次,最重要係完成我嘅夢想,鍾意就搞啲棟篤笑,或freelance做設計網頁,自己話晒事。至於老婆,唔強求喇!我唔mind佢一定要識整咖喱或者係鬼妹,最緊要夠獨立,character isvery important for me!」

起底!阿V最勁玩freestyle

阿V嘅成名地,就係中環伊利近街嘅Take Out Comedyclub,呢度每個禮拜都有棟篤笑比賽同表現,阿V就係喺度參加咗中文版嘅棟篤笑比賽,攞過冠軍,重被選為「The Funniest Person in HK」,之後佢擺咗自己嘅片段上YouTube,就咁紅咗!

阿v 360秒人生課堂 印度 棟篤笑 plt
(圖片來源:tvb.com)
阿v 360秒人生課堂 印度 棟篤笑 plt
(圖片來源:[email protected]
阿v 360秒人生課堂 印度 棟篤笑 plt
(圖片來源:[email protected]

常見問題

棟篇笑星阿V是土生土長香港人嗎?

阿V會講流利廣東話,原名Vivek Mahbubani,他的身世是⋯⋯詳情按此收看

360秒人生課堂壓軸還有哪位嘉賓?

《360秒人生課堂》將於5月13日播放完畢,最後有一無甘草綠葉藝⋯⋯詳情按此收看

圖片來源:tvb.com, [email protected]

讀者留言