朱玲玲

陪羅康瑞北上公幹 奔六朱玲玲 錫婚放閃

相戀八年、08年11月正式於新加坡註冊結為夫妻,眨吓眼最靚港姐朱玲玲9月7日就滿60歲、年尾迎來同二任丈夫羅康瑞十周年結婚紀念。點慶祝好?日前本刊在銅鑼灣野生捕獲朱玲玲買完用品,坐保母車去灣仔瑞安中心接埋老公收工,齊齊坐直通車上廣州陪同公幹。老夫老妻的日常之唔係千篇一律平淡是福啫嘛,十八年後仲係執埋行李接埋收工、陪伴左右秤不離砣,身邊有咁細心體貼、靚足40年嘅另一半,仲有咩求?

撰文:東方新地|圖片:新傳媒圖片庫、微博

朱玲玲夫唱婦隨拍拖公幹

新一年度香港小姐又誕生,話就話長江後浪推前浪,不過香港人相信絕對不會有異議,幾多浪都唔會取代到朱玲玲「最美麗港姐」地位。如今就快「登六」,仲多咗長子霍啟剛對寶貝仔女做埋「最美麗嫲嫲」,朱玲玲日常除咗湊孫、同朋友打羽毛球、熱心公益同慧妍雅集活動以外,重心唔使講,當然係陪吓老公。

朱玲玲
朱玲玲陪羅康瑞北上公幹,二人去到火車站上車前先在零食店買禮盒。

貴為瑞安集團董事長,70歲的羅康瑞繼續工作不言休,不過工作再忙,都盡量陪太太朱玲玲四圍去、出席活動。年頭難得擠出七日大假同朱玲玲飛去澳洲攤抖吓,平時就係老婆變身賢內助,陪番轉頭周圍公幹。日前上午返公司處理業務、下午要趕直通車上廣州,好彩有個好太太負責收 拾好短程行李、晨早先去時代廣場採購物品、再夾啱時間去到瑞安中心門口接埋羅康瑞齊齊去到紅磡火車站。兩公婆一如既往衣著樸素、連色系都係一個tone,肩並肩從落車處行入車站。經過零食店,朱玲玲買多兩合禮盒零食北上送禮、羅康瑞就乖乖企埋角落等太太買妥一齊出發。都話幸福唔係睇身家多少,而係關乎身邊有個啱key另一半。

朱玲玲
今年11月就係朱玲玲同羅康瑞結婚十周年紀念,加埋拍拖並肩行過18年,恩愛如昔。

靚足40年

9月7日生日的朱玲玲即將踏入60歲,氣質顏值依然高班,完全冇走樣。

朱玲玲

幫老公打點

坐下午直通車北上,羅康瑞如常先返公司,朱玲玲就負責收拾行李、補購用品,再坐保母車去灣仔接老公收工。

朱玲玲

司機搶住落車幫攞行李,羅康瑞就自己行李自己拎,指點司機去幫太太。

落車後二人肩並肩行去火車站,唔止步伐一致,連穿著用品都係一樣色系又非常樸素,難怪啱key。

朱玲玲

打羽毛球keep fit

自言沒有特別保養容顏,只會keep住打羽球鍛鍊身體,朱玲玲自爆近年羽毛球腳葉倩文愛上哥爾夫球,所以近來練波都搵咗馬浚偉頂上。

朱玲玲

孖住約老友

除咗公事同慈善活動,兩公婆參加私人聚會亦形影不離,經常可見羅康瑞陪朱玲玲見老友林子祥、葉倩文、杜德偉及李樂詩。

朱玲玲

天然美

77年當選港姐冠軍,九個月後舉行童話婚禮嫁入豪門霍家,朱玲玲不論任何階段、身為三子之母定係一對孫仔孫女的嫲嫲,四十多年來容顏氣質不減當年,最美港姐稱號絕對當之無愧!

19歲

77年當選港姐冠軍,被封「最美麗港姐」!

朱玲玲

20歲

20歲嫁霍震霆。

朱玲玲

46歲

仔都咁大,朱玲玲仍明艷照人。

朱玲玲

59歲

同麥明詩合照都唔輪蝕。

朱玲玲