陳凱琳 讚鄭嘉穎厚禮冧父

最新娛聞

電視圈近年女團當道,早年有佘詩曼為首的「七魔女」,後有胡杏兒領軍的「胡說八道會」,不過最炙手可熱的可算是「少婦聯盟」。無綫上周剛播完的劇集《平安谷之詭谷傳說》,外界一致話好睇過台慶劇,除了劇情緊湊,劇中女主角陳凱琳、龔嘉欣、譚凱琪、沈卓盈更被讚演技大爆發。踏入狗年,「少婦聯盟」著到紅彤彤向本刊讀者拜年,分享甜到漏的愛情故事,搶住做狗年新娘。四個不同年齡、背景與性格的索女走埋一堆,竟然冇是非只有笑聲,仲當場互爆馭仔術。

撰文:東方新地

圖片:新傳媒圖片庫

陳凱琳 閨蜜互爆私事

《平安谷之詭谷傳說》一眾女角被男人們欺壓和勞役,由認命到結成復仇聯盟,聯手奮起反抗,充滿捍衞女權主義味道,陳凱琳(Grace)、龔嘉欣(Katy)、譚凱琪(Zoie)、沈卓盈(Jessie)戲裡戲外更成為好友,friend到成立閨蜜團「少婦聯盟」,正所謂「三個女人一個墟」,四個圍埋嘈就一定啦,不過她們之間卻多了一份愛。

「少婦聯盟」這次破天荒為本刊拍攝賀年封面,過程中冇搶衫、冇批踭,出奇地只有笑聲笑聲滿載溫馨。四人中只有龔嘉欣單身多年,其餘三位姊妹都為她著急,一坐低訪問就話要力sell龔嘉欣的優點,陳凱琳先講:「嘉欣最大嘅優點就係謙虛,佢好獨立,可以保護身邊嘅男仔。」譚凱琪補充:「因為佢好保護身邊朋友,有唔公平唔make sense嘅事佢會力爭到底,唔會畀人蝦我哋。我哋相信佢會搵到適合又愛錫佢嘅人,只係緣份未到,可能 緣份一到佢快過晒我哋結婚呢!」龔嘉欣雖然愛為好友抱不平出頭,但她坦言始終想找個人保護自己,女人太強未必是好事。

甜心女友 愛整蛋糕送驚喜

年紀最細的26歲陳凱琳,每提熟男男友鄭嘉穎永遠一副甜到漏樣,甜心女友實至名歸。龔嘉欣指住陳凱琳爆料:「佢(陳凱琳)係一個超sweet嘅女仔,佢成日會畀驚喜身邊嘅人,唔一定係節日㗎喎!有時佢會突然整甜品或蛋糕送畀人,整得好靚又寫名,知道人哋唔食太甜佢會減甜,男友要keep fit佢又會整少啲健康啲!」沈卓盈亦曾被陳凱琳深深感動:「去年我生日Grace整咗個蛋糕畀我,so sweet!同埋真係好好味㗎!」

陳凱琳唔止對男友嘉穎好,仲被爆愛屋及烏,譚凱琪說:「以我所知,Grace對男友嘅屋企人同朋友全部都好好,係出自真心對待,呢樣真係好難得。」被爆識得行奶奶政策的陳凱琳自辯:「信唔信都好,我係巨蟹座,係好愛錫屋企人同顧家嘅!我都希望自己身邊嗰個都錫屋企人嘅,的而且確嘉穎都係,所以我哋好夾囉!」

沈卓盈 最buy司機男友

說話嬌嗲的沈卓盈拍拖經驗非淺,馭仔當然有一手,她被爆有個似足司機的男友,她憶述當時情況:「有次星期日約咗佢哋去整餅,因為好趕時間,一上到車我就同男友講:『鴻圖道28號吖唔該!』當時我男友狂笑,我問佢笑咩,佢話:『你好似當我係司機咁!』去到目的地我同番佢哋講,笑死佢哋。其實我男友係好想星期六、日都爭取時間陪住我,所以我去邊佢都想車我一程,佢有呢個心我係好buy嘅。」能夠令男友自願做司機,沈大師絕對不是浪得虛名。至於與男友拍拖多年的譚凱琪,竟被爆對住男友最大食,陳凱琳笑說:「我係男仔都鍾意同佢拍拖,因為佢好鍾意食嘢。通常女仔同男仔去街都會扮晒嘢話食好少嘢,或者淨係食沙律,但佢一嚟就食得多過個男仔,人哋食唔晒佢仲會食埋佢,一啲都唔扮嘢!」

陳凱琳 讚嘉穎厚禮冧父

今年情人節適逢年廿九,陳凱琳說到與嘉穎共度的第三個情人節,狂放幸福正能量:「人係向前望,我希望今年嘅情人節係最難忘嘅一個啦!嘉穎個人好sweet,但又好低調,佢畀嘅驚喜可能係煮餐飯,或者一啲簡單嘅行動啦!但對我嚟講已經好sweet。我就好鍾意畀驚喜人嘅,今年第三年一齊過情人節,我哋一直 保持好sweet嘅關係,因為佢都好錫我,所以我要諗多少少時間,睇吓今年有咩手 作可以做。」

在陳凱琳眼中,嘉穎的過人之處多到數唔晒,不過孝順肯定是優點之最,陳凱琳:「好孝順!佢(鄭嘉穎)真係好孝順,佢同我講賺錢都係為咗養媽咪同家姐,一個人賺錢養全家。我最鍾意佢嘅性格,唔會表面一樣嘢,內裡又另一樣嘢,呢個真性情我係好欣賞。佢對外界有時會起槓係因為佢以往嘅經歷所以想保護自己,佢本身真係一個好nice嘅人。」她更自爆嘉穎曾買紅酒氹其父:「我Daddy好鍾意飲紅酒嘅,嗰時啱啱拍拖都希望Daddy對嘉穎印象好,見面前嘉穎問我Daddy鍾意啲咩?我略略提過佢鍾意飲紅酒囉!佢聽完好似冇嘢咁只係『哦!』咗聲。到第一次食飯佢就買咗支好貴嘅紅酒,我Daddy收到時好似冇嘢咁望一望話:『哦!多謝你呀!』然後擺低支酒。當嘉穎出去洗手間時,Daddy再攞起支酒話:『嘩!靚嘢喎!』跟住我真係好開心呀!大家都開心,Why not?」感情好到不得了,更被傳過無數次婚訊,問陳凱琳嘉穎是否她的Mr. Right,她秒答:「Absolutely!(肯定)」隨即摸住凳連講二次「Touch Wood!」如無意外嫁硬啦!

少婦聯盟由來

「少婦聯盟」四個成員都未婚,當中陳凱琳與龔嘉欣 三十歲都未到,何解會叫自己少婦?其實源自她們合作的無綫民初劇《平安谷之詭谷傳說》,四人在劇中都已嫁作人婦,在封建傳統社會欺壓下團結起來反抗。私底下四人一拍即合,圍內又講啲師奶嘢,所以美其名叫「少婦」,眾人開了WhatsApp Group分享邊度有減價,邊度有著數,仲會約埋一齊去百貨公司shopping。唔止少婦,其實仲好師奶。

讀者留言