陳奕迅

【陳奕迅免費騷】康堤賴底阿徐 怕醜閃走!陳奕迅Eason 呼籲霆鋒讓紅館跨年檔

陳奕迅(Eason)和DUO Band在中環海濱舉行的《L.O.V.E. IS L.I.V.E.》音樂會於昨晚(27日)完滿結束,Eason今次嘅免費慈善騷,雖然冇公開售票,唔係個個有得入場睇,但都有喺網上直播,等所有樂迷都有得欣賞!Eason在音樂會上向樂迷大派定心丸,表示如果申請到紅館,一定會試跨年演唱會。

撰文:東方新地 │ 圖片:新傳媒圖片

陳奕迅 中環開免費慈善騷

陳奕迅和DUO Band在中環海濱舉行的《L.O.V.E. IS L.I.V.E.》音樂會於昨晚(27日)完滿結束。開騷前,Eason綵排時接受訪問,稱不太清楚現場是否有聲音管制,但音樂會提早6點舉行,相信問題不大。而由於安全理由,Eason在舞台與頭排歌迷有一段距離,相信不能夠安排握手環節。問到會否考慮在戶外開正式演唱會?Eason直認有困難,他說:「而且好難做實名制,今次1600人較小型音樂會就可以,好難遏止炒風。」

恨試陳奕迅紅館跨年檔 呼籲好友霆鋒讓路

講到歌迷期待已久的演唱會終於有「聲氣」,Eason說:「我申請過紅館暑假檔期,可惜不成功,我未做過跨年,試試可否在2019年開跨年演唱會,死都希望一試。(謝霆鋒都爭取同一檔期,兄弟都無情講?)我只求明年12月中至1月中,他改開農曆年得唔得呀?希望大家支持我,我很不要臉講到出口,希望做到人人有飛睇,我開30幾場都無問題呀!」

今次陳奕迅的露天音樂會觀眾約1600位,因音樂會以慈善為目的,故大部分門票送給十一個不同範疇的青年服務團體及慈善機構,希望大家可以更加留意到歌曲本身,讓Eason和樂隊以歌曲去傳遞愛,希望可以把快樂傳給更多人。而由於是次音樂會未有進行公開發售,所以Eason為咗令更多fans可以欣賞,Eason決定將演唱會現場直播!

據知,獲邀觀眾入場要憑QR Code核對姓名後才可入場,場內全為企位,不設劃位。

今次Eason的慈善音樂會不設劃位,另外亦安排了輪椅位置供所需人士使用。

Eason太太徐濠縈、女兒康堤,Eason父親陳裘大亦來捧場,康堤好怕醜不願上鏡,一見傳媒舉機即撇甩媽咪阿徐,帶笑急步入場。

記者係咁叫康堤停低影相,但佢好怕醜笑住急步走,而阿徐係咁叫記者唔好影個女!

睇真啲,康堤原來箍緊牙!

音樂會於傍晚6點15分開始,Eason以新歌《破壞王》去開展2小時的音樂會。

結他手王雙駿旁邊放有盧凱彤生前使用的結他,在結他上更放有白色鮮花去悼念。

唱畢頭兩首歌曲後,Eason已經大汗淋漓。

Eason在表示扁桃腺發炎未完全康復,故聲音一般,但佢會努力戒煙,他又有感而發說:「其實這種空曠的地方不應再起樓,如果有人想起樓就實在太浪費。日本有間『地產商一哥』在東京最貴地段的高樓大廈開設藝術館,他大可以賣出好高價錢,但這樣做對社會有正面影響,讓市民可接觸到藝術文化。當然錢是少賺了,但為何要賺到盡呢?」

Eason在今次的音樂會上,唱咗幾首未正式面世的歌曲,包括:《龍舌蘭》、《敬菸》、《瘋狂的朋友》等,而Eason亦有與岑寧兒坐在台上合唱出新歌《Run》。

留位放結他鮮花悼盧凱彤

第3首歌曲就唱出了由盧凱彤有份參與作詞的歌曲《海裡睡人》,大會也在Eason唱這首歌時,特別拍下台上Ellen生前用的結他。

之後有人提議大合照,台下有人叫佢哋背住觀眾喺台上影,就會影到大家。埋位合照時,其中一位樂隊嘅外籍成員,手持一張舊相,相中應該係Duo Band之前喺band房嘅大合照,相中相信有已故成員Ellen,影完合照之後,大家走到台前手拉手謝幕。

Eason and the duo band《L.O.V.E. is L.I.V.E.》Rundown

1.破壞王
2.最後的嬉皮士
3.海裡睡人
4.還不夠遠
5.漸漸
6.黑洞
7.敬蔠
8.給兒子的信
9.蠢
10.Beautiful Fools
11.瘋狂的朋友
12.猜情尋
13.Run
14.盡力呼吸
15.龍舌蘭
16.和平飯店
17.我們萬歲
18.床頭床尾

19.與你常在
20.與我常在
21.可一可再
22.幸福摩天輪

當中Gin Lee、胡子彤、歐鎧淳、余德丞、Ellen盧凱彤的遺孀余靜萍等人也有出席支持。

冇得入場睇嘅人,用盡方法去睇,有人衝欄硬闖,有人坐摩天輪喺「核心外圍」去支持。

呢位哥仔跨欄進場不逐,直頭衝閘入,最後當然被實Q趕離場!