陳華鑫四眼律師look獲大讚 性感學生妹演出被奉為經典

台慶劇《是咁的,法官閣下》早前一集講到飾演實習律師的陳華鑫,因在法庭上偷拍而被判刑,影相呃like都唔係可以亂嚟嘅!不過講返重點,陳華鑫擁有一副青春靚樣加娃娃聲,於劇中的四眼律師look亦非常討好,獲唔少網民大讚!陳華鑫喺現實就快做媽媽,不過之前喺劇集扮學生妹成名,性感演出成為網絡熱話,依家一一回顧!

撰文:東方新地|圖片:新傳媒、Instagram、劇集截圖

《是咁的,法官閣下》陳華鑫四眼律師look獲大讚

《是咁的,法官閣下》早前一集中,講到飾演實習律師潘琪的陳華鑫竟然知法犯法,被發現於法庭上偷偷用手機影相,最後被判罪名成立,罰款2千蚊,有機會影響獲取大律師資格!依家人人咩都鍾意用手機影低,放上網呃like,但隨時會出事!

庭上偷拍被發現

「眼鏡娘」造型好省鏡

《是咁的,法官閣下》都有唔少靚女演員,不過估唔到除了麥明詩以四眼look演大律師外,只在其中一個單元故事出現的陳華鑫都備受關注,網民都大讚其「眼鏡娘」造型好省鏡!陳華鑫接受傳媒訪問時表示自己都好喜歡呢個角色,自己好投入去演,並多謝陳耀全監製多次搵佢演一啲甚有發揮空間的角色。

童顏準媽媽

1989年出世的陳華鑫今年29歲,外形可愛嬌滴滴又有一把娃娃音,但其實佢已為人妻,仲就快做媽媽!陳華鑫今年一月嫁予圈外男友周國榮,婚後二人極速造人成功,並於八月公布有喜,預產期為十二月底。不過陳華鑫接受訪問時,表示因子宮頸短,所以好有可能會早產。

《性在有情》性感學生妹演出

唔講大家未必記得,陳華鑫為2012年落選港姐,有樣有身材,仲有一把好嬌嗲的BB聲。佢早年喺《性在有情》中飾演陳敏之的中學生妹妹。雖然當時陳華鑫已經26歲,不過扮演中學生完全冇違和感,仲非常誘人!其中一場戲佢請教敏之如何升Cup,着住粉紅小背心係咁谷,睇到觀眾血脈沸騰!

小背心谷胸

索學生妹配薯老師

飾演中學生就當然有校服look,陳華鑫着住校服短裙仔、小白襪黑鞋青春可人,仲會同薯到爆的中文老師沈震軒發展一段師生戀!

三點式性感演出 幫沈震軒人工呼吸

雖然喺劇中學生妹look本來已夠煞食,但如果大家仲記得的話,陳華鑫其實仲有一集以三點式泳衣性感演出,呢場戲係講佢同幾位同學仔去沙灘玩,點知薯頭老師沈震軒不慎遇溺,被陳華鑫救起,嘴對嘴人工呼吸!

青春無敵學生妹

沈震軒不慎遇溺

2012年落選港姐

陳華鑫2012年參選香港小姐,最後三甲不入,於是與其他落選港姐一樣參加藝員訓練班,畢業後成為大台藝人。值得一提的是,近年唔少網民都話2012年港姐競選相當高質,除了三甲張名雅、黃心穎及朱千雪外,仲有湯洛雯、林泳淘、岑杏賢、陳潔玲等靚女。

未知會否復出拍劇

陳華鑫現時專心待產,希望佢生完BB後都會復出拍劇,有更多機會見到佢演出啦!雖然小編同網民都唔介意佢再度泳衣性感演出,不過可能人哋老公唔俾呢!

讀者留言