moses fi

雙料視帝唔恨獎 陳豪幸福湊仔

陳豪07年憑《溏心風暴》「得得地」一角奪雙料視帝,轉眼10年,依然係TVB一哥的他,在台慶劇《誇世代》演出大獲好評,不過事業家庭兩得意,陳豪已經睇淡奬項,不單冇落力為自己拉票,頒奬禮只是陪坐替人高興,亦毫不介意。現時貴為三個小朋友父親的他,努力工作賺錢之外,寧願多抽時間湊仔照顧家庭,奬項只係錦上添花!

撰文:東方新地

圖片:新傳媒圖片庫及網上圖片

陳豪 陪老婆湊放學

為畀囝囝有理想學習環境,陳豪夫婦安排大仔梓燁Aiden入讀位於半山波老道的「幼童樂園人協會幼兒園」,每日唔怕山長水遠來回三個鐘頭車程湊仔返學。日前陳豪同陳茵媺一齊接大仔放學,老婆入學校接大仔Aiden,他就同細仔Nathan在外邊等,不停逗囝囝睇風景等媽媽和哥哥。待陳茵媺接咗大仔Aiden離開學校,兩公婆火速安排兩個小朋友上車,但大仔仲掛住睇圖書,令二人顯得有點手忙腳亂。

陳豪
陳豪即將返內地拍劇,有咗家庭之後第一次同屋企人分開咁耐,佢爭取時間家庭樂。
陳豪
陳豪一邊逗細仔,一邊等媽咪陳茵媺帶大仔出校門。
陳豪
陳茵媺接咗大仔Aiden離開學校,阿Mo即火速上前拖住大仔行。
陳豪
Aimee 就拖返細仔極速行去搭車。
陳豪
細仔Nathan行行下突然㰖住媽咪大腿撒嬌,超sweet!
陳豪
拖住大仔Aiden跟在後邊的陳豪,現出四萬笑容。
兩公婆安排兩個小朋友上車,大仔仲掛住睇圖書,令二人有點手忙腳亂。

肉赤老婆辛苦

大仔梓燁(Aiden)已經四歲,孻女凱婷Camilla亦快將兩歲,同陳茵媺出名係模範夫妻的陳豪,家庭事業美滿,一直羡煞旁人,好好先生陳豪更表示,工作以外,全部時間留給家人。據知情者透露:「本身阿Mo就好黐家,有咗小朋友之後,佢更加覺得時間幾乎唔夠用,依家大仔開始返學, Aimee要打理屋企大小事,又要照顧小朋友,每日為仔女準備餐單、教功課及安排興趣班,佢覺得老婆已經好辛苦,所以一有時間就會分擔老婆工作,盡量朝早都會負責湊仔返學,依家《誇世代》完晒,嚟緊三個月阿Mo都會放假陪屋企人,加上Aimee仲有戲癮,有啱嘅工作佢都想老婆可以做自己鍾意嘅嘢,所以兩公婆協議好,盡量遷就大家嘅工作檔期,一個開工,另一個就負責湊仔女,唔可以忽略啲小朋友!」

陳豪
生咗三個小朋友,仍然有戲癮的陳茵媺,大部份時間留家相夫教子,但仍選擇性工作,不時孖阿Mo夫妻檔賺外快。
陳豪
陳茵媺三年抱三,為老公及仔女甘願放棄事業,湊住孻女凱婷一臉滿足,就知她這個緊張媽媽相當幸福。
陳豪
陳豪睇淡奬項,不用開工就寧願留家專心湊小朋友。對住乖女更加甜到漏,囡囡掛住玩,他亦要從後錫錫!

07年做雙料視帝

陳豪07年憑《溏心風暴》「得得地」一角奪雙料視帝,轉眼10年,依然係TVB一哥的他,在台慶劇《誇世代》演出大獲好評,更有份提名視帝,雖然最後未有獲奬,但陳豪賽前接受本刊訪問,講到有冇信心攞奬,佢話:「信心不嬲都夠,不過睇吓有冇運啦!去到人生依家呢個階段,睇嘅唔止咁多,以前可能放好多喺奬項上,但依家睇奬項係一個奬勵,同時係一份運氣,經過咁多年會明白唔可以強求,所以如果有嘅話,I think is ok!倒轉如果冇唔好對自己失信心,奬唔係定一個成唔成功,成功係在於努力,努力有機會成功,唔努力就唔使旨意成功!」佢又話為家人而努力工作,係佢嘅源動力,因為團火依然存在,希望可以保持競爭性!

同王浩信 識英雄重英䧺

陳豪在50集台慶劇《誇世代》演亦正亦邪角色鄺港生,有份競逐今屆台慶頒奬禮「最佳男主角」獎,不過,演出口碑好,陳豪卻睇淡奬項,還落力幫王浩信、夏雨、李佳芯拉票,周日(21日)的台慶頒奬禮,自己只出席陪坐替人開心。陳豪好友透露:「阿Mo對演出好有要求,雖然為咗《誇世代》個角色,佢狂操健身又好仔細咁鑽研角色性格,但見到咁多人讚佢已經好開心,最後《誇世代》攞到最佳劇集,佢都覺得好意外。佢覺得每個被提名嘅演員,背後都付出好多努力,奬項就只得幾個,攞唔到唔代表唔好,努力亦唔係只為奬項,自己一定要有搏殺精神。加上佢見到王浩信、李佳芯近年好努力,有啲自己當年嘅影子,一樣好戲,所以都好支持佢哋!佢哋攞到獎,佢一樣開心!」

陳豪
陳豪在《誇世代》同李佳芯有連場對手戲,演出同樣大獲好評。
陳豪
陳豪為咗《誇世代》個角色,曾狂操健身又好仔細咁鑽研角色性格。
陳豪
最後《誇世代》攞到最佳劇集,陳豪都覺得好意外。

「陳豪=家人!」

陳豪早前接受本刊訪問,話佢同太太陳茵媺嘅手機日曆係同步,大家都知大家嘅行蹤,他說:「我現在育有兩子一女,所以兩夫妻之間日曆係同步,咁我哋先可以安排好我哋嘅時間湊小朋友,因為坦白講都幾多嘢做吓!如果我哋大家唔一致亂七八糟會好難安排!」被記者問到係咪冇私人時間,他笑說:「私人時間?晨早冇咗啦!依家係陳豪=家人!」真係顧家好男人!

陳豪
每逢大時大節,兩公婆都為仔女搞驚喜party, Boxing Day就同一班好友開聖誕Party聯歡。

陳豪 陳豪

當小朋友係大人 解釋父母去向

自從2013年陳豪同陳茵媺結婚後,三年抱三。三年抱三追女成功,陳豪說過「有BB都係天賜嘅喜悅,有埋個女就係上天圓滿我嘅人生。」所以三個小寶貝都係二人的快樂泉源!陳豪同陳茵媺因為要照顧小朋友,所以直言好少時間可以二人世界,經常要分配時間照顧仔女,如果佢哋想二人世界嘅時候係會同小朋友去解釋爸爸媽媽去邊、做咩,會當小朋友係大人,等小朋友會有心理準備,唔會扭計話要一齊出去。而講到近日社會接連發生虐兒案,陳豪認為傳統中國人用體罰教仔,會傷害到孩子的心理及生理,佢同陳茵媺認為應多鼓勵子女,增強自信心!

陳豪

陳豪 陳豪