露底引大媽 爆肌陳豪裸遊中環

婚後三年抱三,忙於拍劇又忙湊仔無暇做運動的陳豪,一度脹到200磅凸腩出現中年危機,但阿Mo甚有本事話keep就keep,年初投入拍攝台慶劇《誇世代》時,狂操短短兩個月,已經練出六舊腹肌43吋巨胸,就連陪仔女返加拿大放暑假返港的老婆陳茵,冇見老公個多月,亦被老公完美body引死,忍唔住大嗌「好Hot, Baby !」日前陳豪在中環出巡半裸拍宣傳片,引得一班大媽OL瘋狂眼望望。陳豪任望唔嬲,自信心返晒嚟!

陳豪大街大巷晒爆肌

46歲的陳豪,近月為50集台慶劇《誇世代》狂操爆肌身材,練成六嚿腹肌及43吋巨胸,日前在中環拍攝新宣傳片,身形弗到漏的他,更加在人來人往的中環街頭赤裸爆肌拍攝,操到人類最強body,陳豪行步路亦自信十足,粉紅西裝褲更露出灰色底褲邊,引到一班路過的大媽大叔阿哥阿姐睇到眼都唔眨!魅力沒法擋!

陳豪在中環拍攝《誇世代》宣傳片,就算在大街大巷裸住上身都毫不尷尬,話晒練出六嚿腹肌和43吋巨胸咁養眼,騷吓Quali都應該!

 

陳豪的六嚿腹肌果然吸睛,唔少路過行人都停低攞手機狂影,更引到一班大媽走近睇到眼都唔眨!

陳豪一度脹爆凸腩

模特兒出身的陳豪,因為高大有台型夠煞食,早年拍《天與地》時操到拳手一般身形,但婚後連生三仔女,兼顧養家及湊仔,一度疏於操練body,不用拍劇時更挺住肚腩湊仔,被指肥豪。為洗惡名及配合台慶劇《誇世代》,陳豪就瞓身練出一副完美body !

終於收得工,陳豪赤膊行返上車,練出完美body的他,行步路都相當有自信!上車前仲嚟個chok樣!

新劇剝不停

在劇中演拳手的陳豪,同森美有不少打拳場口,兩人都要赤膊爆肌上陣。知情者透露:「其實阿Mo每次拍劇,都可以好快收身,佢真係好有毅力!今次喺《誇世代》入邊,阿Mo因為有唔少打拳戲,又要攀石,成日要除衫騷肌演出,佢唔想只係扮嘢借位打幾下,冇姿勢又冇實際,所以決定狂操,希望練到完美線條,拍出嚟有好效果,操咗兩個月,佢真係練到六嚿腹肌,連監製都話佢好堅,咁短時可以操到咁弗,因為好評如潮,套劇拍完佢都希望繼續keep落去!」

陳豪同森美在《誇世代》演拳手,二人就互相鼓勵狂操鬥爆肌!

能夠操出健美先生身形,陳豪坦言要多得教他健身的張繼聰傳授秘笈。阿Mo話:「好多謝阿聰嘅無私分享,佢嗰套健身方法真係好專業,畀到好多意見我,原來健身唔係咁簡單,食啲乜,同埋點樣做運動,每樣嘢都係學問,計算要好準確。為咗呢副咁弗嘅身形,自己生活方式都改變咗,一星期要操足六日,只係有一日休息,每日要用三個鐘頭做全身肌肉訓練,除咗做gym,仲要戒口,食嘢要走油走鹽走糖,計算晒卡路里先至食入口。」聽見都覺艱苦!

即使操出六嚿腹肌,陳豪仍毫不自滿,更講到明只有努力,才能接近夢想。

 

全靠阿聰!

 

七月陳茵媺帶同三個仔女返加拿大放暑假,離港個多月是阿Mo發力狂操之時。

 

陳豪兩個月操到六嚿腹肌43吋巨胸,當時仍在加拿大陪仔女放暑假的Aimee亦忍唔住留言大讚他很勁,但鬼妹仔的她,腹肌卻寫成覆機!

留言大讚老公很勁

老公要留港拍劇,陳茵媺七月就帶同三個仔女返加拿大放暑假,雖然要忍受同老婆仔女相思之苦,但就令陳豪可以專心操練。據陳豪好友透露:「因為湊仔好困身又好忙,喺Aimee返加拿大嗰段時間,陳豪就可以專心狂操,因為每日要攞三粒鐘嚟健身,的確唔容易。依家啲仔女瞓咗覺,先至抽到時間鍛鍊!」

出名係24孝老公的陳豪,每次老婆Aimee生日,都會悉心製造驚喜,今年就book定酒店套房幫老婆慶生,二人更著住浴袍恩愛合照!

 

兩公婆齊齊keep fit 減肥,成效明顯,大家都回復最佳狀態。

老公練到六嚿腹肌,Aimee更在社交平台留言大讚老公犀利, 更大讚老公係「Hot Baby」,由於Aimee返港後亦復出拍電影,受老公影響下二人更一齊keep fit,日前阿Mo同Aimee一齊返銅鑼灣陳母屋企,畀老人家見吓三個孫仔孫女,當日大晒一雙長腿的Aimee,冇見一排,果然同老公一樣收晒身,見到記者二人都表現友善笑晒口,一家五口幸福到爆!

陳茵媺拖住大仔Aiden,已經三歲半的Aiden個樣就似足媽咪!

 

陳豪抱住細仔Nathan,工人姐姐就幫手湊住孻女Camilla,歲半的Camilla肥嘟嘟超可愛!

 

全文完