【飛虎之潛行極戰】吳卓羲 大個仔愛黐家
後生細仔血氣方剛，萬大事大不過揸住架戰車周圍威同車女朋友出入，乜嘢叫做成長？之唔係知道架車係攞嚟代步、冇地方舒服得過返屋企，同埋最重要係陪阿媽囉！講緊嘅係最近正主演《飛虎之潛行極戰》嘅38歲仔吳卓羲！
撰文：東方新地｜圖片：新傳媒圖片庫、吳卓羲FB
《潛行極戰》吳卓羲 爭取時間休息
吳卓羲呢幾年離開無綫走南闖北果然搵到錢亦都修心養性變成熟，記者以往撞到佢唔係拖住女就係揸住戰車約朋友去夜街，早排竟然天都未黑就坐保母車打道回府返大埔屋企。見到記者個鏡頭，吳卓羲一啲都冇唔自在，反而保持笑容、不斷揮手打完招呼又講再見，呢啲咪大個仔囉！
吳卓羲近年勇闖電影圈，啱啱又忙住要宣傳新劇《飛虎之潛行極戰》，睇怕都係捱到唔多夠瞓，日光日白口腫面腫，不過見到記者都仲識得打招呼。
往日難得返香港一定係自駕戰車周圍飛番轉，如今大個仔穩重咗，吳卓羲有機會都係等司機代勞，自己爭取時間休息吓先。
天都未黑，吳卓羲竟然冇街去，自稱冇拖拍又變得黐家，果然有時間寧願早啲返屋企。
15年爸爸去世後又離開無綫，吳卓羲都話開始珍惜同屋企人相處，一得閒就會陪媽媽去大埔街市買餸。
《飛虎之潛行極戰》連媾兩女
吳卓羲在《飛虎之潛行極戰》中飾演O記高級督察高家俊，為吳岱融兒子，苗僑偉下屬，周旋在陳凱琳和何佩瑜 (Jeana) 兩女之間，認真艷福無邊！
TVB御用警察
其實吳卓羲一向都係TVB嘅御用警察，佢由2005年《學警雄心》開始扮演警察，喺過去13年間就多次飾演警隊唔同部門嘅角色。由舊款制服演到新款制服，涵蓋警隊不同階層，包括學警、散仔、藍帽子、CID、飛虎隊同埋其他特種部隊，甚至連臥底都演過，份CV靚仔過唔少真警察！
學警出更喇！仲著舊制服。
吳卓羲由《學警雄心》就開始佢警察生涯。
散仔行咇，換咗新制服。
CID
爆炸品處理課
藍帽子
飛虎隊
反恐特警
臥底
另外，劇中的手槍一定勁過機關槍
今年吳卓羲終於升咗職，喺《飛虎之潛行極戰》做到O記總督察。有網友仲抵死咁話警隊內部架構好大，吳卓羲仍然有好多警隊職位未做過，相信佢可以做到退休咁話。相反，小編就比較期待想睇到吳卓羲做到「一哥」嘅時候！
