首挑戰台慶視后 李佳芯從「邪花」到女神之路

撰文：東方新地
圖片：東方新地、TVB劇照、李佳芯 IG

李佳芯 台慶爭視后

李佳芯(Ali)今次憑台慶劇《誇世代》尚家四小姐Paris一角角逐「最佳女主角」，劇中佢飾演一位刁蠻又可愛的大小姐，同陳豪做一對「合約夫妻」，演出有笑有淚，觀眾好buy！

李佳芯：會投自己一票！

早前Ali接受本刊訪問，問到對攞視后有冇信心，佢就話：「次次話冇信心都畀人鬧！所以今次有信心，今年好開心三套劇都出咗街，唔同類型嘅角色都有，希望觀眾喜歡，辛辛苦苦拍劇捱咗一年，所以我會投自己一票！」

《踩過界》法官Never 演技大爆發

今年Ali有幾套劇集出街，除咗《誇世代》之外，最觸目嘅當然就係《踩過界》入面嘅蒲精法官Never啦！呢個角色感覺亦正亦邪，畀觀眾睇到Ali演技嘅進步，話俾大家知佢唔係只應付到狐狸精角色！

話時話Ali其實都35歲，唔係十八廿二，但佢除咗樣貌娟秀、笑容甜美，仲散發出一種獨特氣質⋯ 無錯，就係仙氣！早在大家睇《學是學非》時，可以見到Ali具備一種少女（同佢年紀不成正比）的傻氣；但在劇集中又可以展露成熟女性的嫵媚，令觀眾喜愛有加。

學生時代的Ali已經美人胚子出晒嚟，絕對係天然美女！

著校服演出？Ali輕鬆啦！

素顏一樣好得！

同其他大台姐仔唔同，Ali平時的服飾都係由簡單為主，所以在台慶、香港小姐等大型活動時，見到Ali會露多少少肉，已經係好難得啦！現時晒奶成風、波神咪神泛濫，Ali可謂一道清泉！

Ali 2008年起在有線電視擔任節目主持，當時仲係用自己本名李嘉馨，不過默默耕耘多年，發展依然平平。雖然未有代表作、名氣未算大，不過Ali都憑住標緻面孔成功吸納唔少支持者！

去到2012年，Ali由有線轉投無綫旗下，13年時與黃心穎、梁嘉琪等人主持《學是學非》，節目大受歡迎下幾位「是非精」成功入屋，Ali亦從此廣為觀眾認識。

不過講到Ali最引人注目的演出，就一定係《名門暗戰》！ Ali在《名門暗戰》中飾演岳華情婦Ivy，姣到出汁又風騷，仲同黃浩然有場激烈床戲！

Ali在劇中大部分時間都係短裙晒長腿，加上一雙勾魂電眼，勾走晒一班男觀眾的魂魄！Ali仲話當時出街試過俾師奶鬧佢似足狐狸精，不過唔緊要，咁即係代表角色深入民心，觀眾記得！

之後在《倩女喜相逢》中飾演九尾狐，繼續老本行！

祝Ali好運！