馬明豪裝新房 心穎BB進駐太古城

上月初,無綫筍盤 馬國明 被本刊記者斷正,與黃心穎撐枱腳預祝情人節。兩人雖齊聲否認拍拖,但嘴角含春露晒底。馬明為將戀情低調處理,唔敢公開拍拖,只可與心穎同拍《深宮計》開工日見夜見。出名孝順的馬明去年以1,960萬元買入太古城複式單位,聲稱與父母同住,不過近月與心穎打得火熱,為準備新房娶老婆,正在裝修的新居主人套房已被他佔用,待豪裝完成後,心穎便可進駐太古城做女主人!

撐枱腳被斷正

43歲的馬明dry足六年,苦等契妹唐詩詠無望,去年佢終於遇上熱情如火的28歲小花黃心穎,由女方主動出擊,暗中撻着。不過馬明唔想戀情通天,心穎亦非常配合,甘願做馬明背後的女人。直至上月兩人被本刊記者斷正,去到銅鑼灣一間高級日本餐廳撐枱腳,平日打扮求其的馬明頭戴cap帽、Iron Man卡通tee配老牛,刻意扮青春襯番心穎!

豪裝主人房訂特大雙人床

馬明係圈中出名的孝順仔,與父母關係非常好,一家人多年來都同住在太古城,馬明不時都被影到陪媽媽飲茶行街。今次細屋搬大屋,據知馬明本來打算將主人套房留俾父母住,不過依家佢有女朋友,為咗方便帶女友返屋企,以及將來結婚所用,所以間套房最終都係歸佢!消息指除了有私人浴室外,馬明仲訂造咗張特大雙人床!

八十萬新車冧女

除了豪裝新房,向來慳家的馬明最近更以八十萬買入Benz,換掉駕了多年的四驅車,迎合愛車之人心穎。日前有人目擊佢再去Benz睇車,未知係咪打算送部Benz俾心穎做情侶車?

台上偷偷互望

早前「香港國際影視展」在灣仔會展舉行,當日無綫幾乎出動全台花旦小生,馬明與心穎同場現身卻刻意避免行埋,只在台上影大合照時偷望對方,事後馬明急急腳訪問都唔做就趕返無綫拍劇。

心穎BB呻見面時間少

活動後心穎BB接受本刊訪問,一提到馬明時就笑到心心眼盡現,佢表示知道馬明換新車,不過自己就未坐過,如果有機會都好想坐,因為自己一向好鍾意車!另外被問到有冇同馬明屋企人食過飯,心穎BB似乎暗呻兩人見面時間少:「我連同佢食飯嘅時間都冇乜,又點會約佢媽咪呢?」稱兩人一同趕拍新劇《宮心計2深宮計》,忙到冇時間。咁希望佢哋拍完劇可以多啲時間二人世界啦!

全文完