馮盈盈 談處女尷尬死 麥明詩自爆拍過三次拖

馮盈盈 、麥明詩、麥美恩 、劉穎鏇、陸浩明(6號)等昨晚出席「big big channel 後生仔 KOL 簽約儀式」暨「big big college 開學典禮」,其中馮盈盈近日喺節目《#後生仔傾下偈》一貫地言論出位,竟取笑嘉賓係處男!另外麥明詩就自爆曾經拍過三次拖,不過就被質疑次數太少。呢兩位近兩屆港姐冠軍都形象貼地、真性情,同過往啲冠軍真係好唔同!

馮盈盈:「原來係處…」

馮盈盈 同十優港姐麥明詩夾埋6號主持新節目《#後生仔傾下偈》,內容主要請啲90後KOL去吹水,分討下現今的貼地議題。殊不知開播第一集, 馮盈盈 就黎料,佢一貫真性情港女性格,聽到嘉賓Danny冇拍過拖之後,就情不自禁講咗句:「原來係處…」,搞到Danny鬼咁尷尬,多得6號幫佢兜返:「佢係將感情處理得好好啫!」先落到台。

 

馮盈盈談處女尷尬死

日前馮盈盈出席活動,對於因取笑嘉賓而捱批,佢就話自己都係搞吓氣氛,呢啲話題大學生O camp都會講,唔係咩露骨事情,大家年輕人開開心心傾吓偈啫。但當記者問到盈盈「有冇人問你係咪處女?」,佢竟然話:「冇人問過,唔知點答,好尷尬啊,哈哈!」港姐呀,知道呢啲問題咁odd,就唔好喺節目問啦!

 

 

麥明詩自爆拍過三次拖

同場的10優港姐麥明詩就自爆拍過三次拖,三次咁少當然冇人信,佢見狀即刻戴頭盔:「認真嘅係得三次呀,中六一次、大學一次、大學畢業之後一次。」佢話中五個陣要專心會考,所以冇拍拖。佢去到中六先有拍拖,但覺得係puppy love,因為當時唔係好知愛係咩。直到大學一次先真係叫初戀,其後第三次就係林作。咁幾時有第四次?麥明詩話:「尋覓緊啊!」

 

 

麥美恩 TVB龍躉王

不過講到呢晚最好笑,莫過於麥美恩(Mayanne),原本佢同陸浩明比賽度腰圍,但Mayanne自稱比選美時瘦,要求度坐圍,以洗脫選港姐時被封「龍躉村姑」的稱號。點知最終度到有35.5吋坐圍,6號聽完仲唔笑佢係「TVB龍躉王」!

 

低胸張秀文引死人

同場的另一爆點就係張秀文,佢呢晚以黑色低胸透視裝示人,酥胸半露非常性感!佢仲喺台上俾KOL林正峰搭着膞頭影相,妒忌死全港男士咩!

 

 

全文完