黃子華

黃子華為趕絕黃牛黨 最後一個棟篤笑加開9場

被港人譽為「子華神」嘅黃子華,呢期人氣爆燈,繼電影《棟篤特工》大收$4,000萬票房,仲宣布在7月6日至22日在紅館連開17場《金盆𠺘口》棟篤笑,子華仲話今次棟篤笑係佢係最後一次棟篤笑,仲講明「 不設巡迴,香港玩晒」,咁大家梗係撲飛啦!但係今日信用卡優先訂購,網民紛紛話打電話唔通,再唔係上網伺服器擠塞,未幾網上出現黃牛價炒賣,而又有人仲話內部方法去購買,子華得知後好鬼嬲,唔止拍片呼籲政府介入杜絕黃牛炒賣,原定舉行17場騷的子華,為打擊「黃牛飛」不惜捱眼瞓,決定加多9場,合共26場。

撰文:東方新地│圖片:黃子華fb


黃子華 七月開棟篤笑

相隔4年子華今年7月再開棟篤笑,真係狗年一大喜訊!今次《金盆𠺘口》棟篤笑票價,比2014年嘅《唔黐線 唔正常》上調不少,上次最貴飛都仲係$580,今次最貴就$880,其餘票價為$680、$480、$380、$280,唔少網民仍然準備撲飛!

而上月透過信用卡優先購票,即令fans瘋狂搶飛,一票難求!其後更加出現黃牛炒賣,而原定舉行17場騷的子華為了趕絕「黃牛」,決定加多9場,合共26場。負責賣飛的城市售票網今天宣布子華棟篤笑加場,逾十萬張門票於下周二(24號)公開發售,新增場次日期為7月23至31號,並限定每人只能購買4張門票。


黃子華
相隔4年,黃子華宣布今年7月開棟篤笑!

黃子華


貴唔緊要!作為fans好願意由正途去買門票,只係今日信用卡優先訂購,但fans話電話打唔通、網又塞死咗!但喺一票難求,未幾網上流傳有關代購嘅Whatsapp訊息,更出現炒賣門票。結果官方售票網AEG在facebook發聲明:「DBS信用卡『黃子華棟篤笑2018』優先訂票 特別聲明:有客戶向我們查詢,AEG是否曾有發出過購票相關Whatsapp訊息。AEG特此聲明所有Whatsapp短訊並非由本公司及職員發出,提醒消費者勿誤信不實資訊,小心受騙。」

黃子華
官方售票網AEG在facebook發聲明!

黃子華


黃子華在同事告知下,得悉有黃牛飛炒賣,到了晚上子華終於爆了,喺佢fb拍片話:「大家好,今日發生咗啲事,今日我收到個電話,係我嘅團隊打俾我,喊晒咁樣,我就醒起係喎,今日網上預售喎,係咪因為賣飛賣得唔係幾好呢?賣得唔好都唔使咁喊㗎,哦,原來唔係,係因為黃牛嘅問題。「好多人喺網上買唔到飛,咁係唔係因為黃牛呢?可以同大家講,亦都有好多好多人係買咗飛,只不過買咗飛嘅人唔會喺網上同大家講『我買咗飛喇』咁樣,但係買唔到飛嘅當然好唔開心,但係又係咪等於冇黃牛呢?係唔係嘅。「我個團隊點解喺到喊呀?係因為一朝早呢,電台呀,記者呀各方面都搵佢,話已經喺網上,根本呢一排都有,直情係有網站,啲人喺到賣黃牛,問埋佢,嗰啲人話『係有內部渠道』,各位、嗰啲話有飛嘅黃牛,我今日為止都冇飛,我個團隊都冇飛,佢哋已經有飛,因為佢哋有『內部嘅渠道』。「我覺得係咪應該報警呀?我一路有同我嘅團隊傾呢個問題,係咪應該報警或者報ICAC呢?內部竟然有飛,係點樣得嚟?個問題係我哋冇任何證據亦都冇任何線索可以去舉報。


黃子華
黃子華話嬲到連鬚都未剃都要拍片講!

黃牛炒賣 太過離譜

子華續說:「o依家黃牛最大問題就係,根據現有法例,唔係完全犯法,我喺度正式同政府提出,大家係咪時候正視呢樣嘢。好多時都有人覺得係奢侈品,好似iPhone咁,所以唔理你,但係到一個地步,當然演唱會唔係食飯咁重要,但好似每一次受歡迎嘅演唱會都係咁嘅時候,民間一個文娛活動,係咪應該要去正視下呢?「有啲人甚至講『係咪你呀黃子華?你自己又食又拎?一方面正式賣飛,另一方面黃牛又係你…』我喺網上睇到呢啲嘅評論,點解我團隊中有啲人會喊嘅其中一個原因,就係覺得好委屈,我第一次睇到我…其實呢個唔係第一個version嚟嘅,第一次睇到呢啲評論時,我想講嘅時候都有啲激動,係要冷靜返啲落嚟,各位,我冇咁嘅本事,而事實上我可以話俾你聽,我比任何人都覺得嬲,因為每一個表演者,我花咗咁多精神時間去準備呢一樣嘢,每日臨瞓之前我就諗緊嗰句嘢點講呢?未起身一擘大眼、半夢半醒又係諗緊嗰句嘢點講呢?我有句嘢我諗咗成個月都唔知應該係點樣講,大家都好辛苦去準備一個表演,然後就係一啲完全唔需要去付出嘅人,去賣一倍、兩倍、三四五六七倍嘅價錢,然後一啲好長期支持你嘅fans要去承受呢啲價錢,我一路都好接受世界係唔完美,但係咁係太過不完美,係太過離譜!


黃子華

呼籲政府係咪應該幫吓手

「所以一方面我呼籲政府係咪應該幫吓手,另一方面,我真係呼籲一啲嘅fans、一啲觀眾,我哋就唔好買(黃牛)囉!唔好買!唔緊要嘅。即係如果我做騷有一大段位、一大堆空,最前嗰啲空晒佢…如果我見到好多場都係咁,咁即係證明好多人可能冇買黃牛喎,可能咪做番一、兩場,補番俾呢啲觀眾囉,不過可能要出年。不過出年仍然有黃牛呢個問題吖嘛!所以呢個係杜絕唔到,當你個法例唔去改變嘅時候…但我都仍然呼籲大家盡量,唔好盡量,就唔買囉!我知道咁樣講又被人鬧,然後我團隊又會崩潰,點解…我哋只係做表演啫,點解會被人鬧?」

黃子華
黃子華七月開棟篤笑,講明只喺香港開,真係抵港人咁鍾意佢!

子華神金句錄

作為表演者,睇到黃牛炒賣而無法介入,難怪子華神咁嬲嘅!

雖然棟篤笑仲未有得睇,不過子華神的金句語錄相信廣大嘅粉絲都不介意睇完又睇嘅!

  • 「搵食啫!犯法呀?我想㗎!」
  • 「錯就要認,要對方認!」
  • 「損人不利己,不如跳井死!」
  • 「大自然所有嘅動物都喺食物鏈上面。鏈嘅下層俾鏈嘅上層吃,一層一層咁鏈上去。」
  • 「我覺得講得出『我好鍾意返工』呢句說話嘅人,一定係鬼上身。」

    ##embed-label-4##

  • 「香港嘅精神,就係『冇精神』。」
  • 「阿媽標仔參,邊個畀贖金?」
  • 「而家香港人生仔可以冇老婆,但唔可以冇菲傭。」
  • 「而家香港嘅問題,係所謂嘅婆媳糾紛,係一種必然瀨嘢嘅關係,係咪?除非你個新抱可以喺第一日入門,就全心全意同奶奶講:『奶奶,我愛你!』」
  • 「香港人而家打開報紙打開雜誌,就係睇緊《尋找X街的故事》。如果你起身就係要尋找一個X街,無人唔係X街,你只可以係未X街。但係你一定仆畀我睇。」

Image may contain: 1 person


  • 「化妝就係你落咗妝,我仲認得你,你落咗妝,我唔認得你,嗰啲叫做喬裝。」
  • 「女人撞衫,仲大件事過撞車。」
  • 「男人係愛情上係要求新鮮,而女人對愛情最大嘅要求就係保鮮。」
  • 「你愛嘅,你得唔到;你唔愛嘅,你甩唔到。」
  • 「一個男人點都會hurt過一兩個女人。但作為一個女人一世都未俾男人hurt過,咁就係真正嘅hurt啦!」

黃子華
黃子華七月開棟篤笑,相信又會掀撲飛熱潮!

  • 「若要人不知,唔好太低B。」
  • 「唔在乎你有冇俾人姦,只在乎你交唔交到單!」
  • 「比份糧你,一半係比你要嚟做嘢,另一半係比你要嚟受氣嘅。」
  • 「我係一個無雀嘅… 唔係,我係一隻無腳嘅雀仔……」
  • 「世事無絕對,只有無頭緒!」

黃子華
黃子華幾時先會拍劇呢?!

  • 「I am a man. You are a pen.」
  • 「你食魚翅,我食粉絲;你揸Benz,我坐Bus。」
  • 「一千幾百,猶如垃圾,富貴於我如浮雲… 但係浮雲於我如命根啊。」
  • 「樹要皮,但人… 唔一定要面。」
  • 「你好巴閉咩?我夠有3個C啦,CHEAP、CHEAPER、CHEAPERPER!」

黃子華七月開棟篤笑!
黃子華同DO姐當年嘅男親女愛,大受觀眾歡迎!