黃德斌:近年都係接出面工作 離無綫唔憂做!

今次邀請了黃德斌,大談在演藝圈無工開的日子如何逆流而上,及表白離巢娘家無綫的原因,而近日新婚的他,更罕有談及對感情及生B的看法!

撰文:東方新地|圖片:東方新地、黃德斌微博

黃德斌低潮期曾嘗試轉行

黃德斌做Model入行,初初兼職做,開始轉全職,因做咗一年開始覺得好似唔係好穩陣,從而轉行報讀藝訓班。訪問中,他表示:「無話要發明星夢,嗰時講生存咋嘛,邊好似依家咁講夢想、理想。嗰時個年代係,父母教落你唔讀書唔緊要,你有一技之長,喺社會搵到食就得㗎嘞!」

德斌就話當年由Model 轉做藝員的過程好簡單,即:「去電視台攞張form填,去考,跟住收你,咁㗎咋!而訓練班嘅老師淨係教你點演戲、演員道德係點」三言兩語透露當年轉行經過。

92、93年離開咗TVB 幾年,97年先返TVB,由畢業去到《真情》差不多十年先至攞到「越南」呢個角色,其後他與無綫簽約5年,德斌話:「完咗約之後就多謝你五年嚟嘅合作啦,唔再續約嘞,咁咪出去囉!」

黃德斌感謝金牌監製戚其義

他指:「嗰時咁啱電影低潮,都經歷過啲大片嘅,幕前唔夠嘢做,咪做埋幕後。無工開嘞,曾經想轉行,但係轉唔到,因為年紀又唔細嘞,都已經三十歲。」收入不夠過活下,他表示曾兼職過一段日子以求搵多個錢,不過德斌就話多得金牌監製戚其義,佢之後先入番無綫做。

只求做好角色 不求曝光

德斌再次離開無綫,他說:「依家嘅平台多咗,發展空間已經唔同咗,可以同多啲唔同嘅人合作,嘗試多啲唔同嘅嘢,我希望可以係咁。近呢幾年嘅工作,大部分都係出面嘅工作,而唔係TVB嘅工作,喺出面可能會同多啲唔同嘅人合作。」

離開 TVB之後的發展,他指要適應,要自負盈虧。至於北上是否目標之一,他則表示無特別要去北上,尤其是演員比較被動,任何地方他都想合作,還笑稱即使是印度有工作找他合作,他亦不介意!

對於電影《 逆流大叔 》叫好叫座,德斌指攝時無信心部戲會爆紅,坦言:「我由一開始接套戲個名叫《 萬水千山中男》睇個大綱,原來講幾個大叔嘅勵志故事,有意義,咁我一定要拍。都市小品唔係咁容易有投資者去拍,加上見到吳鎮宇,又有舞台王子潘燦良,最up and coming嘅胡子彤,我覺得呢個組合又幾特別,更加會去做!」

未有計劃生B?

講到同拍拖12、13年的女友結婚,他指自己無刻意低調結婚:「我唔會刻意去張揚,同埋最重要,佢係圈外人,我唔想佢變咗好似圈內人咁,然後可能好多嘢會寫佢,我唔想造成佢嘅壓力。」

至於生小朋友,德斌直言:「未有呢個計劃。因為我覺得結婚係兩個人嘅事,如果要有小朋友,我諗要有好嘅環境同條件,我先至考慮,我覺得依家未係。」

黃德斌 愛的宣言冧老婆

「雙喜臨門」的黃德斌,除咗有份擔演的小品電影《逆流大叔》票房衝破1,300萬事業旗開得勝,同拍拖十三年的圈外女友黃美恩 (Joyce) 感情亦開花結果,9月8日 在金鐘一間酒店舉行Cocktail Party註冊拉埋天窗。展開人生新一頁,黃德斌冇選擇大排筵席,只在酒店舉行簡單而隆重的婚宴,與一班至親好友慶祝人生大事,黃德斌愛的宣言亦簡單直接:「佢好了解我!婚前婚後大家都係互相欣賞,遷就,信任和尊重。」

拍劇致抑鬱

簡單幾句已經夠晒窩心,的而且確,同年輕十六年的黃太Joyce Wong (黃美恩) 患難見真情,兩人05年相識,當時黃德斌 拍完電視劇《金枝慾孽》,事業剛開始有起色,之後連拍多部劇集《火舞黃沙》、《珠光寶氣》等都擔演重要角色,受觀眾關注,不過,11年他就因連拍兩部角色沉重的電視劇《天與地》及《心戰》,長期要徘徊情緒低位,令他一度抑鬱不能自拔,幸當時得女友Joyce陪伴支持才得以振作。

右耳失聰

自細家境清貧的他,早年更試過耳朵入水發炎,因延誤求醫而導致右耳失聰。雖然人生多災多難,但黃德斌學會提醒自己要保持正能量,除了遺傳自母親的堅毅精神,亦多得女友的樂天性格影響。

湊B出巡

婚後黃德斌已火速復工,為《逆流大叔》謝票,新婚的他被問到可有努力造人,型佬黃德斌幽默表示:「唔話你知,呢啲咁私人嘅問題,得喇!總之我會保重身體!」不過,早於三年前,黃德斌同女友的身邊就經常出現一個神秘B仔,兩人一得閒就孖住湊B,雖然黃德斌已經否認是B仔老竇,表示是幫朋友湊B。

讀者留言