黃德斌

黃德斌 張耀揚踩車行大運 跪地求神

趁住新年流流,人人都神心拜神,祈求新年得神保佑又順手攝番個太歲,勢估唔到,信眾好運由行到入廟一刻已經開始,竟然有得一次過野生捕獲黃德斌、林國斌、張耀揚三個型佬去拜神。加埋都成165歲,年初四(2月19日)山長水遠踩車踩到入粉嶺雲泉仙館手持巨香拜神,有氣有力亦都有心,一定心想事成!

撰文:東方新地

圖片:新傳媒圖片庫

黃德斌 張耀揚 林國斌 猛男出征

年過半百,仲可以有相同興趣,揀番個好日,放低女友家人聚一聚,又踩轉車行番個大運,呢啲咪就係男人的浪漫囉!年初四(2月19日),黃德斌、林國斌、張耀揚全身專業級踩車裝備、聯同兩位年紀相若老友,由九龍踩到入粉嶺、由早上踩到太陽落山,終於到達目的地雲泉仙館。

黃德斌
事實證明男人唔keep好易老,梗係平時踩車踩得多,54歲黃德斌身形拍得住當年全盛時期。
林國斌 黃德斌
年紀最長的林國斌今年9月將滿58歲,60歲都嚟緊一樣fit到漏,拜完神出車仲一馬當先為車隊帶頭。
張耀揚 黃德斌
「烏鴉」張耀揚出道 32年,32年如一日,fit得嚟仲渾身霸氣,在仙館內最多fans要求合照。

猛男上香

新年流流,館內人頭湧湧,不少師奶信眾見到三位單車褲猛男都興奮莫名要求合照,三位亦來者不拒心情靚到一個點。

張耀揚 黃德斌 林國斌
年初四,三位型佬車友張耀揚、黃德斌、林國斌全副武裝約埋踩車,再山長水遠踩到入粉嶺雲泉仙館拜神。
黃德斌
黃德斌等五個大男人出車前在仙館門前巨型福祿壽大合照。

三缺一唔見啟華

一行五人由廟外拜到廟內,入埋香油錢亦都買埋巨型香燭,一字排開跪地神心拜拜後,便坐在大殿內吹水回氣,一吹就係半粒鐘。眼見太陽就快落山,吹水先告一段落,三位連同友人齊齊站在中庭巨型福祿壽像前影番張大合照打卡先。

張耀揚 黃德斌
入大殿上香,最虔誠就係張耀揚,將巨香舉過額頭再口噏噏跪在地墊上數分鐘,祈求來年順利。
黃德斌
黃德斌、張耀揚同林國斌三位入廟各自添完香油錢,又買香燭衣紙跟足指示上完香再燒衣紙,做足全套。
黃德斌
拜完神黃德斌等一行人出車經原路從粉嶺踩出九龍,貼住車路邊踩,好守馬路規則。

黃德斌組星級車隊

其實呢隊星級型佬單車隊陣容又點止黃德斌、張耀揚同林德斌?仲有林韋辰、何啟南,以及中堅分子吳啟華。平時踩勻港九新界、又帶隊踩到去澳門、台灣,不過今個新年吳啟華就去咗美加登台,搵真銀緊要!

黃德斌
星級車隊成員除咗黃德斌、林國斌同張耀揚外,仲有吳啟華同何啟南,不過今個新年吳啟華就飛咗去美加登台搵真銀。
黃德斌
全盛時期嘅黃德斌,同依家一樣咁fit。

關鍵詞
黃德斌