落選港姐工藤佑采 黑面跳舞!師姐黃心穎都唔撐…
《2018香港小姐競選決賽》當晚,(9)工藤佑采喺才藝表演環節,拉小提琴拉到劏雞咁,加上表現一般,無緣晉級十二強,不過大會安排一班落選佳麗再次出場跳舞,呢位落選佳麗黑面表演都引起話題!對此,港姐出身嘅黃心穎唔撐對方,直言應該好好把握幕前表現機會至啱!
撰文:東方新地|圖片:東方新地、無綫電視截圖
黃心穎 回應工藤佑采黑面
黃心穎日前出席無綫新劇《牛下女高音》飯局,港姐出身嘅佢被傳媒問到今屆落選佳麗工藤佑采,在無緣入十二強後,多次黑面出場跳舞!心穎直言呢件事上覺得對方表現不恰當,佢話選美過程的確辛苦,想當年心穎選美時每隔兩天都要應付不同項目。
問到覺唔覺得落選後,要佳麗做布景板好慘?心穎話唔覺得,因為當年是最後十強才能在決賽出現,如今20強都可以出場已經很好,何況辛苦多時,當然要在台上展現自己最好的一面,留下美好回憶才對!
心穎又透露《牛下女高音》煞科後,會放假至10月中,她說要多留時間執拾屋企,又說男友馬國明開始放大假,她希望二人多啲時間一起,又表示會一齊去旅行!
港姐決賽淘汰佳麗工藤佑采
《2018香港小姐競選決賽》三甲終於出爐,不過,今次就梗係唔係同大家講三甲嘅事啦!皆因落選港姐9號嘅工藤佑采實在太搶鏡,非常之值得一提!昨晚,20位佳麗分兩組進行才藝表演,而喺第二組嘅才藝表演中,工藤佑采嘅小提琴表演認真令各位觀眾非常眼前一亮!
表演完劏雞嘅琴技後,工藤佑采都可能自知不妙,眉頭一皺。
落選佳麗要再出場跳舞
其後,港姐12強誕生,大熱幾乎全部晉級,而工藤佑彩就無緣晉身。大會之後安排一眾佳麗以泳裝現身問答環節,而八位落選佳麗則要再出場跳舞,淪為dancers。
不過,唔知係咪同已出局同心情有所影響有關,未能晉身嘅八位佳麗皆表現牽強,跳到甩哂Beat!
工藤佑彩出局後跳舞黑面神上身
相信心情最大影響嘅就係工藤佑彩,未知係咪因才藝表演失準,未能順利晉級而心情勁唔靚,出場跳舞時佢一直黑面兼零笑容,個樣望落嬲爆爆咁。