《東張》主持黎寬怡訪問爆喊搶鏡 獲張衞健暖心安慰!

《大帥哥》成為2018年9點半劇集收視冠軍,早前張衞健(Dicky)出席劇集祝捷會時就出現一段小插曲,就係《東張西望》女主持黎寬怡(Kitty)訪問劇中演員時,突然爆喊!事後仲被網友指Kitty為博出位先喊,究竟發生咩事呢?

撰文:東方新地|圖片:電視截圖、黎寬怡instagram

《東張》主持黎寬怡訪問爆喊搶鏡

早前,張衞健、洪永城、蔡思貝和楊秀惠等出席劇集祝捷會時接受《東張西望》訪問,點知訪問期間女主持黎寬怡突然眼泛淚光,Dicky見狀隨即忍不住問:「我見你眼泛淚光,咩事呀?」,引嚟前輩關心問候。

之後,女主播Kitty就解釋:「我笑到標咗眼淚但又唔好思意收返入去。」,張衛健指佩服對方啲眼淚收唔到:「我要跟你學嘢咁喎」。

張衞健暖心安慰

點知鏡頭一轉,Kitty似乎喊得更勁,但不忘本份繼續進行訪問,而Dicky就意識到對方係真喊,結果不停安慰對方:「沒事的,你做得好好呀!沒事。」,而Kitty心情仍未能平伏!

其實Kitty事後都有喺自己IG分享感受,留言指:「除咗因爲嚇親以上幾位嘉賓,亦為呢場不夠專業嘅訪問向各位講聲唔好意思,另外,感謝張大哥的體諒同安慰。」

之後再接受傳媒訪問,Kitty就表示自己嗰時好緊張,因為可以同自己偶像張衞健做訪問。Kitty續指自己嗰句「我笑到標咗眼淚但又唔好思意收返入去。」其實係自己講錯嘢,先會令情緒激動啲。

事後唔少人都好想知呢位女主播係邊位,其實黎寬怡(Kitty)係第29期無綫電視藝員訓練班學員,綽號「貓仔」,係啱啱畢業嘅新人!

據知,Kitty訓練班畢業後,曾喺唔少劇集做過「跑龍套」,係近呢幾個月先加入《東張西望》做主播,之前都有試過採訪其他藝人。

然而,擁有171cm身高Model身形嘅Kitty當初投選訓練班嘅原因,係因為夢想係做一個喺電視出鏡嘅藝人,不過今次事件後,睇嚟佢要訓練一下自己嘅情緒,唔好咁易喊!

延伸閱讀:

張衞健 珍惜與家人時間

「大帥哥」張衞健係一個重情義嘅人,佢一向都非常愛護家人。眾所周知,張衞健十分疼錫老婆張茜,但其實佢都好愛錫八旬母親。呢日,張衛健就上載兩張同媽媽玩波子棋嘅相片,相中媽媽好專注咁捉棋,而佢就耐心地等媽咪慢慢諗,佢仲話同媽媽捉棋次次都輸!

不過,其實張衞健一啲都唔介意輸贏,因為捉棋可以鍛鍊媽媽腦筋,亦都可以多陪老人家,佢喺社文網站留言指,「陪我媽下棋,十局有十局都是我輸的,因為她老人家的步法是亂走的,不過重點是想她多動動腦筋。這就是大帥哥背後的簡單生活。」唔少網民見到呢個情境,都大讚張衞健十分孝順同好乖仔,仲展現出鐵漢柔情嘅一面!

陪伴是最重要

除此之外,孝順仔張衞健早前帶媽媽到花卉巿場買花,返到家仲陪她插花,更留言指:「我認為對於老人,我們的陪伴是最重要的。」自13年媽媽游水遇溺危殆,身體機能一直下滑,張衞健比已前更珍惜同媽媽相處嘅時光,平日佢一有時間,都會陪媽媽做佢喜歡嘅事,如游泳、食飯等。

《大帥哥》張衞健狂爆金句

近日無綫熱播的劇集《大帥哥》,久違的張衞健甫出場已非常吸睛,集集精警對白連珠炮發,令觀眾再三回味。不少本來少看電視的觀眾,近日都因為張衞健而追看劇集!

張衞健預告收山

劇集快到結局篇,日前從北京宣傳返港的張衞健,就向本刊獨家透露已有收山計劃,《大帥哥》竟將成告別作!《大帥哥》反應雖好,但張衞健拒絕添食:「唔會!下次唔知幾時再拍!」更放下平日搞笑本色嚴肅地說:「唔會再拍嘞!唔止香港,其他地方都係唔會再拍!」

「再拍會死好多腦細胞!」

另外問到是否很多對白都是由他想出來,張衞健謙稱:「係team work,編劇兄弟姊妹做咗好多嘢,不過你話冇我自己嘅嘢就假嘅。(幾乎每集都有你嘅嘢?) 係場場都有,其實幾十年嚟都係咁,所以我咪話唔知幾時會再拍,再拍會死好多腦細胞!」

大讚蔡思貝有進步

張衞健又大讚同劇的蔡思貝:「佢進步咗好多!呢個唔係我講嘅,因為我原先唔識佢,拍劇初期佢好Nice咁叫我『你好呀大帥哥,我係蔡思貝!』好遺憾之前未有睇過佢嘅作品,但我聽啲工作人員講,佢拍呢套劇係進步咗好多,我都好欣賞可以同呢班咁好嘅年輕演員合作。」

主題曲倡大無畏精神

今次張衞健再唱主題曲,令大家回憶返晒嚟!他表示:「首歌叫〈大無畏〉係有原因,成日睇到有人自殺,我都幾唔開心,我做唔到啲咩嘢,但作為一個演員,喺呢個社會上,希望畀到啲正能量出嚟!雖然情歌會容易啲Hit,但呢隻主題曲我要大無畏精神,我覺得每個人都應該有大無畏精神,希望娛樂之外,可以畀啲鼓勵大家。」

明白要愛得及時

近年大班香港藝人北上狂賺人仔,反而最早在內地爆紅的張衞健開始減慢工作步伐,幾年前經歷生死啟悟人生,令他明白要愛得及時,亦因此萌起收山念頭。據知情者透露:「13年中佢媽媽游水遇溺,一度停咗心跳,好彩Dicky及時搵到名醫幫佢媽媽用冷凍治療搶救,張媽媽奇蹟康復,令佢更珍惜時間去陪媽咪。」

太太曾兩度流產

「不久後張茜有咗BB,本來一家人好喜悅,點知太太陀B七個月嗰陣,卻突然流產。其實08年太太已經試過陀住八個月B流產,呢種傷痛無法形容,嗰次對兩公婆打擊更大,兩公婆靠信仰同互相扶持先走出陰霾。到今年年頭胞弟Henry倒斃家中,更加令佢明白到人生最快樂唔係賺幾多錢,最重要係一家人齊齊整整。所以佢決定放下工作,留更多時間去陪太太同媽咪!」

愛妻號磚頭贈太太

張衞健與張茜風雨同路19年,兩人99年因拍《陳夢吉傳奇》定情,04年秘密註冊結婚,09年張衞健更安排在菲律賓大搞夢幻婚禮,給張茜打造一生難忘回憶!紅遍中港台的他,賺到盤滿缽滿,先後送贈三個嘉亨灣物業以及5千呎北京豪宅給張茜。早前還留言冧妻:「等我忙完這一輪的工作,我會陪你度過 一個又一個的日落日出!」

北京5千呎豪宅

經歷過生死 落力傳揚大愛

經歷過生死,對人生及未來看法一致,張氏夫婦同是虔誠天主教徒,近年張衞健就不時出席分享會傳揚大愛。據知情者透露:「小產令佢同太太跌落人生谷底,係信仰令佢哋排除萬難,佢希望分享自己嘅經歷去鼓勵別人,依家只要有時間佢都會陪媽咪同埋太太返聖堂,收山之後,佢可以有更多時間去傳道、講見證,幫助有需要嘅人!」

報答伯樂曾勵珍

對上一次拍劇已經係14年初拍內地劇《神醫傳奇》,直至上年TVB 50周年,伯樂曾勵珍三顧草廬邀張衞健回巢拍《大帥哥》,最終誠意打動他出山。據知拍TVB劇出名辛苦,酬勞與外間沒法比,張衞健答應回巢是覺得珍姐好有誠意,事事配合。珍姐更明言想張衞健幫無綫50周年台慶造勢,加上他都好想再拍一部有質素的廣東話劇,於是決定接拍,今次亦可算是完成使命!

拍劇筋疲力竭

雖然套劇拍完一年多先播,最終還失落台慶黃金檔期,不過張衞健依然瞓身為劇集宣傳。據知情者透露:「接咗呢套劇之後,向來要求高的Dicky壓力好大,佢唔止演好自己嘅角色,仲會參與度橋,每集好多密集式金句,全部都係佢精心度出嚟。加上要同班演員有互動,Dicky連對手啲戲都設計埋,佢好提攜後輩,所以同佢合作嘅演員個個都拍得好開心,喺佢身上又學到嘢!不過體力同腦力都挑戰極限,拍完套劇真係筋疲力竭!」

永遠心中視帝

劇集播出以來,一直好評如潮,連同跟他合作的多位演員演技及人氣亦升呢,同劇拍檔蔡思貝、楊秀惠及洪永城都開口推他為永遠的心中視帝,可見除了有演 技,張衞健待人真誠態度亦贏盡人心!

畀面撐拍檔

張衞健曾更表示今次拍《大帥哥》,是奉獻最好的張衞健,對得住觀眾,亦對得住自己。他坦言:「我最希望觀眾睇到每個演員嘅進步,當然我咁多年都冇攞過獎,有獎當然開心,不過聽到好多朋友話要趕住返屋企睇電視,對我嚟講,營造到呢個氣氛,又可以攞到觀眾嘅心,呢啲先最開心!」出山作變告別作,觀眾想睇張衞健演出真係要把握時間,30集 《大帥哥》已經所剩無幾!唔睇等幾時?!

讀者留言