黎明

愚人節幫警方拍片教防騙!黎明:你當我係懵仔魚?

今日係4月1日愚人節,唔少朋友都會同身邊人開玩笑,而香港警方今日亦在Facebook發布宣傳片段,提醒市民小心騙案,片中更有金句王黎明演出!

原文:新假期|編輯:東方新地|圖片:香港警察 Hong Kong Police黎明Facebook

「黎明」喺內地畀富婆操控

「我係黎明,我喺內地畀富婆操控,逼我拍劇,唔該你用網上過數嘅方法畀我,當係贖金,畀我脫身返嚟香港參加金像獎。」片段講述一名女子收到自稱係黎明的錄音,指自己於內地被富婆操控,要求女子過數贖佢回港參加金像獎。真係咁都得?

黎明
香港警方FB專頁上載與歌手黎明合作拍攝的短片「 愚人節 x 明福俠」

贖金救黎明返香港參加金像獎

女子聽到錄音起初唔相信,但再聽深信不疑,認定係「黎明」把聲,於是轉帳,點知過數後對方隨即封鎖對話,所謂「黎明」只是騙徒扮聲去呃錢。

唔知要幾多錢先贖到黎明呢?

女子初時當然唔相信。
但聽多幾次,把聲好似真係黎明喎……

肥仔騙徒現身

「黎明」真身其實只係一個肥仔騙徒,錄音結尾佢仲講到返嚟攞咗金像獎及獎金後,都可以送晒俾你。聽落幾吸引喎!

女子最後真係信咗,之後……
「過咗數, Block得!」
……

黎明自嘲:「我邊會拎到金像獎呀?」

片尾黎天王終於出場!原來佢成為騙徒下一個目標,聽到假扮自己的錄音時,直言「真係當我慒仔魚呀?」之後又發揮金句王本色自嘲一番:「我邊會拎到金像獎呀?」佢呼籲「如果懷疑自己做咗懵仔魚嘅」,要致電防騙易熱線「18222」。

黎天王出場⋯
黎天王又爆金句!

防騙易熱線「18222」

警方指,反詐騙協調中心在過去的18個月,已成功攔截受騙的金額高達17億港幣。如黎明所呼籲,「如果懷疑自己做咗慒仔魚嘅」,要致電防騙易熱線「18222」!

香港警務處反詐騙協調中心「防騙易18222」熱線

睇片:

精采重溫:黎明出任香港年金大使

黎明自榮升老竇後,專心湊女,最近他成為了香港年金大使,並為推廣退休年金計劃而「復出」拍廣告。久未露面的Leon終於有新搞作,喬妝做老人家,同一班老友記玩遊戲兼傾下偈,重點係大家都唔發覺原來天王在身邊!

黎明以香港年金大使出席「終身年金」活動,是至今年4月升呢做老竇後首次公開露面,當被問到會否影全家福,Leon就表示自己自幼父母離異,亦無拍過全家福,但很享受一家人相處的時光,會去尋找和珍惜。之後Leon仲大爆「金句」:「退休就是花錢的遊戲」,令全場大笑。

黎明新搞作化身老友記

去年,黎明為推廣退休年金計劃而「復出」拍宣傳短片,仲同老友記一同玩遊戲兼傾下偈,從中了解多啲老人家的諗法。為此,Leon特地喬妝成老人,以便融入一班老人家。

黎明
黎明喬妝成老人。
黎明
目的係要融入一班老人家!
黎明
當黎明化好哂妝行去同其他老人家一會合,一班醒目的老友記一見到化老妝後的Leon就覺得熟口熟面,仲不停望住Leon。
黎明
而任低咗的黎明起初表現尷尬,擔心會被老友記睇穿,但為成功蒙混過關,唯有用語言藝術,率先打破僵局!
黎明
點知有位老友記話:「你個樣好似四大天王入面嗰個!」聽到呢句,黎明心都跳出嚟!
黎明
黎明為咗令一眾老友記唔懷疑佢真正身份,結果逼住keep住用老聲說話兼要作不同故事,當中包括後生做賣海鮮,仲話有好多師奶搵佢買海鮮!

黎明喬妝成功

當玩完遊戲後,Leon終於落妝以真面目面對各位在場老友記,一班老友記見到黎天王真人感到十分驚喜,仲同Leon講:「頭先有個好似㗎喎!」

拍攝完畢後,Leon似乎都有好深刻的體會,除上載分享整個廣告及分享與老友記相處的片段,更留言分享自己的感受,寫道:「每個人都有機會經歷人生不同階段,當你未經歷過時你可能會輕視取笑,人生如場球賽,當你經歷了上半場後……下半場可能會更能明白了解。趁未完場前希望大家可多給關心及尊敬予身邊的人。」

黎明
身為四大天王之一的黎天王毫無架子,除咗親民同一班老友記握手,仲同佢哋合照留念,個個都開心笑到見牙唔見眼。

 

有唔少網民睇完段片後,都不禁留言大讚Leon好有正能量同善心,仲話「香港勝在有黎明」睇嚟黎天王好受一眾廣大市民歡迎!

宣傳短片:

黎明 – 香港年金計劃 「退優人生」真人Show

每個人都有機會經歷人生不同階段,當你未經歷過時你可能會輕視取笑,人生如場球賽,當你經歷了上半場後……下半場可能會更能明白了解。趁未完場前希望大家可多給關心及尊敬予身邊的人。

Posted by 黎明 Leon Lai on Thursday, 5 July 2018

細數黎明10大好人好事

 

1.愛屋及烏助流浪犬

Leon前妻樂基兒出名係愛動物之人,而Leon亦愛屋及烏,除了買狗送Gaile,更主動向有關機構捐六位數幫助流浪犬,認真闊佬!

黎明
黎明對前妻Gaile好好,知佢愛狗狗唔止買畀佢,仲捐錢到動物慈善機構㖭!

2.對前妻樂基好體貼

Leon愛妻有加,雖然平日已經忙開工拍戲又四處飛,但一唔使開工嘅日子就陪Gaile去旅行,知道太太愛運動愛滑雪,Leon又會陪佢去。其實黎明好喜歡留喺屋企,因為係私人地方有私隱唔怕被偷拍,但怕Gaile會悶,所以都畀Gaile啲朋友入佢屋企開P!

3.堪稱圈中最好老闆 豪包助手婚宴酒席及首期

除了對太太很好,黎明對共事的同事也好到加零一!係真㗎!跟隨黎明身邊廿年的助手,當年係黎明中學同學,助手本身家貧,工作又不如意,適逢黎明入行,聘請他做助手,薪金亦不俗,二人相知相交,到助手大婚,Leon送了份厚禮,就是一張無銀碼的支票!講明任助手自己填,他早已視助手係兄弟!結果有傳助手唔好意思填,最後Leon包起他婚宴所有使費!咁都未算豪,Leon之後再送錢俾助手置業築愛巢,咁好老闆去邊到搵?

無分彼此,先讓助手上車呢個情境已經見慣!
無分彼此,先讓助手上車呢個情境已經見慣!

4.七位數醫助手

有位助手跟Leon工作期間,突然患重病,Leon得知後即叫對方放長假休養,更自掏腰包七位數助對方醫病,可見Leon有幾咁仗義疏財,可惜其前助手最終不敵病魔離世。

之前曾有報道指有位自稱曾係李嘉欣助手及為黎明工作嘅女士Queenie,指22年前跟黎明到北京工作點知期間突然小產,幸得黎明出錢出力幫手先逃過死門關!事隔多年對方想向大恩人黎明表達謝意,而黎明續拋金句回應:「害過人嘅嘢一定記得,幫過人嘅嘢唔會記得,但一定冇害過人,所以我唔記得。」

Leon除了對助手豪氣之外,對公司同事亦十分重情重義,曾有同事因出現經濟困難,Leon即自掏腰包六位數幫對方度過難關。

5.胸襟廣闊 EQ超高有承擔

黎明2016年在中環海濱活動空間舉行入行30周年的《Random Love Songs 4D in Live 2016》演唱會,為了這次演唱會亦投放了不少心機,可惜就在開騷前1個半小時因未符消防安全規定,而宣布取消。黎明親自到場外道歉,又拍片放在facebook表示:「今日演唱會要取消,原因是食環署不批準,因為消防條例說我們的黑色與藍色布料……雖然是防火料,但不是經過認可規定,我們會盡快去解決善後工作,有機會可以改變或扭轉方法,我們會盡量去嘗試,請排隊的朋友返屋企,為大家帶來這麼多不方便的地方……我只能講……對唔住!萬二分對唔住。」由短片所見,黎明的樣子真是好愁好down,但全港一致力讚Leon為人有承擔!

 

除此之外,從前有一職員K跟隨Leon多年,出名是Leon團隊中的笑柄,撞板多過食飯,有次Leon到電視台錄影慈善節目,要唱改編歌詞的歌,叫阿K舉大字布以防錯漏,點知大字布係有,但成張倒轉咗,任由Leon台上打眼色,阿K都無動於衷,事後黎明不但無鬧爆佢,只係笑笑就算。

另有次Leon胃部唔舒服,叫阿K幫手買消化餅,阿K一去就幾粒鐘,返到嚟帶嘅竟然係「麥維他消化餅」,令人哭笑不得!雖然唔少高層都睇唔過眼,叫Leon炒阿K魷魚,但Leon不但冇炒阿K,反而依然對阿K十分好!

延伸閱讀:黎明新金句合集

6.冇架子

熱愛摸酒杯底嘅Leon酒量當然有番咁上下,平時食飯應酬少不免會跟不同人敬酒,Leon從不隊冧人,見同事或朋友唔飲得,仲會主動幫手頂酒,所以唔少同事都極之喜歡同Leon食飯,除了佢全冇老闆架子,仲肯為大家着想呢!

7. 愛低調行善 助乞丐解困

Leon無論從前或現在都為唔少慈善機構服務,除咗眾所周知的公益金和Unicef,平時Leon都暗做善事。有次Leon跟助手出街,途中見街邊有一乞丐,Leon頓生惻隱之心,即叫助手有幾多錢俾幾多,之後還番俾助手,乞丐收到後連聲向Leon道謝!

8.出名萬歲王 唔係姑寒財主

Leon未紅前,有次出席《勁歌金曲》節目後,拉大隊帶唱片公司同事到當年貴價食堂友和日本料理度開餐,大部分人見到餐牌價錢後個心都離一離,打算叫碗拉麵或小食就算,怎料轉頭侍應送來一枱的天婦羅、刺身和鮑魚等,嚇到個個滴晒汗,最後黎明偷偷將那張近五千元的賬單找數,喺當時嚟講絕對係大數目!

9· 為鄰居蝕賣500萬跑車

Leon熱愛超跑,曾以500萬買入至愛法拉利458 Italia超級跑車,但為了鄰居小朋友,愛車落地兩年後竟割愛蝕讓,事關每次佢開動戰車時,引擎聲發出嘅隆隆聲都嚇親隔籬屋小女孩,Leon知道後唔單止送果籃道歉,仲割愛蝕賣戰車,真係好有愛心呀!

10·禮物贈清潔嬸嬸

Leon平時收到好多fans禮物,例如花、果籃、糖果或其他食物等,Leon又不想浪費,於是會將這些禮物贈與清潔嬸嬸!而喺之前無數次演唱會中,Leon亦收到好多fans送嘅禮物,為了環保於是又將後台禮物分派俾其他人,一於大家開心!