黎明傳已喜得千金 前妻 圈中人齊送祝福

51歲黎明上月在Facebook宣布喜訊,承認與32歲、同樣離過婚的女助手阿Wing交往,而且女方已懷孕!昨日有報道指阿Wing早產一個月,並已為黎明誕下B女,因為早產關係,所以比較輕,得五磅左右。如今黎明女兒出世,四大天王齊齊變做「父王」!而黎明前妻樂基兒及曾與阿Wing傳緋聞的李治廷等人得悉此消息後,亦同時陸續送上祝福!

撰文:東方新地|圖片:新傳媒圖片庫

51歲黎明做爸爸!

昨日有報道指黎明正式榮升爸爸!據悉阿Wing早產一個月誕下B女,母女平安,真係可喜可賀!不過由於係早產的關係,所以B女比較輕,只有五磅左右。

前妻樂基兒大方送上祝福

雖然據報道指51歲黎明已經升呢做老竇,但佢仍然未有更新網誌,向外正式公布任何消息。另外,黎明前妻樂基兒在接受訪問時,就大方表示透過WhatsApp向前夫送上祝福:「Congratulations and Happy For Them。」

樂基兒隔空送蛋糕?

另外,樂基兒就喺社交網上載一張朱古力蛋糕嘅相,並留言指個蛋糕係自家出品,外界即時猜想是否樂基兒有心整餅隔空送俾黎明,用作祝賀佢榮升老竇?

李治廷稱b女做「小公主」

另外,昔日為黎明旗下藝人,以及曾與阿Wing傳過緋聞的李治廷,得知黎明做老竇嘅消息後亦有祝賀黎明,以「小公主」稱呼黎明個B女:「Congratulations to Leon and Wing! 恭喜小公主的來臨!」

大把人等住慶黎明

而據悉黎明好友雷頌德對於黎明b女係咪已經出咗世,佢就笑住回應:「若果老友嘅BB真係早產,都唔得閒覆我啦!所以我真係唔知。」另外,文詠珊(Janice Man)都有祝福前老闆黎明,祝BB女快高長大!

黎明女助手新寵曝光

一個多月前,外界都一直以為黎明未走出情傷,但其實他去年已有著落,與其唱片公司AMusic的女助手阿Wing過從甚密!獲黎明寵幸的阿Wing進駐上水雙魚河St.Andrews Place的6千呎獨立屋,又在AMusic任營業部經理,可以話係打晒骰。成為天王新寵不特止,阿Wing更狗年報喜將榮升人母,現時陀B六個月!

黎明新寵阿Wing 陀B出巡

這段養胎日子,阿Wing繼續自由出入黎宅,早前本刊拍得黎明由司機接載離開寓所工作,之後阿Wing獨自駕車外出,直駛沙田「Homesquare」,該處集中售賣家具及家品。現場所見,阿Wing當日身穿白色薄羽絨內襯黑色連身短裙,下車後清楚可見佢腹部已明顯隆起,目測已懷孕六個月以上,不過佢未有水腫,而且健步如飛。

睇中七人車

據知阿Wing已為生B作好準備,早前把頭髮剪短,以免搶去BB營養,看她精神不錯,腳骨力特好,行足幾個鐘頭街都未見要休息。入到商場,阿Wing第一時間行到車行,望住門口陳列價值約35萬的七人車「Noah」,佢睇得入神更用手機影低,車行經紀見佢一身名牌似足闊太,即落足嘴頭力Sell,除殷勤招呼上車試坐,又埋枱傾價錢同細節。

之後阿Wing拎住新車資料離開,還邊行邊研究。據知呢款車與黎明得力助手子泉駕駛的七人車同款,阿Wing為方便產後與B外出,亦想把現時駕駛的福士小房車換成七人車,與子泉睇齊。

再睇BB床

其後阿Wing再折返商場逛嬰兒家具店,主攻日本品牌的BB床及被具,見佢細心研究每張床的資料,最後睇中一張可延伸長度及與大人床拼接的BB 床,不過佢未有落訂購買,並向售貨員表示要與家人商量後先決定。

讀者留言