2018港姐決賽

【2018港姐決賽】初做港姐司儀感觸發文 馮盈盈:真係死而無憾!

昨晚,2018港姐決賽正式圓滿落幕!今屆港姐司儀組合與往年有少少變化,雖然冇咗鐵腳曾志偉,但今年就有Do姐領軍!而第一次擔任港姐司儀的麥明詩及馮盈盈更令全晚爆出其中一個高潮外,盈盈更於個人社交網發文抒發做司儀心聲,同時獲唔少網民大讚其司儀表現!

撰文:東方新地|圖片:東方新地、Instagram

港姐決賽嘉賓司儀齊搶鏡

今年嘅港姐決賽嘅司儀組合與往年有啲變化,雖然冇咗鐵腳曾志偉,但今屆就有Do姐領軍,帶住農夫二人、陸浩明、麥明詩等人做司儀,陣容夠哂人強馬壯!一眾司儀當然唔少得落足心機裝扮到靚一靚,華麗出席當晚盛事啦!Do姐以黑色蕾絲邊deep V 嘅晚裝示人,令企喺正中間嘅Do姐更加亮眼!

2018港姐決賽

2018港姐決賽

兩位港姐冠軍麥明詩同馮盈盈以師姐身份首次做港姐司儀,雖然二人司儀經驗尚淺,但麥明詩事前就表示自己唔太緊張,因為佢哋只係負責補充,主要都係負責問答環節。

至於問到馮盈盈驚唔驚講錯嘢,一向言行大膽嘅佢就指呢個世界冇話講唔講錯,反而認為就算講錯都可能係個機會去畀大家補救,係一個表現嘅機會。隨後,麥明詩仲笑言佢兩個最叻就係講錯嘢。

麥明詩被Do姐窒到口啞啞

講到泳裝問答環節,麥明詩與馮盈盈負責其中一個問答環節,並配合Dodo姐。當11號李明芙(Samantha)出場時,麥明詩負責問問題,問及關於公平的問題:「香港小姐得女仔可以參加會唔會唔公平?」起初Samantha都答到問題。

但其後麥明詩追問:「如果邊個佳麗當選咗你會覺得唔公平?」Samantha開始支吾以對,流露出尷尬嘅神情。Dodo姐見到Samantha面有難色,梗係馬上化解指:「唔洗逼住揀一個㗎。唔一定唔公平㗎嘛。」

點知麥明詩好似唔知Do姐係喺度俾落台階Samantha,反而向Do姐講:「Dodo姐咁nice嘅,我覺得好唔公平呀!我之前參選都冇咁樣…」隨即Do姐話麥明詩:「仲想點呀!你係香港小姐嚟㗎嘛!」結果窒到麥明詩只識得尷尬笑,但就令全場歡呼!

馮盈盈感觸發文

而喺噚晚,馮盈盈就喺個人社交網發長文,表述自己人生第一次做港姐司儀嘅感受,提到自己由參選港姐到卸任,再有幸成為港姐司儀之一,感覺一切好神奇。當中亦提及當晚一啲有趣嘅互動掀起咗全晚其中一個高潮,唔知係咪想講麥明詩被Do姐窒一事呢?

其後,佢更開名感謝一個人,就係高貴又有急才嘅鄭裕玲,多謝Do姐在台前不斷為佢哋打圓場同主持大局 ,亦感謝各位前輩司儀的帶領和台前幕後嘅努力!

盈盈臨尾tag住「以為問人問題好簡單 原來殊不容易 我寧願自己答番 雖然中間火花四濺  但總算製造到氣氛  希望你地(哋)睇得開心 我地(哋)就真係死而無憾」講到咁肉緊,睇得出佢真係好重視今次嘅司儀工作!

其實,去年盈盈有份主持《勁歌金曲頒獎典禮2017》,當時佢就自認講嘢太MK,又被批評食螺絲。不過,今次盈盈就獲得網民唔少嘅好評,大讚佢做港姐司儀做得好,仲叫佢繼續努力!睇嚟係有明顯進步喎!

亞軍20號鄧卓殷

現年23歲的20號鄧卓殷(Amber)除了奪得亞軍,仲攞埋最上鏡小姐,成雙料港姐。Amber畢業於港大建築系,現職是是一名見習建築師。在學期間,她曾在由亞洲權威雜誌Perspective舉辦嘅年度設計頒獎盛事A&D TROPHY AWARD獲獎,同時學咗十幾年中國舞,真係才貌雙全。

決賽當晚,從小習舞的Amber表演強項中國舞,難怪獲田蕊妮、朱千雪及蔡思貝等星級評判激讚。

鄧卓殷

Amber笑容甜美,比賽當晚表現自然又有自信,獲亞軍也相當合理!

問答環節轉數快 全場爆笑

亞軍鄧卓殷獲讚泳裝環節騷急才,引得全場歡笑及拍掌。農夫就話Do姐成日叫佢哋做「垃圾」,如果Amber要幫農夫改過個新名,會改做咩呢?

Amber臨場就想到為農夫改新名「播種的機」,意思係可以更有效率咁將Hip Pop嘅種子傳播出去啊!農夫同Do姐當然有搞笑寸吓佢,但Amber全程都保持笑容,相當淡定得體!

問答妙趣橫生,搞到台下評判都笑到收唔到聲!

然後農夫又出招!再問Amber如果佢要幫Do姐改個新外號,又會係咩呢?

Amber就依然笑住回答,Do姐係香港女性嘅典範,自然係「香港一姐」啦!農夫隨即就話,即係Do姐之後可以去警務署做啦!Amber轉數好快咁接話,Do姐霸氣仲勁過警務署署長啊!

咁醒目,難怪譚俊彥都點名話覺得Amber答得最好!

賽後鄧卓殷就謙認賽前做足功課,有找過農夫的背景資料。

黑馬跑出 鄧卓殷參選之路

鄧卓殷身形「的骰」,身高只有5呎3吋,三圍31.5、22、33,但勝在夠哂甜美可愛,小編由首輪面試開始已經開始留意佢!

Amber喺首輪面試時身穿黑色長裙,較其他參加者低調,不過出眾樣貌當然唔會被忽視!

Amber

去到次輪面試,Amber換上一襲橙色露肩短裙,加一對長長耳環,配埋本身招牌甜美笑容,即時Sharp醒唔少!

同冠軍陳曉華Hera係好朋友?

次輪面試時,Amber更與Hera一同現身,原來兩位靚女喺第一輪面試後已經成為好朋友,依家一個冠軍一個亞軍,都算係皆大歡喜啊!

Amber
Amber企喺Hera隔籬,雖然身高就真係有啲輸蝕,不過兩位Style唔同,各有Fans~

Amber

雖然Amber身材比其他佳麗瘦小,但睇腹肌都睇得出都有操過嚟!

港大建築系畢業

Amber畢業於香港大學建築學系,志向係成為一位有影響力的人,透過參與社會服務同埋利用自身嘅專業知識去連繫唔同人。真係又靚又叻又心地好!

Amber
呢個角度睇對腳好似長咗唔少,要讚攝影師!
Amber在學期間,喺由亞洲權威雜誌Perspective舉辦的年度設計頒獎盛事「A&D TROPHY AWARDS」獲獎!果然叻女!

動靜皆宜

睇Amber斯斯文文的外表,以為佢都係比較文靜,但睇佢喺決賽嘅精彩中國舞表演,先知佢咁動靜皆宜,讀大學時亦有參加開跳舞表演!平時Amber嘅嗜好係跳舞、唱歌、觀賞電影及電視劇、畫畫、設計同健身。

除了小蠻腰吸睛外,呢個角度睇Amber好似有啲似Anjay陳嘉寶?

上《後生仔傾吓計》自爆初戀係現任男友

同初戀對象拍了6年的鄧卓殷(Amber),第一次拖手仔經歷同馮盈盈一樣,在戲院發生,當時還未開始拍拖,男方就大膽拖住卓殷的手,卓殷即時嚇到縮咗手,不過幸好冇阻礙呢段戀情的開始。

周遊列國

自認比較男仔頭的Amber,個性似乎都係較好動,見到佢有唔少旅行照,周遊列國呢!

Amber以前啲造型都幾百變喎!佢又唔怕同大家分享舊照,抵讚!