21歲餅印仔牛津碩士畢業 譚詠麟 禁仔媾鬼妹

66歲的 譚詠麟 日前在社交網站po出攬實穿上碩士畢業袍的囝囝照片,望到頸都長,終於等到曉風光宗耀祖,欣喜之情表露無遺。21歲的譚曉風在英國牛津大學碩士畢業,咁叻仔難怪阿倫開心成咁,不過老爸有兩個堅持,就係禁阿仔入娛樂圈,同埋媾鬼妹。阿倫除無限量支持曉風繼續讀博士外,仲不時派Wendy飛去英國?實囝囝。仔大仔世界,更何況曉風高大威猛靚仔過阿倫,仲牛津碩士畢業package好成咁,有鬼妹埋身好正常,阿倫驚都冇用啦!

譚詠麟 兒子譚曉風牛津碩士畢業

譚詠麟 除了在香港樂壇地位崇高外,其一生最大成就還包括有個出類拔萃的兒子譚曉風。自小已是譚家金叵羅的曉風,雖然與母親Wendy一直生活低調,但卻非常出色,5歲時憑一幅素描贏得全香港兒童繪畫比賽亞軍,11歲已經考獲六級鋼琴,識打鼓又會彈結他,而且甚有運動細胞,籃球、足球、划艇樣樣精,由細叻到大。

延伸閱讀:

藐同性做咪霸 劉佩玥 麥明詩直播開火

芒實陳展鵬 單文柔向胡定欣示威

阿倫與Wendy自小對兒子曉風極度保護,避免兒子樣貌曝光。本刊早年曾影到曉風在南島國際學校返學放學,一臉清澀的曉風打扮樸素,一睇就知係乖仔。

 

 

 

 

21歲的曉風樣子俊俏,與後生的阿倫有幾分相似,但沒有阿倫的假哨牙。從小讀書成績甚佳的他,在牛津大學完成碩士課程,成為阿倫的驕傲。

十優狀元 能文能武

曉風運動叻,學業成績更加威威,10年成為十優狀元後被阿倫送去英國升學,於英國GCSE考試中以12A佳績,以拔尖身份攞埋獎學金,考入世界頂級學府牛津大學。對兒子絕口不提的阿倫,當年曾罕有公開大讚:「佢媽咪(Wendy)教得佢好好!但我仲要佢明白到幸福唔係必然,所以自細帶佢去貧困地方探訪,我唔會畀好大壓力。其實我都好想做嚴父,但真係冇可能,印象中,只係喺佢兩歲時打過佢一次。」曉風在牛津攻讀電子工程碩士四年,上周以二級榮譽畢業,阿倫雖然忙於為今個月尾與阿Sam的個唱綵排,但他仍抽空飛英國出席曉風畢業禮。

阿倫緊緊擁抱着穿上碩士畢業袍的曉風,四萬咁口豎起手指公讚好。他更放上社交網報喜:「太開心了!原來一個不留神Harry Pottam已經碩士畢業了!」可想而知當時阿倫的情緒有幾咁激動。

 

 

 

百萬英國觀禮團

阿倫得一粒仔,碩士畢業咁大件事當然拉大隊去觀禮,據知今次一行約二十人,包括Wendy娘家的親友及阿倫的好友拉姑、鬍鬚Kong,以及晨曦班主周文曦等,阿倫花過百萬包起觀禮團,為賀阿仔使幾多都值得。

有份出席曉風畢業禮的拉姑搞笑地半跪式送花畀阿倫,穿上阿仔件碩士袍的阿倫過足癮。

 

 

 

 

雖然來去匆匆只有三日時間,但阿倫仍豪花過百萬拉大隊去參加曉風的畢業禮,除了拉姑及老公鬍鬚Kong,還有與阿倫多年友好的晨曦班主周文曦。

單睇阿倫在畢業禮戴上兒子的四方帽,攬住兒子直豎拇指的興奮照,就知道曉風是他的驕傲,令他非常自豪,雖然他自己po上社交網的照片全都是囝囝的背面,仍看到曉風高阿倫成個頭,身高六呎的他身形壯健,本刊記者更找到他在Linkedin登記的帳號,英文名為「Howard Tam」的他,比幾年前多了一份成熟,是個陽光大男孩,跟阿倫後生時如餅印一樣。

 

牛津畢業後,曉風即獲加拿大的Axiom Zen聘請任軟件工程實習生。

 

 

 

為兒子感到自豪的阿倫,感動之餘亦不忘搞笑,在牛律大學校園內穿上碩士袍不停影相,又話自己才是真正的哈利波譚。

 

畢業禮後更準備了一個畢業公仔蛋糕送給兒子,很有心思。

派Wendy?實個仔

多年來阿倫主外搵錢,教育兒子的重責落在Wendy身上,大學畢業的Wendy由曉風幼稚園開始已親自教做功課溫習,從不假手於人。知情者透露:「Wendy有學識又有耐性,咁多年嚟放咗好多心血同時間喺曉風身上,曉風讀書學嘢全部都好自動唔使人逼。阿倫夫婦從來唔會畀佢覺得自己高人一等,自小同佢講要有收穫就要先努力。阿倫以前好少理佢讀書啲嘢,不過個仔愈大佢就愈緊張,因為唔少圈中人都想打曉風主意,又話想簽佢,其實曉風唱歌真係有天份,不過阿倫同個仔講依家做歌手搵唔到食,叫佢唔使諗,趁後生讀埋個博士先。」

阿倫與Wendy當年在歌迷聚會上認識,粉絲Wendy最後變成紅顏知己,更為阿倫生了兒子譚曉風。早年Wendy與曉風生活得極度低調,直至06年譚父去世,兩母子身份亦刊於訃聞中。本刊記者早年在一次飯局影到Wendy扶住譚母離開,當時仍讀中學的曉風已長得很高大。

 

據知阿倫把口話唔緊張個仔有冇拍拖,但暗地裏就成日叫Wendy睇實個仔,仲喺牛津區買咗間大屋畀佢哋兩母子,Wendy每年都飛去五、六次,阿倫要知道曉風同啲咩女仔行埋,講到明唔想個仔媾鬼妹。原來呢方面阿倫好傳統,想個仔娶番中國人,孫仔千祈唔好金頭髮!

 

 

近年Wendy時有被影到與阿倫外出,不過她依然低調抗拒出鏡。

冇遺傳老竇桃花

有樣有學識又有個樂壇校長老竇,再加上曉風為人低調貼地又乖仔,如此筍盤點會冇女仔嗒糖?據知曉風是牛津風頭躉,他修讀的電子工程學男多女少,但他活躍於課外活動,不少修讀其他系的外籍女同學都對他虎視眈眈,曉風緊記父親定下的家規,四年來都專注學業,從他的校內生活照中,可看到圍內的好友都是清一色男同學。認識曉風的世叔伯都知道他聽話又乖仔,日前曾志偉被問及曉風有冇拍拖,他說:「冇講喎!佢唯一冇遺傳到老竇就係惹桃花。」

被拔尖入牛津,曉風能人所不能,四年完成碩士課程畢業,更是校內多個學會的搞手及成員,睇曉風個樣咁sharp醒,四眼look係斯文啲,不過一定唔係書呆子。

隔絕兒子與娛樂圈

阿倫每次見記者都嬉皮笑臉絕無冷場,但他21年來卻刻意把兒子與娛樂圈隔絕,培養出一個有知識有品格的兒子,實在是用心良苦。阿倫上周匆匆到英國參加完曉風的畢業禮後,便撲返香港籌備月尾的演唱會,而曉風則會飛去加拿大溫哥華一間技術公司做實習生,兩父子又再分隔兩地。曉風有校長爸爸支持再讀落去,唔使咁快出嚟社會捱騾仔,睇嚟阿倫好快又要飛去參加曉風的博士畢業禮。

阿倫冇畀曉風畢業沖昏頭腦,佢仲記得要為月尾同阿Sam一齊開的個唱減肥keep fit,每朝早都好落力跑街,唔係講玩。

 

 

跑街減肥

 

 

阿仔在牛津讀書四年,阿倫忙於工作甚少飛去探仔,今次順道在倫敦四圍遊覽,在名勝前留影,阿倫變咗自由行。

 

 

全文完