jm fi

29歲生日孖男友睇極光 JM 唔見行李凍到病

唔少人都趁聖誕假期去旅行抖一抖,文詠珊(Janice Man)都唔例外,加上周五係佢29歲生日,所以更加趁着聖誕假期同拍拖三年的男友吳啟楠(Carl)去北歐睇極光,原以為可以過一個浪漫嘅白色聖誕,點知平安夜一啲都唔平安,當日喺芬蘭轉機去俄羅斯聖彼得堡時,二人五件寄艙行李全部遺失,搞到JM嬲爆之餘仲冷病咗,以為揾唔返啦!點知兩日後五件行李又失而復得,所以學Do姐話齋,去旅行一定要買旅遊保險呀⋯⋯

撰文:東方新地

圖片:新傳媒圖片庫、Janice Man微博及Instagram

JM 旅行失行李

JM昨日凌晨在微博貼文寫道:「昨天從芬蘭轉機到聖彼得堡,我的5件行理全給芬蘭航空弄丟了。所有的禦寒衣物和生活用品都在行李中,未來的兩星期在北歐都不知道怎麼過度,而芬蘭航空只回覆一句『不清楚』,這是一個合理的回覆嗎?」

JM
文詠珊同男友吳啟楠(Carl)拍拖睇極光,本來好浪漫,點知遇到失行李!
JM
JM冇晒禦寒衣物同日用品,唔止要急去添置,仲搞到冷病咗!
JM
JM話唔止佢一個冇行李,有幾位乘客都有同樣情況。

失蹤48小時後尋回

行李遺失期間,JM不時打去航空公司查詢情況,但JM話得到答案唔係「No Information」就係打唔通電話,不過正當佢以為無望之際,日前JM由聖彼得堡飛回芬蘭前再聯絡航空公司,一位負責行李嘅職員話佢五性的行李喺芬蘭冇上機,結果返到芬蘭佢同5件行李「重逢」,真係峰迴路轉呀!

仙氣JM 內地爆紅

文詠珊其實都有一排冇喺香港蒲頭,因為佢近年轉攻內地市場,工作不斷,而早前佢有份主演的玄幻片《九州·海上牧雲記》播出,JM飾演的精靈盼兮,同男主角黃軒飾演的牧雲笙是戀人關係,二人發生一段可歌可泣嘅愛情故事,唔少內地大讚JM靚得嚟又有仙氣,仲將佢同Angelababay在樣子及演技上作比較⋯⋯

𡃁模始祖

點解?因為JM同Angelababay做𡃁模出道,二人齊齊被封為「𡃁界女神」,而且又係好姊妹,但有傳二人爭上位而反目,結果二人姊妹情不再,及後Baby在香港及內地紅透半邊天,而JM雖然在電影上不乏演出機會,但星途平平,估唔到依家喺內地爆紅,外界又再把佢同Baby作比較!

JM
當年仲係𡃁模嘅JM同Angelababay,曾經好friend成日孖公仔出雙入對,但有傳二人爭上位而不和!