【BB來了】劇情對白夠貼地!《BB來了》啜核金句大合集!

無綫劇集《BB來了》贏盡收視口碑,除咗因為演員演技出色,當中貼地寫實嘅劇情同啜核對白,講出咗好多爸爸、媽媽嘅心底話,大家大讚有共鳴!依家一齊重溫呢啲入心入肺的金句!唔知你哋最buy係邊句呢?

撰文:東方新地| 圖片 :《BB來了》截圖、劇照

《BB來了》金句大合集

劇中唐恬兒(Ali李佳芯飾)同葉致廷(黎諾懿飾)一對新婚夫妻,二人一直未有打算生小朋友,點知某一晚黎諾懿貪一時快感唔做足安全措施,Ali見自己出現懷孕特徵開始驚,葉致廷即刻話︰「嗱嗱嗱!你唔好自己嚇自己,你上年做婦科檢查,醫生話你個子宮向後屈,冇咁易有BB嘅!」直至Ali用驗孕棒驗證實懷孕三周時,黎諾懿第一個反應露出驚訝神色,仲搶走支驗孕棒衝口而出話:

「有冇咁容易中呀?」

之後仲問支驗孕棒準唔準,完全體現出新手爸爸嘅驚惶失措。

見老公咁驚青到咁,之後仲攞支烈酒出嚟飲酒定驚,自隊半支後再問Ali飲唔飲?Ali反問︰

「你叫我飲?呢個係你第一個反應呀?有冇咁驚呀?」

對於有BB老公唔止未有滿心歡喜,仲似乎唔開心好大壓力咁,本身已經未有懷孕準備嘅Ali梗係又嬲又失望,搞到佢想落咗個BB佢!

做時裝買手嘅Ali正值事業搏殺期,本來一心想去完巴黎受訓完上位做管理階層,點知意外有BB而打亂晒所有計劃,仲同奶奶嘈交,佢更因為極度擔心而大爆:

「你知唔知一個女仔有咗代表啲咩呀?係事業身材樣貌全部即時ALL IN呀!」

Ali內心想要BB,但現實同心理又未準備好,黎諾㦤話佢懷孕後未開心過,Ali擔心話:

「生BB係一條單程路,冇得返轉頭!」

事實上好多媽媽都為咗照顧仔女而犧牲所有,母愛真係偉大!

黎諾懿知道Ali陀得唔開心,就暗地裡叫外母開解佢,陳秀珠向恬恬大爆不為人知嘅秘密,話自己當年小產過兩次才生咗Ali,所以對這個小公主又珍惜又寵愛,陳秀珠以媽媽身份分享為人母嘅感受:

「你依家覺得要犧牲身材、樣貌、事業,但呢啲全部都會搵得番,唯獨呢個小生命可一不可再,你唔要,上天未必會再畀你,到你生咗BB落嚟你,就會覺得之前所犧牲嘅,都係值得!」

陳秀珠以前生完Ali坐月坐得唔好,時至今日都腰骨痛,佢唔想恬恬行自己嘅舊路,所以以過來人身份勸佢生完BB後,記住好好坐月。陳秀珠嘅演技真係好好⋯

婆媳關係自古以來不斷發生!對於人妻來說,娘家永遠都係一個避風港,陳秀珠得知恬恬要搬去住喺奶奶盧宛茵樓下住,就話個女一定畀「西太后」恰,之後嗱嗱臨執清間房又準備好BB用品,等孫女同囡囡隨時可以返娘家住,仲話:

「女人要有娘家返先矜貴」

真係道出咗唔少已婚女性嘅心聲,媽媽幾時都係囡囡最強嘅後盾!

唐恬兒第一次參加「媽媽谷」聚會,其中一位媽媽谷成員張名雅講出「港媽王國」的術語:

「最緊要唔好俾62,99同C6蝦!」

媽媽們立即解畫話:「62即係老爺,99即係奶奶,至於C6,咪係「死佬」囉!」

新手爸爸黎諾懿差啲畀車撞,點知Ali只顧BB,冇關心過佢,同行嘅外父羅樂林話:

「女人由大肚開始,根本就係一隻雞乸,雞乸為咗保護雞仔,係不惜一切,義無反顧⋯女人做咗阿媽,就係有母性冇人性,慢慢習慣啦!」

外父道出男人心中嘅無奈。

唐恬兒向上司表明自己懷孕,要放棄去歐洲工作機會時,上司對佢要生B放棄升職機會感到可惜,仲話:

「你有冇見到公司A組個女同事,佢有咗之後面黃、色斑、多瘡、水腫、鼻大、妊娠紋,乜都有齊,仲重咗四十幾磅,成架航空母艦咁!」

Ali因為見紅要緊急開刀,原先諗住自然分娩嘅佢要入手術室剖腹生B,黎諾㦤冇得陪生BB,Ali爆喊之餘,入到手術室好驚,但都千叮萬囑醫生:

「我會唔會死㗎?醫生無論如何⋯都要保住我BB先!」

做人媽媽永遠把子女放在首位,為咗保護子女,真係可以命都唔要㗎!

Ali乳線發炎入院,但佢最關心嘅唔係自己而係允豬豬,因為當日撞正BB嘅滿月,Ali爆喊話:

「BB一世人得一次滿月㗎咋!」

睇到小編都眼濕濕。

《BB來了》小品勝大製作 開播創2018年收視新高

《BB來了》以陪月員作為背景,主要講述新手爸媽嘅血淚史,更包含婆媳關係同家庭糾紛等貼地嘅生活日常問題,引嚟迴響,劇集人氣可謂節節上升。無論係未婚定已婚,未生BB定已生BB,劇集嘅討論度都甚高,更難得有唔少90、00後都肯坐定定睇TVB~有傳媒消息更指首集平均收視已高達29.3點,雖然仲未有官方數字,但以暫時形勢嚟講,《BB來了》都好大機會成為2018年首集最高收視嘅劇集喎!

小品劇情口碑好 揮贏大製作

近年嘅劇集,成功與否都頗視乎口碑及討論程度,而2018起至今,晚上兩線黃金劇集時段共播出13套劇集,已包括唔少無綫谷到好行嘅「大製作」,好似《溏心風暴3》、《天命》、《飛虎之潛行極戰》,但睇嚟都唔夠《BB來了》收視高開喎!低成本高收視,高成本反而⋯⋯啲高層唔知有冇都嚇到窒一窒呢?

小品更易引起共鳴

反觀近年唔少小品劇集都受到香港觀眾熱捧,劇情圍繞日常生活,係更多觀眾嘅日常寫照,更容易引起共鳴。呢啲劇集投資預算未必好多,仲可能係編導小試牛刀之作,較少依賴卡士又或堆砌金句,劇情有趣貼地,配合細膩嘅演出令不少觀眾投入其中。

寫實對白反成精警金句

好對白自然為一套劇集大大加分,《BB來了》都有唔少精警金句,談及產後抑鬱、夫妻關係、陪月話題、婆媳糾紛,好能夠反映港爸港媽嘅現實生活,呢啲事件就算冇經歷過都唔會冇聽過,自然容易引嚟電視機前嘅觀眾共鳴、網友嘅熱烈討論!更有觀眾話可以學到湊B知識所以鍾意睇,果然好似黎諾懿咁話,「得港媽王國得天下」啊!

完美演繹新手媽媽不安

男性都有產後抑鬱

媽媽谷」無處不在

「媽媽谷」術語你識唔識

咩叫「62」「99」「C6」?

原來呢啲都係媽媽谷術語,「62」代表老爺、「99」代表奶奶,至於「C6」… 即係個死佬呀!

黎諾懿都忍唔住要講出心底話,表示媽媽谷就有如一班師奶自暴自棄、講是講非,好擔心老婆由高學歷氣質港女淪落成港媽!睇到呢度,男士們女士們係咪都好有共鳴?

選角好 演出自然細膩

唔少觀眾都話其實李佳芯嘅觀眾緣真係好好,就算劇中超炆憎成日發脾氣都唔惹人討厭,網民都話佢做邪花Never、Paris時累積嘅人氣都不是白費,今次嘅自然演繹更獲網友大讚佢演技大躍進!但其實除咗Ali,劇中仲有唔少好戲之人,一齊嚟睇吓啦!

讀者留言