Cheronna

Cheronna為男友開譚仔生日會 土匪雞翼蛋糕冇得輸

雖然話人愈大就唔想慶祝生日,不過驚喜派對邊個會唔鍾意?Super Girls成員Cheronna(吳嘉熙)早前為男朋友(即係夏雨兒子兼ViuTV主持黃奕晨Dixon) 準備了一個又驚喜又特別的生日會,而呢個生日會好有可能係歷史上唯一一次,因為係喺「譚仔雲南米線」舉行呀!

撰文:東方新地|圖片:Instagram、Facebook

Cheronna為男友開譚仔生日會

夏雨兒子兼ViuTV主持黃奕晨Dixon,今個月16日就29歲生日,女朋友Cheronna就提早為佢準備一個畢生難忘的生日會,舉行地點竟然係「譚仔雲南米線」!據知Cheronna同Dixon都好鍾意食譚仔,於是前者透過公司去同譚仔方面洽談,最後成功創造歷史!

生日海報字句都係用番「譚仔阿姐」口音,夠晒風味!

「土匪雞翼蛋糕」登場

去譚仔除了食米線,當然唔少得大受歡迎的「土匪雞翼」;而去生日會,就當然唔少得生日蛋糕,所以Cheronna就將佢哋好似「瀨尿牛丸」咁溝埋!呢個生日「土匪雞翼蛋糕」冇得輸啦啩?


呢個蛋糕肯定令Dixon畢生難忘!

譚仔雲南米線的Facebook都有上載Cheronna送驚喜的幕後片段,認真有面子!

可惜冇下次

大家身邊總會有個鍾意食譚仔的朋友,都肯想學Cheronna咁幫對方搞番個譚仔生日會!不過好可惜,呢次生日會只係特例,Dixon話今次係第一次同時係最後一次,譚仔暫時都未有公開提供舉行生日會的服務。

前傳:「麥樂雞蛋糕」

Cheronna咁有創意,可能都係多得Dixon!因為之前Cheronna生日時,Dixon就親手整咗個「麥樂雞蛋糕」,氹到女友鬼咁開心!今次Cheronna就以「土匪雞翼蛋糕」回禮,兩人都為準備生日驚喜費盡心思,呢對情侶真係sweet~

JW收過麥樂雞花?

其實唔止Cheronna收過麥樂雞禮物㗎!今年情人節時,JW喺IG分享咗一束由男友Tarzan親手整嘅「麥樂雞花」,JW冧爆:「I think he gave me the best bouquet in the world!(我覺得佢送咗一紮全世界最好嘅花束畀我)」,似乎超級超級鍾意喎!

而Tarzan見女友咁鍾意自己嘅禮物,亦都有喺Instagram同朋友分享自己嘅大作,仲話:「100蚊有找!」嘩!今次真係講心唔講金啦!禮物唔使貴,最緊要係心意啊嘛…… 如果你係富二代,又有12億身家嘅話。冇嘅話都係安安份份買番紮紅玫瑰畀女友啦~