FI

一人一票嚴選10大最喜愛Marvel角色 Iron Man竟然唔係冠軍!?

Marvel幾乎個個超級英雄都大受歡迎,其中喺電影版擔正嘅超級英雄更加唔使講!咁多個角色都咁有吸引力,如果只可以喺當中揀一個嘅話,真係唔知點揀先好呀!日前有網民發起一人一票嚴選10最喜愛Marvel角色,唔知道當中又有冇你嘅心頭好呢?

撰文:占士│圖片來源:電影海報、電影截圖

一人一票嚴選10大最喜愛Marvel角色 Iron Man竟然唔係冠軍!?

喺正式揭曉呢個 10大名單之前提醒返大家, X-Men或者喺電影版中Deadpool領軍嘅X-Force都係Marvel嘅超級英雄,而超人、蝙蝠俠以及神奇女俠等就係DC嘅,所以呢個名單一個《正義聯盟》嘅超級英雄都冇係正常㗎。

Marvel
《正義聯盟》係DC嘅。
Marvel
X-Force係Marvel嘅。

10. Black Panther(黑豹)

Marvel

Marvel

今年年初先被改編成電影嘅《Black Panther》叫好又叫座!雖然電影本身被部分影迷指題材太過嚴肅,冇乜笑料,不過黑豹呢個角色就成功彈起,連帶扮演黑豹嘅演員Chadwick Boseman都人氣急升。黑豹唔單止又型又打得,加埋妹妹舒莉設計嘅高科技裝備,加上有傳黑豹會連同驚奇隊長喺《復仇者聯盟4》後取代美國隊長及Iron Man嘅位置,難怪黑豹會成為一班巴打絲打心目中最喜愛Marvel角色嘅第十位。

9. Black Widow(黑寡婦)

黑寡婦喺《鐵甲奇俠2》嘅造型。
黑寡婦喺《美國隊長2》嘅造型。
黑寡婦喺《復仇者聯盟3:無限之戰》嘅造型。

作為MCU中初代復仇者聯盟嘅成員之一,加上深藏喺黑色緊身衫下嘅澎湃身材,黑寡婦要成為大家心目中嘅Marvel女神真係話咁易。從2010年嘅《鐵甲奇俠2》初次登場到今年嘅《復仇者聯盟3:無限之戰》亦都累積咗唔少人氣,所以當時有唔少巴打睇到《復仇者聯盟3:無限之戰》中嘅超級英雄一個一個咁人間蒸發嗰陣,都好擔心黑寡婦會係其中一位呀!

8. Star-Lord(星爵)

喺電影版中《銀河守護隊》嘅隊長星爵性格搞鬼、睇得又打得,搞笑嘅背後仲有個不為人知嘅悲慘身世。星爵從小就失去父母,不過性格亦冇因此變得扭曲,仲會身先士卒咁保護一班《銀河守護隊》嘅隊友,呢份熱血真係感動到唔少觀眾。雖然星爵喺《復仇者聯盟3:無限之戰》中一個好魯莽嘅舉動辣㷫哂全球Marvel影迷,不過仍然有一大班巴打投佢一票!

7. Deadpool(死侍)

於《X戰警:金鋼狼》初登場嘅死侍,亦係電影嘅反派之一,同大家依家見到嘅造型非常唔同。

相信有留意《死侍》電影版嘅影迷都對呢個角色非常熟悉,電影中嘅死侍喺能力、個性上同漫畫版嘅亦大同小異。漫畫版中身為特種兵嘅死侍係為咗治癒身上嘅絕症而決定參加Weapon-X計劃,注入Wolverine(狼人)嘅基因後就獲得強大嘅自癒能力。死侍有如此屈機嘅超能力,加上佢抵死搞笑嘅風格,咁受歡迎都唔係冇原因㗎。

6. Thor(雷神)

雷神喺《復仇者聯盟3:無限之戰》嘅造型有唔少網民大讚勁型。
雷神過往嘅長髮造型都喺歐美大熱,當年越黎越多外國男仔仿效佢留長髮。

雷神作為MCU中《復仇者聯盟》嘅初始成員,喺Marvel一開始將漫畫改編成電影至今都累積咗唔少粉絲。Marvel嘅電影有好多都係搞笑加大量打鬥戲,不過第一、二集嘅雷神電影就比較嚴肅,估唔到都一樣大收旺場!相信除咗因為個角色本身就非常有型之外,扮演雷神嘅演員Chris Hemsworth嘅個人魅力亦為呢個角色大大加分。

5. Venom (毒魔)

最近先至推出個人電影嘅毒魔係Marvel數一數二最受歡迎嘅反派角色,佢亦正亦邪嘅角色設定吸引唔少粉絲支持,加上喺個人電影未上映前,毒魔早喺各個版本嘅Spider-Man電影已經出現過無數次,相信大家對呢個角色已經非常熟悉。可惜最近推出嘅毒魔個人電影,就算有英國男神Tom Hardy加持一樣被負評不斷,據知Tom Hardy本人睇完觀影後,都忍唔住感嘆自己最鍾意嘅片段已經被刪減。雖然毒魔呢位反派非常有號召力,但就連男主角都咁樣講,各位粉絲真係唔知應該抱住乜嘢心情入場睇先好啦。

4. Magneto(萬磁王)

Ian McKellen喺《變種特攻》扮演嘅萬磁王。
Michael Fassbender扮演嘅年輕版萬磁王。

比起《復仇者聯盟》更早被改編電影嘅《變種特攻》,相信喺唔少人心目中都有一定嘅地位。萬磁王雖然係一名反派角色,喺2000年嘅電影版中更加係年紀老邁,不過仍然有好多支持者。加上喺近年嘅《變種特攻》前傳中,仲體現到呢個角色溫情嘅一面,令大家了解到萬磁王從X教授嘅好兄弟變成一個大壞蛋嘅心路歷程,唔怪得之可以成為一眾巴打嘅第四名最喜歡嘅Marvel人物啦。

另外,如果冇留意開美漫嘅人,難免會喺度諗乜《變種特攻》都係Marvel咩?乜X-Men唔係另一班人黎㗎咩?咁喺呢度就要同大家解釋清楚啦!據知早年Marvel面臨破產,被逼將部分超級英雄人物版權出售比其他電影公司,例如X-Men、死侍等就賣比20 世紀福斯,同時亦因為版權關係所以有部分喺漫畫版中嘅《復仇者聯盟》成員,至今喺電影版中都無法加入呢個大家庭,但依家問題已經解決咗啦!因為迪士尼已經收購咗呢間電影公司,所以相信喺未來會有唔少大家熟悉嘅超級英雄都會加入《復仇者聯盟》。

3. Iron Man(鋼鐵人)

Iron Man唔止係電影版《復仇者聯盟》嘅初始成員,亦係首個被Marvel親自改編成電影、登上大銀幕嘅超級英雄。作為首個被Marvel公司推出個人電影嘅超級英雄,Iron Man喺未改編成電影前早已經好有人氣,加埋從2008年第一部《鐵甲奇俠》至今已經十年間吸納咁多粉絲,當然好受一班巴打歡迎啦!不過Iron Man都只係得第三名嘅話,頭兩名又會係邊兩位呢?

2. Captain America(美國隊長)

雖然美國隊長嘅超能力唔特別突出,唔識飛天遁地、唔識隱形、亦唔識心靈感應、亦冇好似死侍咁樣嘅強大自癒能力,不過憑住佢個靚樣同副大隻到爆嘅身材,真係不論巴打定絲打都好鍾意佢。

1. Spider-Man(蜘蛛俠)

Tom Holland扮演嘅Spider-Man

作為全美最受歡迎嘅Marvel超級英雄,Spider-Man要成為一眾巴打嘅第一名真係當之無愧。就算Spider-Man已經翻拍過無數次,成個故事都已經俾班影迷睇到爛哂,舊年嘅《蜘蛛人:返校日》一樣叫好叫座!個勢咁勁,睇黎暫訂下年上映嘅《Spider-Man: Far From Home》,Marvel應該都唔會失手嘅。

Andrew Garfield扮演嘅Spider-Man
Tobey Maguire扮演嘅Spider-Man

關鍵詞
Marvel