被ViuTV嫌棄 林保怡操fit還拖

晒肌練跑喪操FIT

日前林保怡親自揸開篷戰車到赤柱跑步，先慢跑warm up，熱夠身，保怡突然剝衫，露出結實胸肌同粗壯手臂，51歲講算keep得好好！帶齊毛巾耳筒等裝備，着住對sharp爆紫色跑鞋的保怡邊聽歌邊練跑，忘我練跑。

51歲保怡平日有練跑，睇得出身形keep得唔錯，係個小肚腩礙眼咗啲啫！

跑到扯晒蝦的保怡，期間發現短褲移位太性感，要即刻行埋一邊「整理」。

保怡去附近沙灘沖身，期間跨欄過對面，身手相當敏捷。

沖完涼，換過一身裇衫西褲的保怡大方同記者傾偈，仲表示自己每日食麥包飲鮮奶，好健康，唔怪得keep得唔錯啦！

「民選視帝」人氣高

保怡在《綠豆》中的神級演技獲觀眾激讚，更高票當選「民選視帝」，嬴獎嬴民心！可惜幾好戲都冇用，事關ViuTV早前宣布開拍新一輯《瑪嘉烈與大衛系列》，除廖碧兒外，原班人馬一律被out，連男女主角林保怡同周家怡亦冇得留低。《綠豆》大受歡迎，尤其係主角分手一幕更睇到人心噏，可惜新一輯換晒人，完全唔同feel！

「雙怡」勁hit，連Sammi都搵兩人幫手拍新歌〈我不是歌手〉MV。MV以迷你劇形式播出，台前幕後都係用《綠豆》班底，甚有《綠豆》影子。

開劇還拖撼Viu

ViuTV唔識寶，好在保怡人脈廣大把路數。近期保怡忙於籌備劇本，將會聯同好拍檔周家怡同《綠豆》班底另起爐灶，自編自演開劇同ViuTV打對台！

唔只繼續拍劇，唱歌出身的保怡仲會重返樂壇，早前幫鄭秀文的MV客串，又會推出新歌派台，更透露正部署出碟，完全唔愁工作！

全文完