「戀愛專家」 Kino 教媾女反被KO 睇佢點解釋?

ViuTV節目《K.O. KOL》每集都會搵來城中炙手可熱的網絡紅人上去挑機,由主持人測試佢哋係咪真係有料到,最近節目就請來自一位開班教授戀愛技巧的「戀愛專家」 Kino ,分享媾女絕招,仲即場示範喺speed dating中媾女model!不過 Kino 無論係外形、談吐同臨場反應都實在每人不敢恭維,完全唔明點解會有人會俾錢上佢堂……

Kino 現身教媾女

《K.O. KOL》今次請來「戀愛專家」Kino,聞說呢位人兄學生無數,絕招多多,上過佢堂都可以變搭訕高手,瘋狂識女… 不過Kino一出場小編已經忍唔住笑了。好啦入正題,做得到戀愛導師,係咪因為本身媾女好叻先開班授徒?Kino就話其實自己本身媾女非常唔掂,所以著力研究唔方法,所以依家咁成功。另外又稱自己大把女朋友:「一定有兩位數字啦,就冇三位嘅…」

紅格西裝重洗水牛

Kino講到自己咁猛料,佢仲話自己最基本有60個學生,一個月收入就六十幾萬!呢位Kino人兄樣貌就見仁見智啦,不過外形頹頹廢廢,完全唔似老師,紅色格仔西裝加條重洗水牛仔褲,小編真係唔識欣賞。而且好明顯佢好緊張、黐脷筋、口窒窒,手部動作又唔協調… 每個月俾成萬蚊上佢堂?

「你好似隻貓喎!」

咁當然啦,黐脷筋又唔代表冇口才的,Kino表示自己曾經喺網上分享過一啲本來對女仔百發百中的「秘技」,但經過幾千幾萬人抄襲佢之後,秘技就變成唔work了。其中一招,就係開場白時講:「你好似隻貓喎!」… 之後眾主持續都呆一呆,不過Kino繼續追問:「你有冇聽過啊?真係我發明㗎!」

即場示範

講就天下無敵,一於等Kino即場示範一下!節目模擬Kino喺一個speed dating場合向模特兒Elle搭訕,劈頭第一句就係:「Hey!Cheer!」點知講唔夠兩句就懷疑對方係做「媒」,人哋否認咗仲繼續講,做咩啫你?

之後開始扮專家,話Elle講嘢時嘟起個咀,係代表審視緊個男仔夠唔夠level… Kino係咪以為對方會讚佢學識淵博?

時裝表演亞軍?

Kino多多口水,靚女Elle亦唔示弱,直接話自己唔鍾意人着紅色格仔西裝 (心聲啊)!點知Kino就話個look夠晒特別,認為Elle應該改變一下taste… 識咗兩分鐘就要為你改變taste? 跟住又開始1999,話自己着紅色係因為細個時媽咪買咗件紅色衫俾佢參加時裝表演,仲攞亞軍㖭!

賽後分析:

節目出街後,Kino就喺自己個blog發咗篇長文,認為自己在觀眾眼中被「KO」了,但其實表現不過不失。首先佢指出model一早知道佢身份,所以反應自然打折扣;另外就係Elle原來係個好cool的女仔,鏡頭前後都一樣。明白晒!唔關Kino事!

 

至於大家對佢衣著的批評,Kino就稱或許係自己戀愛導師的身份唔討好,影響到女人的既得利益,所以引來負評。另外Kino又話如果真係要展示媾女技巧,應該係要對方唔知情的情況下進行,先會有最真實的反應… 小編支持Kino拍片表演!

全文完