結婚禮物

新人結婚禮物清單被指肉酸 網友嘲:冇錢又學人擺酒

要揀結婚禮物送給一對新人有時的確不易,皆因要考慮到禮物要實用得來又要合價錢,得體之餘又要不老套,有時真會難到不少人。最近,有新人於個人社交網貼出一張結婚禮物清單,但就惹來友人不滿,更將清單分享到討論區,結果引來一眾網友熱烈討論!

撰文:東方新地|圖片:連登討論區

新人貼出結婚禮物清單

最近,有網民於討論區發文,表示自己見到友人於個人社交網貼出一張結婚禮物清單,讓只出席婚禮或完全未能出席的親友選擇,親友更可按個人意願填寫「資助項目」,當中的選擇都不少,不如大家一齊睇睇有咩選擇。

結婚禮物

結婚禮物選擇

多個選擇中,「資助」項目由50蚊至500蚊或以上都有,但相信一對新人早喺諗「資助」項目上,都有體貼考慮過某啲親友嘅經濟能力,皆因有一項選擇係「祈禱祝福」,即唔洗錢就可以送上結婚禮物。

結婚禮物

樓主留言指認識一對基督徒新人即將結婚,但就見到對方貼張結婚禮物清單出嚟,「心諗乜料,禮物從來都係講心意」。

帖文一出,隨即引起一眾網民熱議,有部分人就認為呢對新人嘅做法其實喺外國係件常見之事,而且外國人「好興呢啲」,覺得列出禮物清單根本冇問題,認為係樓主大驚小怪。

有網友就笑指個禮物表好似遊戲節目嘅感覺,另有網友指覺得新人做法冇問題,因為有免費又有50蚊揀,比一般去飲嘅錢仲要平得多。

另外,亦有部分網友表示「好過收啲相架、擺設唔知點咁」,有清單就唔會造成不必要嘅浪費,仲讚呢個做法幾好。

不過,亦有網民嘲諷新人「冇錢學人擺酒行教堂」,認為列清單要求資助好「肉酸」。

雖然唔少網友嘅留言並非一面倒支持或反對呢對新人嘅做法,但兩位新人嘅做法又真係有好處,皆因真係可以減少浪費,又令親友清楚知道新人真正需要。或者大家暫時未接受呢一套,唔知大家又點睇呢?