海洋公園

老師轟政府海洋公園免費門票中伏 原來係一場誤會!

近日,網上有學校老師爆料,指自已所任教的學校分到政府所派的免費海洋公園門票,學校決定用作獎品給品學兼優的學生,每班一個,每人兩張飛。點知,該位獲得免費門票的學生卻被當場拒於門外,因門票不包暑假,於是引來公憤!但實情原來整件事是一場誤會!

撰文:東方新地|圖片:海洋公園instagram、公關災難Facebook

預算案中的計劃

唔知大家仲記唔記得,今年年頭財政司司長陳茂波所公布嘅新一年度《財政預算案》,預算案中提及今年政府會向本地中小學生,提供一萬張免費海洋公園入場門票。當時,唔少人聽到呢個消息都有所微言。

本身有免費海洋公園入場門票就當然係件開心事,不過得嗰一萬張飛,而全港則有合共70萬名中小學生,明顯供不應求。

受惠學生約佔整體中小學生只得1%,「僧多粥少」,各位學生想攞到免費飛就真係好似爭學位一樣咁難!

學校老師網上爆料

話說,近日就有學校老師喺網上爆料,指自已所任教嘅學校好好彩分到政府所派嘅免費海洋公園門票,但數量就唔多,學校就決定用嚟獎品學兼優嘅學生,每班一個,每人兩張飛。

爆料者作為班主任就千挑萬選下,揀出一個學生,獲得呢兩張猶如一票難求嘅門票。

點知,個學生拎住飛,滿心歡喜同朋友仔一齊去到海洋公園門口先被入場工作人員拒於門外。

點解?原來係因為張免費門票只適用喺非繁忙季節,即6、9、11及12月。

作為一個老師,深明嗰幾個月份,正正就係學生最忙嘅時刻,因為撞正開學及準備考試!學生就算喺個四個月份去玩,都未必可以開懷玩個痛快。

該名爆料老師,於網上一五一十講出成件事嘅來龍去脈!

網民留言

聽到呢件事,有網民就覺得呢啲免費門票完全係個伏,仲話係財爺大整蠱。

同時,亦有網友指門票適用期根本就唔啱學生去玩,因為學生照常理會喺放大假先去,又指政府並冇考慮到細節位,只係求其送門票出去就算。

真相大白

但事情仲未完結,近日海洋公園發言人就回覆傳媒,指該名教師所指的門票為「關心你」獎勵計劃送出的門票,而非《財政預算案》中嘅一萬張免費門票。真相大白,原來係一場誤會!

「關心你」獎勵計劃

據了解,「關心你」獎勵計劃每年送出1.2萬張門票,以表揚6000名於本學年曾積極協助學校建立關愛校園文化及在關愛同學方面值得嘉許的中學生,每名學生可獲贈2張門票。

 

關鍵詞
海洋公園