豬扒包

網友買豬扒包有被騙感覺 怒斥:香港仲有無老實商家!

唔少人都鍾意食豬扒包,因貪塊豬扒食落有口感之餘,食完仲夠飽肚。日前,有網友於社交網群組發文,指自己於銅鑼灣一間餅店買咗個豬扒包,但就質疑該店嘅豬扒包有偷工減料之嫌!

撰文:東方新地|圖片:PLAY HARD玩硬Facebook

網友買豬扒包有被騙感覺

日前,有網友於社交網群組發文,指自己於銅鑼灣一間餅店買咗個豬扒包,但就質疑該店嘅豬扒包有偷工減料之嫌!從網友上載嘅照片所見,豬扒睇起來比外面塊麵包仲要厚。

豬扒包

但點知一咬落去,原來炸皮裏面只得一塊薄薄嘅豬扒!一啲厚度都冇,唔講都差啲認唔出呢塊係豬扒!

豬扒包

樓主留言指店舖「豬肉紙飽充豬扒包」,「雖然我讀得書少,你都唔好呃X我 ,其實E(依)家香港地仲有無老實商家」。

網民反應兩極

網民睇到相後隨即留言,但反應兩極,有人就笑指塊豬扒係「薄炸」、「薄切黑豚肉」,有人就話「$18蚊係咁上下㗎喇 !」,亦都有網民指重點係餅店將豬扒「裝假狗扮厚」!

同時,亦有唔少網友大讚廚師刀功了得,今次真係睇你點睇啦!但有樣嘢都可以幾肯定,就係食完應該會有食唔飽嘅感覺,唔知發文者當時有冇同感呢?

據了解,該餅店表示曾因有客人投訴豬扒唔夠熟,所以廚師先至會將豬扒盡量打薄,令豬扒落炸爐後更易熟。話雖如此,但唔知廚師會唔會覺得薄咗啲呢?