菜檔

菜檔女工偷530元斷正 檔主:一係賠18萬一係報警

偷竊當然係唔啱,不過獅子開大口要求高額賠償,似乎係如同勒索?日前網上廣傳一段疑在黃大仙竹園街市菜檔拍攝的短片,片中一名老闆似是斷正女工「穿櫃桶底」,喺其袋中搜出總值530港元的10元硬幣,老闆指女工喺菜檔工作半年,「假設」對方每日偷走500元硬幣及500元紙幣,所以要賠償18萬元,否則報警!

菜檔女工偷530元斷正

約6分半鐘的片中見到菜檔老闆找人舉機拍攝,與疑似偷錢的女工對質,老闆從女工袋中搜出零錢,點算出總值530港元的10元硬幣。「你無得走架啦,成個過程被高清拍攝,任何角度都睇到」老闆指已經在10元硬幣「落咗汗」,而且早已由店內CCTV拍攝到其偷錢過程,並非插贓嫁禍。整個過程中女工反應鎮定,神態自若,其後當場承認偷竊:「今日係我(偷)」,但未有承認每日偷竊。

檔主:一係賠18萬一係報警

女工認罪後,老闆隨即「算賬」,指女工在菜檔工作約半年,「推算」對方每日偷走500元硬幣及500元紙幣,所以總數就係18萬!佢要求女工「一係賠18萬,一係報警」。最後老闆再加多句,懷疑菜檔前一個月虧蝕10萬元,都係同女工偷錢有關。

 

該個位於黃大仙竹園街市菜檔的另一位合伙人,日前回覆傳媒,指近月店內10元硬幣的數量突然大減,認為情況有異,翻查閉路電視後方發現有員工偷錢。佢又指最終沒有報警追究,亦無要求女工真係償18萬,只係將對方辭退了事。其實發生此事後,老闆並不打算放上網公審,只係發送俾一啲行家,以示警惕,點知有人擅自將片段放上網,搞到咁大件事!

老闆似有勒索之嫌

片段在網上廣傳,引來網民熱烈討論,雖然該女工偷錢係唔啱,但網民都一致認為該老闆做法不當,既然人贓並獲,老闆大可報警處理,而唔係打算「私了」;另外老闆揭發女工偷取530元,然後就「假設」對方半年間每日偷1000元實在於理不合。如今老闆要求對方賠償一個唔合理的金額,似有勒索之嫌。

全文完

關鍵詞
老闆