被指攬女炫耀 網民鬧爆 男機師 千字文回應

網上世界,兩張相片,影響可以是無遠弗屆。一位 男機師 日前喺FB講述飛行時遇上打風雷暴的經歷,但被狠批炫耀;而佢一張攬住兩位好身材靚女浸溫泉的相片亦在網上瘋傳,主角們紛紛被起底,人人瘋狂討論。事件男主角昨日喺FB發千字文回應,到底事情係咪如萬千網民所想呢?

 

其實是咁的,一位機師早前喺FB上載與兩位女友人的合照,談及自己第一次喺飛行途中遇上打風的經歷。呢位機師哥哥用字實在略嫌浮誇,好似「閃電閃到中咗閃光彈咁」、「雨水好似一粒粒閃令令嘅100卡鑽石」及「俾防空炮掃射一樣」等等,最後就以「完美Landing」準時返到香港。

 

另一張相就見到呢位機師哥哥浸溫泉時左擁右抱,攬實兩個身材姣好的索女,更一人錫一邊臉珠!咁就即時觸動了網民的神經,「葡萄」的留言此起彼落,覺得這些機會不是屬於自己的,只有羨慕的份兒…

 

FB專頁「花邊空姐」亦轉載有關事件,並稱呢位機師哥哥只係一名「SO」(Second Officer, 即二副機長),為機師中最初級的職位,資料顯示SO主要參與航班通訊工作,只有當飛機達至巡航高度先可以坐喺駕駛座,唔可能負責起飛或降落的工作,質疑有人「冇料扮四條」。

雖然網上大部分的聲音都係覺得呢位機師哥哥「懶叻」,又插佢炫耀自己多女,不過亦有網民替機師抱不平,因為佢喺FB分享生活照根本冇問題,而且網民根本唔知該兩位小姐係佢女朋友與否,無故被人放上網批鬥實在係好無辜。

 

而是次主角機師哥哥昨晚就喺其FB發文回應,指溫泉相片其實係半年前同親人去旅行影的,點知就被無限放大,傷害了好多無辜的人:「究竟有沒有想過你們無名的一念一句會導致什麼的後果,會令受傷的人有多難過?」至於有關喺惡劣天氣下降落一事,佢表示係讚嘆機長的技術,並唔係想自吹自擂。

另外機師亦稱,自己只係喺FB分享人生中值得開心和紀念的點滴,「相片一直只有朋友才可以看見」,從來都冇打算炫耀。雖然好傷心呢個社會變成咁樣,但佢最後表示自己會繼續抱着赤子之心,熱愛生命、熱愛值得愛的人。


全文完