恭碩良

【分手前專訪】同憶蓮感情毋須婚書證明 42歲恭碩良:「我來自破碎嘅家庭…」

42歲鼓手恭碩良,與53歲天后林憶蓮拍拖8年,近日驚爆分手!有傳恭碩良已另結新歡,導致二人本來恩愛的關係破裂! 《東方新地》前年跟恭碩良訪問時,他曾經大方分享同女友林憶蓮嘅感情狀況⋯⋯還說過因為自己「來自破碎嘅家庭」,所以同憶蓮感情毋須婚書證明。想不到這場關係終以分手收場⋯⋯

撰文:東方新地|圖片:新傳媒圖片庫

恭碩良(Jun)前年剛同夏韶聲、鄧建明 (Joey Tang)、黃貫中及單立文合辦咗兩場《搖滾大俠奏》紅館個唱,日前在與本刊嘅訪問中,恭碩良就大談入行以來嘅起跌,仲大方分享同女友林憶蓮嘅感情狀況⋯⋯

18年專訪重溫:「同憶蓮關係好穩定」

對於咁多年來報紙、雜誌上對佢同憶蓮嘅報道,恭碩良直言:「我覺得好㗎,我唔會覺得係負面㗎。其實大家都想對方好㗎嘛、大家都係關心,我反而覺得係sweet㗎,唔會覺得負面。OK嘅,行得正企得正,真係都咁多年。跟住會點?我話畀你聽,一段好好嘅感情,係幾悶嘅感情,因為好穩定,我哋城市人一穩定就會開始覺得悶,但係我係需要好穩定嘅家,我先可以做啲咁黐線嘅嘢,做呢一行嘅人,個個都唔正常,但我哋返到去需要一個正常嘅生活環境。」

恭碩良 林憶蓮
Jun形容跟憶蓮關係穩定,而這種穩定,正正是他所需要的,並毋須一紙婚書去證明。

婚書重唔重要呢?恭碩良話:「唔重要,我嚟自一個破碎嘅家庭,我12歲已經知道我唔想要小朋友,我覺得結婚呢樣嘢係一份合約for你嘅小朋友,如果你想要小朋友,你一定要結婚,因為爹哋媽咪要幫你去搞身份證明⋯⋯我有兩隻小狗狗,佢哋就係我嘅小朋友,所以唔需要囉,同埋如果真係要做呢樣嘢,我唔會玩音樂,我已經奉獻咗我呢一生人做呢樣嘢。正常人梗係想安安定定穩穩陣陣,九至五返工,交到租,我哋唔係㗎嘛,40歲仲走去set鼓,我做音樂 係因為我唔可以早起身,你叫我九點鐘起身?我今朝六點先瞓。」

恭碩良
恭碩良曾多次參與林憶蓮演唱會製作,而林憶蓮最近又爲恭碩良新歌做監製,能夠寓工作於拍拖,其實都幾爽。

恭碩良最後寄語有入行打算的年輕人:「個個都鍾意揸飛機,唔代表可以揸,你做得好,觀眾自然識欣賞。有好多歌,我聽完頭嗰八個bar(小節),都未唱我已經唔聽,梗係啦,你煮畀我我就要食㗎嗱?」

恭碩良 鄧建明 夏韶聲

恭碩良:精神上畀人強姦

講到初出道嘅經過,恭碩良憶述:「18歲,臨入行、臨簽約之前,有過爭啲被賣豬仔嘅經歷,份合約唔畀我睇,簽廿年,所有歌屬於佢,(拆帳)佢七、我三。點發現有問題?睇到嘅,講嘢唔係望住你,淨係話:『你信唔信我先?』嗰啲咁嘅人。嗰時經歷精神上嘅恐嚇,好似精神上畀人強姦。」

恭碩良
年輕時的恭碩良。

問佢點走出呢個陰影?恭碩良表示:「返咗澳門,重新再嚟過。我14歲入行,我好清晰呢一行係服務性行業,難聽啲會話係做雞、做咩,我好清楚呢啲事遲早會發生,我情願早啲錯,好過我40歲先嚟錯,我18歲唔開心十年,但係依家我所有音樂都係屬於我自己,我所有出版過嘅歌都係屬於我自己,我依家去到個位係,唔使唱片公司畀錢我,我自己出錢去做,Master(母碟)都係屬於我。」

恭碩良
恭碩良曾是黃貫中樂隊「汗」的成員之一。

視夏韶聲為榜樣

講到好似有人身嘅威脅!恭碩良直言:「絕對有,我諗呢啲Danny哥 (夏韶聲) 見得多、見怪不怪。我14歲跟Danny哥玩過一場騷,佢做咗個榜樣畀我,我依家40歲,都做緊個榜樣畀澳門或者香港嘅音樂人睇,希望佢哋將來做得比我更加好。我亦唔會小器話:『搶晒我啲job啦!』你要知道當係人哋嘅moment,你就要畀人行。」

恭碩良 夏韶聲

問到佢早兩年打波斷腳韌帶,打鼓令手五勞七傷,仲有抑鬱?恭碩良回應:「嗰時抑鬱係因為斷咗韌帶乜都做唔到,去個廁所都搞兩個鐘,我已經係好尊重生命嘅人,我完全想像唔到真係無咗隻腳會點,同埋自己住咗咁多年,好難出聲話:『你幫我沖個涼啦!』」

恭碩良

提到恭碩良有拍《同門》、《喜愛夜蒲》等電影,問佢鍾唔鍾意做演員?佢話:「有少少又愛又恨,我受嘅訓練係音樂人嘅訓練,我唔係演員,我係一個音樂人,好開心有啲導演賞識,覺得我個look啱佢部戲,但我嘅訓練唔係演員嘅訓練,我去唔到十六個鐘,我個訓練最多七個鐘頭,四個鐘soundtrack、三個鐘騷,我就可以埋單,所以我鍾意,但我體力上唔得。」

恭碩良
2010年恭碩良拍電影《同門》受到好評。

講到佢都親力親為搬擴音器,恭碩良笑言:「我嘅訓練係咁㗎嘛,你唔搬自己啲器材,做咩音樂人啫!一個廚師啲刀梗係自己保住啦,搵食工具嚟㗎嘛、要尊重!表演要做得好,預備功夫都要做得更加貼切。」

恭碩良

內地工作受尊重

而提及佢參加過《我是歌手》,問佢內地係咪再多啲機會?有冇諗過再花多啲時間喺國內發展?恭碩良說:「我本人其實鍾意內地多啲。因為上到去佢哋對於佢哋嘅工作好尊重,佢哋好尊重音樂人。」《歌手》好多話題性?恭碩良認同:「好多,人哋話大陸有錢,咁你都要識擺喺邊先得㗎嘛,佢哋將啲錢好適當咁放喺好好嘅編曲、音樂人,隊band都係香港嘅band,我上到去(國內),我因為受傷,進化到自己好似科學家咁,打鼓用電鼓,每一場用唔同嘅器材,佢哋好驚訝:「你點可以做到呢個聲出嚟?」我答咁咁咁咋嘛,一啲都唔係商業秘密,我好怕嗰啲『我唔話你知咩chord!』唓,上網都摷到啦,我覺得個溝通係好緊要。」

恭碩良 鄧建明 夏韶聲

同林憶蓮拍拖七年掉轉男前女後

愛情來了,相差11年又如何?人辦在眼前,睇吓林憶蓮同Jun恭碩良呢一對拍拖七年愈愛愈難捨難離就知道!其實兩位咁癡纏亦都有道理,無論開騷、出碟定參加內地唱歌真人騷,憶蓮都有Jun打鼓、編曲做監製做背後男人吖嘛!不過「女前男後」最近要掉轉,話說Juny日前同黃貫中等人首度合體騷開,早排憶蓮再同Jun出埠做嘢,今次就輪到憶蓮做番背後女人,粒聲唔出企喺Jun身後等男朋友做訪問。適當時候避開鏡頭唔想搶男朋友鏡,呢啲咪係愛囉!

林憶蓮

平時憶蓮開騷做慣新聞焦點,近排輪到恭碩良做番次主角,同五大band神合體在紅館開騷,所以兩位出現機場時,憶蓮識做退下火線交畀男友自己問題自己答。

林憶蓮

剛踏入52歲生日,憶蓮喺男友面前都不經意好似少女一樣,粗重嘢交晒畀男友做,不時嘟嘴又撒嬌,好可愛噃!

林憶蓮

林憶蓮

憶蓮默默跟在阿Jun後面,繼續做個背後的女人。

林憶蓮

拍拖七年恩愛如昔,憶蓮亦都慣咗去到邊都有Jun照顧倍伴,推行李呢啲絕對係基本。

林憶蓮

林憶蓮