吳卓羲

最高峰七日冇覺瞓 喊住打畀阿媽|吳卓羲:我哋只係生財工具!

又係穿起全套紀律部隊制服、又係做飛虎,去到出緊街的《飛虎之潛行極戰》,據民間非正式統計,吳卓羲歷年拍劇拍戲橫跨警界多個部門(包括古裝捕快)、入行廿年一半時間都去咗「當差」,無獨有偶,幾乎每套戲都試過衰衝動闖出禍,簡單來說,吳卓羲,等於任性,等於額頭鑿住兩個字:衝動。

這次本刊記者專訪吳卓羲,說到2015年離開無綫外傳最大原因是被冷落、這些年北上發展和闖影壇,從無綫一線小生去到外面要自降身價從低捱起:「冷唔冷落係外人講啫,去到咩位置,都係人哋賦予我,唔係我自己話自己。當你出到去,見到連發哥都話學緊嘢、連劉德華都可以同我哋打成一片時,你就明白做人永遠都唔應該將自己個位置set up得太高。」

38歲,捱過十五年木人巷非人歲月、三年多走南闖北見識過更大的電影世界,目前單身的吳卓羲說,這些年最大的長進是自己時間終於輪到自己話事,終於可以追回來那些年錯過了的生活,想要的,就是這麼簡單。

撰文:東方新地|圖片:新傳媒圖片庫、吳卓羲IG

吳卓羲:呢個世界係圓嘅

首先問佢《飛虎之潛行極戰》以後有咩工作?吳卓義透露:「本來係10月開戲,就番Niki個期,即係《火拼男女》,依家七月會開,年尾如無意外會拍《飛虎2》,暫名嚟啫,應該會係另一個古仔。」而講到三年後又返TVB嘅感覺,吳卓義直言:「我接《飛虎》嘅時候唔係話TVB,我淨係知係邵氏同優酷,當時冇話過會喺TVB播。其實呢幾年TVB一直有搵我,期嘅問題實在冇時間。好多監製撞到好似王心慰咁,都會問我幾時返嚟⋯⋯唔係話抗拒,我覺得呢個世界係圓嘅,去到邊都好,都總有機會返舊公司。」

吳卓羲
相隔三年因為邵氏和優酷合拍的《飛虎之潛行極戰》,再有電視劇於無綫播出,吳卓羲說地球是圓的,從來不抗拒和舊東家合作。

怯,就永遠不會成長

問佢當年離開,真係因為被TVB冷落失去太多上位機會?吳卓羲否認:「係報道同粉絲咁講啫,我冇理會過,我哋做演員,總有人覺得你好、有人覺得你唔好,總有人替你唔抵抱不平,不如做好自己唔好介懷所謂名次。太多外來聲音,我呢十年八年學識唔好介懷。包括三年前離開,我唔怯,但係周遭個個人替我怯,覺得我冇咗個樹大好遮蔭嘅溫室,唔穩陣喎?怕唔怕㗎?第時冇人搵你拍戲點算?決定要走時就唔會擔心呢啲,計埋我頭兩年做舞蹈員,十八年喇⋯⋯始終喺呢度長大,有好多回憶,但係有一樣嘢一定要明,唔離開永遠都唔會進步,永遠唔會知個世界有幾大。」

吳卓羲
無綫到底係溫室定係工廠流水線呢?吳卓羲解釋:「我嘅意思溫室即係每個月有糧出,佢畀工我開,當然我都要做、仲要係做得好辛苦嗰隻㖭⋯⋯」

最高峰七日冇瞓

記得吳卓羲話過入行頭兩年已經劇接劇,試過唔夠瞓辛苦到喊住打畀阿媽,唔想撈?吳卓羲坦言:「係!最高峰試過七日冇瞓,仲要再喺個樹林吊威吔拍古裝,嗰日我真係喊住打畀阿媽⋯⋯以前聽前輩講就聽得多,但係實情體驗咩叫無得瞓真係第一次⋯⋯嗰種冇精神、冇感覺,個人得番個軀殼,每日只得返工放工,返工知幾點,但放工唔知幾時囉⋯⋯所以呢三年最大得著係我終於有得選擇,起碼知道我幾點可以返屋企見吓屋企人。」

吳卓羲
從舞蹈藝員轉藝員約第二年已經劇接劇做主角,吳卓羲卻因為連續七天七夜冇覺好瞓,曾經在外景山頭喊住打畀媽媽抱怨唔想撈。

以前呻嘅時候有冇諗過呢啲機會其實人人都好恨?吳卓羲說:「係呀,好多人覺得有冇搞錯、仲好意思講呢啲?有得你撈仲想點?當你真係咁樣拍法,你先至知咩叫辛苦。我同林峯、(陳)鍵鋒、馬明傾偈,都話過,香港冇一份工係辛苦過拍戲⋯⋯真係冇。地盤係都辛苦,我哋係腦力同身體都疲累到極點,人除咗廠同外景冇生活,屋企淪落到就係一個沖涼嘅地方。呢種生活係過咗十幾年喎⋯⋯」

吳卓羲
電視台多年經歷總是有人抱不平,說吳卓羲被冷落、電視台偏心:「我哋奧運六星都係二千年小生離巢潮後嘅時代產物同受益者,遊戲規則我哋幾個最明白不過。」
2004年奧運六星:(後排左起) 馬國明 黃宗澤 陳鍵鋒 黎諾懿 (前排左起) 林峯 吳卓羲

試過揸車瞌眼瞓鏟上路邊

提到林文龍都話過,前一晚通完三日頂,過隧道瞌眼瞓撞斷腳,第二朝公司貨van又嚟屋企樓下接開工,吳卓羲接言:「你(演員)明嘅,嗰個揸住貨van嚟接人嘅同事都明,呢盤係生意、係工廠,每個人頭都要計人工、都要計生產力,佢都係接order做嘢⋯⋯你要記住,我哋個個只係生財工具。」勞損完你哋最多再勞損第二個?「唔係勞損,係折磨⋯⋯嗱,我唔係話公司折磨我,係時間折磨我,好危險。我都試過無數次,過條大老山(隧道)返屋企,瞌眼瞓鏟上路邊,車都花埋,撞完個人先至醒番。」

吳卓羲

十八年日日外景與開廠之間,會唔會有「時間去了哪兒」的感覺?吳卓羲笑言:「咁又唔會,有得就又失,不停做嘢,所以搵到錢、又儲到名氣。失嘅就係冇咗私人時間,朋友唔搵我㗎啦,已經打畀我都費事⋯⋯」問佢會唔會因為頭嗰十零年太辛苦,所以畀自己任性吓?吳卓羲否認:「係個樣任性啫,我始終覺得自己做過啲咩啫?買車唔叫任性,我依家都鍾意車,以前係畀個目標自己,不過去到呢個年紀、呢個階段,人生觀會唔同,要揸咩都揸過晒囉,好似揸樓仲穩陣啲⋯⋯」

吳卓羲

買咗兩層樓出租

38歲、買咗兩層樓,對目前嘅自己滿意嗎?吳卓羲表示:「買咗兩層好細間樓咋,出吓租賺吓租金。每個人喺呢個圈都唔會話自己係最高,我38歲,仲離目標爭好遠,每一日仲有好多嘢要學要見,呢兩年最大收穫,出到嚟可以見到唔同嘅人、做唔同嘅嘢,離開TVB時就係想得著呢樣嘢。以前冇呢個機會,因為人哋搵我第一次冇時間,都唔會有人搵我第二次,呢兩年最重要,係可以有選擇嘅權利。」

吳卓羲

出到去,個世界有幾大?覺得自己夠唔夠?吳卓羲指:「合作過唔同嘅人,就知道製作團隊有好多種、要求個個都唔同,再唔係去到邊都只得TVB嗰套工作方法。呢啲嘢係要見識過至知,TVB一日十場,電影一日一場戲,以前我一日記晒十場戲對白、連戲,去到拍電影,唔係只係記,要執生、要更深層,唔係只追求快。」

吳卓羲

唔好睇得自己太高

最後問佢喺TVB係一線小生,但出到去又變番新人,感覺如何?吳卓羲答:「千祈唔好咁講,我從來唔會覺得自己係一線。做呢行永遠唔好覺得自己係一線,就唔會有呢個問題發生。位置係人哋賦於我,我唔會亦唔應該咁樣講自己。一套戲唔會得一個演員、得主角,一個人做唔晒所有嘢,唔好set up得自己太高,係唔係男主角都好,人哋叫你跳落坑渠都要跳、叫你食隔夜餸都要食㗎!尤其係出到嚟,就知道真係唔好睇得自己太高,我同華哥拍戲,佢係劉德華喎,都係會坐埋嚟同我哋傾偈,呢啲要學習。我記得當年我由舞蹈藝員變藝員,同芭姐(前藝員部經理蕭笑鳴)簽約時佢都同我講過,無論你將來去到咩位置都好,記住對下邊啲人一定要好⋯⋯將心比己,你擁有嘅嘢唔係必然,要記住,一個人係玩唔晒嘅。我好彩啫,其實都係普通人一個,人人都有努力過、都係打一份工、都係為演藝界出緊一分力。」

吳卓羲
離開電視台闖影圈三年,最大收穫就是和劉德華合拍《拆彈專家》:「當你見到連劉德華都會主動行埋嚟同我哋打成一片,就會明白真係唔輪到我將自己位置擺得太高。」

吳卓羲

TVB御用警察

吳卓羲一向都係TVB嘅御用警察,佢由2005年《學警雄心》開始扮演警察,喺過去13年間就多次飾演警隊唔同部門嘅角色。由舊款制服演到新款制服,涵蓋警隊不同階層,包括學警、散仔、藍帽子、CID、飛虎隊同埋其他特種部隊,甚至連臥底都演過,份CV靚仔過唔少真警察!

2005年《學警雄心》

學警出更喇!仲著舊制服。

吳卓羲由《學警雄心》就開始佢警察生涯。

散仔行咇,換咗新制服。

CID

爆炸品處理課

藍帽子

飛虎隊

反恐特警

臥底

另外,劇中的手槍一定勁過機關槍

今年吳卓羲終於升咗職,喺《飛虎之潛行極戰》做到O記總督察。

飛虎

有網友仲抵死咁話警隊內部架構好大,吳卓羲仍然有好多警隊職位未做過,相信佢可以做到退休咁話。相反,小編就比較期待想睇到吳卓羲做到「一哥」嘅時候!

飛虎之潛行極戰

劇中佢仲連環周旋在陳凱琳和何佩瑜 (Jeana) 兩女之間,認真艷福無邊!

飛虎之潛行極戰

飛虎之潛行極戰