吳卓羲

從姐仔屠夫到街市殺手|吳卓羲 陪爸爸走過最後日子

姐仔屠夫、戰車載女、去九龍城食個飯都要揸架四百萬SLS平治飛門超跑,從前訪問吳卓羲,他這麼說:「架車係朋友借我揸,摸上手的確high到爆,不過揸佢落去九龍城行一轉,泊車都轟轟聲,車門彈起嗰下,成條街排隊等位食飯嘅人望住我,幾尷尬呀,面都紅晒⋯⋯講真,冇咁大個頭就唔好戴咁大頂帽!」到現在訪問吳卓羲,老實說,任性浮誇食女無數的吳卓羲好像真的好久不見了,感覺是意想不到的成熟穩重、有情有義⋯⋯

撰文:東方新地|圖片:新傳媒圖片庫、吳卓羲IG

吳卓羲 陪爸爸走過最後的日子

訪問開始,提到15年爸爸因為癌症去世,問吳卓羲最記得佢嘅係咩?吳卓羲憶述:「好多⋯⋯太多⋯⋯佢個人好cool,最記得就係小學帶啲同學返屋企打機,佢成個關二哥咁坐咗喺度睇住我哋玩,唔識笑⋯⋯哈哈。有打我嘅時候、有鬧我嘅時候,不過成日赤手空拳咁教訓完我,又好錫我喎,會買架單車畀我,因為我鍾意⋯⋯佢走嘅時候,我喺佢身邊,嗰年(2015年)我離開TVB,所以真係有時間可以陪住佢。」

吳卓羲
15年爸爸因為癌症去世,吳卓羲正好離開無綫,入行以來第一次有時間盡兒子本份,卻也是最後一次。

吳卓羲續說:「最後嗰幾日,都係我坐喺床邊,陪佢傾偈、幫佢抹身,最後嗰幾日,佢係彌留狀態,但我知佢聽到嘅,知我同佢講:『放心啦,阿媽我會照顧好佢。』我喺嗰年經歷咗兩個人離開,喺上海拍緊《梟雄》時婆婆走咗,我乜都唔理,一定要坐飛機返香港,佢哋兩個,我都係握住佢哋嘅手離開。一定有遺憾,但係佢哋起碼知道,我返咗喺佢哋身邊。」

吳卓羲

萬般帶不走

人一世物一世,問吳卓羲覺得行完呢一個旅程,最重要留低啲咩?佢話:「最重要係問心無愧、心安理得,要過得人都要過得自己。萬般帶不走,揸咩車買咩樓,其實都唔重要,最掛心最放唔低,咪又係你愛錫嗰啲人?」

吳卓羲

問佢講咩最氹得阿媽開心?吳卓羲笑言:「咪是非囉!哈哈⋯⋯有時三哥三嫂同林峯去我屋企玩,佢最開心就係有人陪佢傾偈睇電視。以前嗰十幾年係我返到屋企佢已經瞓咗,跟住佢未瞓醒我又要出門口再拍過,阿媽成日以為我冇返過屋企。」

苗僑偉
吳卓羲同三哥苗僑偉一齊拍《飛虎之潛行極戰》。

吳卓羲感慨續言:「爸爸患嘅係最難check到嘅胰臟癌,到發現時已經病發去到尾期,當一個好親嘅人被判死刑,其實真係可以做嘅嘢唔多,只能夠陪伴,盡量喺佢身邊。製造回憶呢樣嘢真係好緊要,所以依家我想同媽咪補償番過去十幾年冇時間做嘅嘢。」

吳卓羲

從姐仔屠夫到街市殺手

喺電視台捱咁多年,有冇七勞八損捱到內傷?吳卓羲直說:「梗係有,肝啦大咗兩公分,飲食唔定時,又傷胃又有高血脂。呢幾年先至似番個人,食中藥調理吓,又做到運動降番咗血脂,仲有最開心係可以陪阿媽去街市,我真係好鍾意搭住佢膊頭去睇海鮮:『喂呢個貴啲喎⋯⋯』然後聽佢同人講價。依家大個仔,最鍾意咁樣,最想畀阿媽食好啲住好啲、喺我能力範圍畀最好嘅佢。」

吳卓羲
離開大台吳卓羲說最大收益是可以好好黐吓家,同好好陪陪媽媽,閒時兩母子去街市買餸成了生活樂趣。

冇拖拍變宅男

有冇帶過女朋友返去畀阿媽睇?吳卓羲答:「冇!」記者再問:咁多年咁多個都冇?佢反問:「有幾多個呀?好多係緋聞,唔係真喎!我唔回應啫,唔係個個都係我㗎!依家有冇拍拖?梗係冇啦⋯⋯依家多咗生活,但係少咗出街⋯⋯哈哈,反而變咗宅男,愈嚟愈覺得唔梳頭髮留喺屋企最舒服。」

吳卓羲
年少氣盛的時候不停換超跑,有時更是連車帶女友一齊換,當事人說男人38歲,揸車不如揸樓更穩陣。

同前度冇時間了解

而講到好朋友三哥有三嫂、陳山聰都有個陪佢度過難關嘅女朋友Apple,唔羨慕咩?問佢以前咁多個,有冇邊個係錯過咗,那些年後想追番?吳卓羲直言:「梗係想,有個另一半幫我處理晒啲雜物你話幾好?以前嗰啲過咗去就唔好再講,重點係以前一齊冇諗過咁遠,唔係我唔想有將來,而係你想有將來係唔係要互相了解吓先?但係我根本就冇時間同佢互相了解⋯⋯」

吳卓羲
從前訪問,碰巧遇到前度張馨予騎劫男方微博帳號發放床照,曲到直宣示主權,吳卓羲真係講咗「別怪她」三個字:「同吳卓羲一齊唔容易,我冇時間、冇自由、處理感情要低調,我明白佢冇安全感。我嘅位置要做嘅嘢,係體諒佢點解要咁做⋯⋯如果連我都怪佢,同出面其他人有咩分別?」

張馨予

好想做老竇

咁多年冇試過身邊有一個人、第一件事想同佢分享,唔掛住咩?吳卓羲笑言:「呢個感覺久違到已經唔記得咗有咩咁好,既然唔記得就更加唔使恨。依家做完嘢,我冇邊個想見想搵,最想係咩都聽唔到,畀我靜吓。我都好想做老竇,有時見到朋友有家室、生晒仔,都會諗吓有一日我做爸爸會係點呢?」

吳卓羲

教下一代唔好害人

最後問吳卓羲如果做爸爸會點教育下一代?覺得為人處事、喺一個行業可以立足,最重要係咩?吳卓羲表示:「唔好怕蝕底,同埋唔好害人。講真,一個人蝕得幾多呢?同埋你有眼見,立心不良只會自食其果,呢啲嘢同呢啲人,呢幾年我真係見唔少。」

吳卓羲

吳卓羲

吳卓羲 大個仔愛黐家

吳卓羲呢幾年離開無綫走南闖北果然搵到錢亦都修心養性變成熟,記者以往撞到佢唔係拖住女就係揸住戰車約朋友去夜街,早排竟然天都未黑就坐保母車打道回府返大埔屋企。見到記者個鏡頭,吳卓羲一啲都冇唔自在,反而保持笑容、不斷揮手打完招呼又講再見,呢啲咪大個仔囉!

吳卓羲

吳卓羲近年勇闖電影圈,啱啱又忙住要宣傳新劇《飛虎之潛行極戰》,睇怕都係捱到唔多夠瞓,日光日白口腫面腫,不過見到記者都仲識得打招呼。

吳卓羲

往日難得返香港一定係自駕戰車周圍飛番轉,如今大個仔穩重咗,吳卓羲有機會都係等司機代勞,自己爭取時間休息吓先。

吳卓羲

天都未黑,吳卓羲竟然冇街去,自稱冇拖拍又變得黐家,果然有時間寧願早啲返屋企。

吳卓羲

15年爸爸去世後又離開無綫,吳卓羲都話開始珍惜同屋企人相處,一得閒就會陪媽媽去大埔街市買餸。

吳卓羲

Ron Ng 吳卓羲(@ron_ng_0902)分享的貼文 張貼

Ron Ng 吳卓羲(@ron_ng_0902)分享的貼文 張貼

Ron Ng 吳卓羲(@ron_ng_0902)分享的貼文 張貼

Ron Ng 吳卓羲(@ron_ng_0902)分享的貼文 張貼

<