夏韶聲

四次結婚又離婚 夏韶聲:夢見見唔到樣嘅女人

曾經歷四次結婚又離緍嘅夏韶聲(Danny Summer),在與本刊嘅訪問中,大方分享佢嘅愛情觀,以及佢對見到UFO嘅睇法,而講到家人,佢話:「我唔鼓勵佢哋入行,呢行好難行,我哋行到可能係幸運,但仲要靠好多嘢!」

撰文:東方新地|圖片:新傳媒圖片庫、夏韶聲FB夏韶聲IG

夏韶聲 低潮期去拍電視劇

問夏韶聲由〈童年時〉到〈空凳〉到〈結他低泣時〉,又有拍劇,咁多機會,一路收入都算穩定,應該無乜低谷?夏韶聲謂:「點會無低過吖,一定有,但低過,咁又點?如果我唔低過,我都無依家。你睇我去拍電視劇嗰個年代,因為我覺得呢邊個井水都乾嘞,咁我都要養妻活兒㗎嘛,我咪走去拍電視劇囉!到嗰度有啲水出番嚟,我又試吓飲番嗰啲水,好在我飲得番。邊有人一直平鋪直上?或者有,但我唔識呢啲人,我身邊個個都係奮鬥出嚟。」

而提到夏韶聲平咗張天愛嘅紀錄,四度結婚、離婚,問佢嘅愛情同佢嘅音樂生涯係咪同樣精彩?依家愛情觀又係點?佢表示:「我有時發夢夢到啲見唔到樣嘅女人,我個心好舒服,或者呢個夢個感覺就係──邊個唔想畀人愛!我都想!我愛人都好多,愛過咁多次,總之唔夾嘅、我對佢嘅愛佢感受唔到嘅,咁只有鬧交多,但全部都過去咗嘞,喺過去十幾廿年我從來無講過我係最好,但今日,我講畀大家聽,依家係我最好嘅時光,我有女朋友,但我唔係要look for一個婚姻,依家係非常之好!」

夏韶聲

前妻大把錢

夏韶聲續說:「如果我經過咁多次都唔去受教訓,仲埋個頭落去,埋得啱就話啫,埋得唔啱,我會浸死㗎喎,唔好嘞,企喺岸邊算嘞!」離婚後淨係畀compensation(賠償金)應該都唔少?夏韶聲答:「無,我都冇乜compensation可以畀,佢哋(前妻)大把錢,而係我唔要佢有嘅所有嘢,佢要我啲乜鬼嘢啫?結他呀?點都好,我睇我嘅職業係比愛情生活更加大,我睇音樂、事業比我生命仲要大!」

夏韶聲
07年Danny舉行演唱會,他與第一任妻子所生細女Michelle (右起)、大女及當時索妻Tina均現身撐場。

唔鼓勵家人入行

問佢三個孫有冇遺傳佢嘅音樂細胞?夏韶聲笑言:「唔多唔少有嘅,如果無,我諗我要驗一驗啲DNA,哈哈!」如果佢哋要入行行Rock、Band嘅路?夏韶聲直言:「我唔鼓勵呢樣嘢,我家姐同我兩個女唱歌都好好聽,我從來無鼓勵佢哋入呢行,好在佢哋無入,呢行好陰險?唔係!呢行好難行,如果要行到我哋依家呢個位,係好難行嘅事,我哋行到可能係幸運,但仲要靠好多嘅嘢。」

此刻無價!有Jason帶孫仔上台同我慶祝生日,仲有好友太極一齊! #2017開心時刻 #分享愛 #aegmusicchannel十大最受歡迎演唱會暨樂壇頒獎禮

Danny Summer(@dannysummermusic)分享的貼文 於 張貼

見過四、五次UFO

再問梗係要問UFO,問佢係咪對UFO有種情意結、好迷戀UFO?夏韶聲表示:「我大大話話見過四、五次,如果十零廿年前,你話見到UFO,人哋話你傻,依家你同人講你唔信有UFO,嗰啲人又話你傻,世界變,資訊發達,唔係話情唔情意結,佢哋真係存在。我出隻《天眼》嘅唱片,想表達人在做、天在看,係我哋地球人好無奈嘅希望,明知有人做得唔好,我哋受咗好多委屈,但我哋嘅力量太薄弱,所以望天打卦,睇吓有冇神或者另外一啲人嚟打救我哋。」

夏韶聲

夏韶聲經歷多段婚姻,前妻包括富家千金,自言現階段愛情觀更成熟、開心。

夏韶聲
Danny的第三任智利妻Bibi(右)。

夏韶聲最後寄語有入行打算的年輕人:「要做好自己,唔係淨係唱歌跳舞就得,一定要玩埋樂器,先畀人睇到talent。」

恭碩良 鄧建明 夏韶聲

嫩口女伴陪買生果

65歲夏韶聲自四年前同第四任有米老婆Tina離婚後,經常湊孫爲樂,似乎已經修心養性,不過早前本刊記者就發現佢同一位好年輕嘅長髮女伴一齊現身九龍城,佢哋一邊各自飲住杯珍珠奶茶,一邊好似孖公仔咁行去揀生果,買完生果,夏韶聲仲做埋司機,揸車載住女伴走人。

夏韶聲

65歲夏韶聲呢日著住一身背心短褲,打側一睇就見到肚腩激凸。佢揀生果時逐盒睇逐盒問,揀得好仔細。

夏韶聲

夏韶聲同長髮女伴口味一致,各自買咗杯珍珠奶茶,邊行邊吮。

夏韶聲

買完生果,由夏韶聲做柴可夫,載女伴走人。

夏韶聲

夏韶聲

背妻嗒粉絲

原來本刊早喺2012年夏韶聲未同第四任老婆Tina離婚前,已影到佢同長髮女伴Isabel親密撐枱腳,更不時同返西貢村屋短敍。當時老婆長駐美國,Danny在港無王管,當日與長髮女在齋鋪飽餐,點菜全程由Danny拍板,女方甜笑聽其發表偉論,又互相夾餸,猶幸女方打扮較成熟,與Danny坐埋未有父女感。據了解,長髮Isabel是Danny的頭號粉絲,無論其演唱會、酒吧band show、UFO演講等統統出席。

夏韶聲

午餐時分已過,人客所餘無幾,Danny放下戒心偶有依偎女方肩膊。

夏韶聲

離開時Danny一馬當先快步行前,機警左顧右盼,而女子緊随其後,上車前全無交流。

夏韶聲

長髮女比Danny年輕數十載,曾在Danny的60歲BBQ生日派對上陪切蛋糕,表明有意,自此被私有化。

夏韶聲

關鍵詞
離婚