11111111

姜皓文 談與曾志偉美麗的誤會

去年姜皓文憑《樹大招風》提名金像獎「最佳男配角」,最終由曾志偉獲獎,當時佢話:「我一部撼你廿六部⋯⋯」網民覺得有貶意,戥姜皓文唔抵;姜皓文同圈中出名惡嘅杜琪峰導演有過唔少合作,杜sir又係咪真係咁惡?黑仔娓娓道來…

撰文:東方新地|圖片:新傳媒圖片庫

姜皓文:志偉好錫我

講到去年金像獎同曾志偉嘅是非,姜皓文話:「其實志偉san係好錫我,根本嗰時喺亞視,係佢點名叫我做《開心主流派》,由嗰段時間佢就好關心我,仲有一段時間,佢有叫我去TVB㖭!佢搞經理人公司,又叫過我去佢公司,佢講嘢嘅語氣同性格,我哋熟嘅就知,如果唔熟佢,佢嗰件形態係會令到人有啲誤會嘅,有陣時佢口急,講快咗!」

姜皓文
姜皓文對網民因為曾志偉去年在金像獎的言論戥他著緊:「我一路以為我自己跑,原來有咁多人留意緊我嘅嘢、同我一齊緊張,好慶幸、好感恩。」
姜皓文
姜皓文說到今年影帝心水,表示:「我都想佢頒幾個影帝,我好想我個好老闆古天樂有,我又唔想我個好恩師劉德華輸,我又唔想我個好拍檔Ronald(冇獎攞),如果佢哋三個都有晒就正咯!」

姜皓文又為曾志偉解畫稱:「佢話『我一部撼你廿六部!』係一個切磋嘅對白,如果唔係,佢直頭唔使提我㖭啦,佢有心幫我、佢都戥我肉緊,係美麗嘅誤會!」

姜皓文
姜皓文近年多產程度幾乎跟所有港產片導演合作,但佢話:「唔係㗎,嘩,好多導演我未合作過㗎,關錦鵬、許鞍華呢啲我流晒口水㗎!」

杜SIR好惡? 姜皓文:係霸氣

講到杜琪峰導演,黑仔拍過杜SIR執導嘅《奪命金》、《毒戰》、《盲探》等多部電影,問佢杜SIR係咪真係好惡?佢話:「杜生係有種霸氣,有種大師級嘅風範,佢唔係貿貿然去惡,唔好話杜生,每一個導演都係!太專心想做好一樣嘢就會緊張咗。」

姜皓文
姜皓文讚杜琪峰好有大師級嘅風範。

姜皓文

姜皓文憶述:「我記得有次拍《毒戰》,唔醒起兩部機一齊拍,我角色中槍死咗,聽到嗌cut,我起身,杜生大嗌:『邊個郁?』真係驚到尿都想標出嚟!後尾我自首,同佢講:『導演,唔好意思!』佢淨係『唏』嘆咗聲氣,然後叫我哋去食飯。」

姜皓文
姜皓文話試拍戲出錯,最後杜生都只係嘆咗口氣,冇鬧到佢。

恨拍文藝片

問到姜皓文仲有咩角色想做?佢答:「想拍文藝愛情片,唔係動作愛情片,哈!男女主角完全唔襯,但好轟烈嘅愛情片,因為我啱啱拍完《翠絲》,鍾意咗文藝嘅節奏,唔想拍嚟拍去打、開槍,好攰呀!想演繹好輕柔嘅姜皓文畀大家睇。」

姜皓文
姜皓文話唔想成日拍埋啲槍戰同打鬥戲,想拍部愛情文藝片。

姜皓文

最好有兩個獎

講到今次兩部戲提名金像獎,姜皓文直言超級緊張:「如果畀我兩個獎就好嘞,我又想《拆彈專家》有份,又想《大樂師.為愛配樂》有份,我開心㗎,倉田保昭係我嘅超級偶像,我能夠同佢個名一齊角逐,我已經贏咗啦!希望票數唔會拉薄啦!」

姜皓文
姜皓文話試過同時開四組戲,「我都唔知幾得閒,我大把期,哈哈!本來唔係想咁,本來排得好地地,點知呢部遲咗開,後面撞埋一齊,咪好似好巴閉,哈哈!」
姜皓文
姜皓文笑言拍《五個小孩的校長》時,每日暴食到個樣勁麻甩。