111111111111

姜皓文結婚十八年 分享夫妻相處之道:唔好講傷人嘅說話

「黑仔」姜皓文入行32年,今年有兩部電影《拆彈專家》同《大樂師‧為愛配樂》入圍香港電影金像獎「最佳男配角」提名,事業上終於捱出頭,講婚姻,姜皓文同殷寧(原名金慧英)結婚十八年,黑仔分享佢哋夫妻之間嘅相處之道,係最緊要唔好講傷人嘅說話⋯⋯
撰文:東方新地|圖片:新傳媒圖片庫

姜皓文同老婆金慧英各顧各

姜皓文笑言同老婆結婚十八年嚟成日嗌交:「初初結婚唔識得點去珍惜,唔識點去處理婚姻生活,兩個人生活,唔係咁簡單,唔係話住埋一齊,你就我、我就你,真係有種節奏喺度,大家要配合得好好。我覺得最忌一樣嘢,兩口子點樣發脾氣、點樣惡都好,唔好講啲真係太傷人嘅說話,一次就你、兩次就你,三次就真係唔得㗎嘞,唔可以郁啲話離婚、分開,千祈點嬲都要忍住唔可以講,除非你唔想段婚姻長久落去啦!老土啲講句人氹人係OK嘅,個節奏咪大家盡量去配合囉!」

姜皓文
原來姜皓文亦曾改名,「我原名姜漢文,改名師傅話原名到中年會孤獨、天煞孤星咁,叫皓文就會開心啲!」
姜皓文
姜皓文曾搞過私房菜,旁邊係佢太太殷寧(原名金慧英)。

姜皓文 愛玩煮飯仔

問佢閒時同太太做咩多?姜皓文回答:「我有我,佢有佢,哈!佢鍾意啲花花草草,好鍾意魂遊太虛諗啲佢自己世界裡面嘅嘢,但係每年我哋都會一齊放假去旅行,因為我哋生日同結婚周年連住幾日,平時就一齊煮吓飯,依家我唔鍾意出街,飲酒又唔揸得車,我依家都少飲,因為我好控制唔到自己,我會追酒飲,飲完亂晒籠,又斷片,好恐怖㗎,試過同朋友返內地飲酒,飲到唔見咗我,我去咗第度唔知同邊個飲,瞓醒褲袋一大疊咭片,所以好危險。」

姜皓文

姜皓文
去年10月,姜皓文趁結婚18周年,喺馬來西亞檳城買樓送畀太太。
姜皓文
對於太太金慧英近年改名殷寧,姜皓文話:「佢覺得個名靚,貪玩啫!」

考慮搬去檳城

問姜皓文去年豪花七位數字喺檳城買樓送畀太太,係計劃將來喺當地定居?佢話:「我有諗過搬去檳城,因為有次去檳城旅行,我同太太都好鍾意,咁啱朋友介紹,睇到個樓盤,唔係即刻買,我都計好多數,跑到氣咳,大家都鍾意,咪當係大家嘅一份禮物,第日旅行住又好,過三、五、七年我想放慢工作又好,甚至乎我繼續做嘢都可以喺馬來西亞住㗎嘛,咁近三個鐘頭機。」

姜皓文
問到拍咁多戲,有冇女埋身?姜皓文話:「冇呀,邊有咁多女埋身,咁犀利咩?除咗以前曳吓之外,咁耐都真係未試過。」

姜皓文

姜皓文:冇亞視冇我

姜皓文近年主力拍電影,好多人都唔知原來佢係亞視出身,佢話自己係邱德根年代嘅亞視人:「嗰段時間好開心,上下一心,一家人咁!」姜皓文直言當年嘅亞視對佢嚟講係一個好大嘅磨練:「冇亞視冇我、冇黑仔,點解嗰陣時我一路都喺亞視,就算有人搵我都唔走,一來嗰陣時穩陣啦,我份人係咁,夠使夠住夠食就算,我唔會再嘥時間去鋪過一條新路再發展,好驚呢啲嘢,好怕又要去一個新環境,所以一路都喺亞視。」

姜皓文
姜皓文曾喺亞視拍《香港亂噏》扮梁國雄,頗受好評。

姜皓文在亞視 乜都要自己做

姜皓文憶述:「我嗰個年代嘅亞視係邱德根年代嘅亞視,雖然嗰時亞視都係冇錢賺,我哋出外景嘅車都係爛溶溶,我最記得喺彩虹邨死火,四個古裝人戴住頭套推車都試過,但嗰段時間好開心,上下一心,一家人咁,有咩要求投訴,走去同監製傾偈乜都得,依家大台好似話唔得㗎嘛,見個監製都好難㗎嘛!」黑仔又指自己做亞視時學到好多嘢:「嗰時乜都要自己做,有時同事太忙,頭套都自己黐,按住個頭自己搽膠水,我仲記記得有次台慶,我飲醉酒,第二朝開早班遲大到,拿拿臨坐住的士邊黐頭套去現場都試過!」

姜皓文
過往嘅亞視藝人除姜皓文外,現時大多去晒無綫拍劇。

講到香港電視結果都開唔成台,姜皓文話佢冇乜大嘅感覺:「當然嗰時我好想佢攞到個牌,順利開到台,咁就百花齊放,大家都搵到食,仲有個出路,觀眾都多個選擇。但無奈⋯⋯我覺得呢樣嘢唔到我去諗,佢哋有佢哋嘅政策,我又唔識呢樣嘢,係可惜囉,但一個五十幾年嘅電視台都可以冇咗啦,哈哈,有乜嘢唔可以發生吖!」

姜皓文
久未拍電視劇,姜皓文4月將會為無綫拍一部劇集:「好耐冇拍過電視劇,好想有番呢個感覺。拍咗咁耐電影,其實一路都想拍部電視劇,一路揀緊劇本,呢個劇本鍾意就撮合咗。」

用個心去做

除咗講亞視外,姜皓文又講到近年主力拍電影,問佢點可以食到咁多家茶禮,套套戲都搵佢?姜皓文話:「唔知喎,呢樣嘢我覺得你有冇誠意做一樣嘢、係咪真係有心爭取,人哋係睇到,人哋唔會無端端搵你去做咁多嘢嘅。我覺得一個人唔好講話勤力咁巴閉,有個心去做、有誠意去做呢樣嘢,人哋一定會畀機會。」

姜皓文

問佢有冇覺得大器晚成?點解唔係廿幾歲紅,去到依家(51歲)先開始嚟個收成期?姜皓文答:「冇嘅,我覺得你係得就會自動上,你就算畀我嗰時廿五歲做咁多嘢,可能我嗰時都做唔嚟,其實人生嘅嘢,每去到一個時期,就會做嗰個時期嘅嘢,提早畀你,你做唔到,提早發生可能搞到一鑊粥,儲夠資格或者彈藥去做,人哋咪睇得舒服囉!唔會話大器晚成,我諗係時運未到啫!」

姜皓文

 

講到近幾年走型男路線,姜皓文笑稱:「唔係專登㗎,係咁啱,我覺得一啲都唔型喎!《五個小孩的校長》之後,我的起心肝減,因為拍《五》嘅主景喺山水茶寮,日日鏡頭一cut,我就去買馬拉糕叉燒包蝦餃燒賣,食到個樣好麻甩佬,拍完《五》有啲時間咪跟個教練操,跟晒餐單,教練叫我每個禮拜可以有一日亂咁食,我都冇,我最記得我開始減嗰日,我屋企仲請客,人哋大魚大肉,我就食雞胸蛋白。」

姜皓文
拍《五個小孩的校長》時期,姜皓文日日去買馬拉糕叉燒包蝦餃燒賣,食到個樣好麻甩佬。
姜皓文
之後姜皓文就的起心肝操弗自己,變身做型男。

關鍵詞
姜皓文