朱晨麗

朱晨麗拒認《平安谷》演得好:我演技未開竅!

  1. 2011年度港姐冠軍、無綫萬千星輝頒獎典禮「最佳女配角」得主朱晨麗(Rebecca),在同本刊嘅訪問中大談得獎一刻嘅感受,以及為《棟仁的時光》苦練鋼管舞,同拍《特技人》時嘅辛酸。

撰文:東方新地|圖片:新傳媒圖片庫、朱晨麗IG

朱晨麗 同林淑敏好friend

訪問中,朱晨麗直認有睇網民評論話佢得「最佳女配角」係爆冷:「其實我自己都覺得受寵若驚,初頭頒『飛躍進步』,做live訪問話有好多網民投我,問我有咩感想,我答『多謝!』但最終唔係頒畀我,都有啲失落。因為大家期望好高,但係唔緊要,下年再嚟過囉!個心情係諗陣間去邊度食宵夜,因為成晚坐喺度無食過飯。當我諗緊嘅時候,就嗌咗我個名,我就諗真係我?我有冇搞錯或者聽錯?同埋我未準備要講啲咩,因為我個腦已經飛走咗,嗰刻有啲驚訝嘅,當然公司畀到,都要接受㗎!咁大個鼓勵,都要承擔。」

朱晨麗
奪得無綫台慶萬千星輝頒獎典禮「最佳女配角」,但亦有網民認為是爆冷。

朱晨麗

問佢有冇睇對手嘅戲?好似《溏心風暴3》嘅陳敏之同《愛·回家之開心速遞》嘅林淑敏?朱晨麗笑言:「我同Mandy(林淑敏)好friend,我仲記得我哋臨出騷之前,咩獎都未頒,佢就同我講:『定啲嚟,Morning朱,放心,我哋唔使緊張,我哋祈禱。』佢係好nice,我哋平時會喺WhatsApp分享聖經金句,日日都會分享,我好鍾意佢,我知道好多網民都好鍾意佢,佢係大熱嚟嘛,佢演嘅大小姐係『我要殺死你!』嘩,演技係好勁,但無辦法,公司畀到嚟,我惟有感恩。」

朱晨麗
朱晨麗在《平安谷》中飾演的三奶奶顧曼儀本是一名歌姬,因懷疑是蘇玉華害她滑胎而一直與她針鋒相對,到後期朱晨麗被揭發與奸人徐榮有著不為人知的過去,不過相信最吸引人的還是三奶奶穿旗袍的曼妙身形,搶晒鏡!

朱晨麗

要多謝阿蘇同劉老師

好多人讚你喺《平安谷之詭谷傳說》演得好,問佢演技係幾時開竅?邊個前輩幫你最多?朱晨麗表示:「多謝,我都未覺得自己開竅,真係陰功,哈哈哈!可能係有咗經驗同淡定咗,最主要係劉老師(劉江)同埋阿蘇(蘇玉華)兩個係收視嘅保證,令到成套劇多人睇咗,自然多人評論咗,好彩我都有人鍾意、有人讚,如果唔係,咁好收視都係畀人踩㗎咋!哈哈!阿蘇同劉老師真係好好演技,平時私底下阿蘇啲霸氣,令你好驚,但埋到嚟,阿蘇成個小朋友咁,會同你嘻嘻哈哈、玩好後生嘅嘢,講笑又唔mind,可能無咁驚,做對手戲嗰陣就舒服啲啩。」

朱晨麗
朱晨麗讚阿蘇私底下成個小朋友咁,好玩得。
朱晨麗
自認還有進步空間,但攞獎始終都係開心事,朱晨麗早前趁做完《平安谷之詭谷傳說》宣傳活動,就拉隊請工作人員去老麥開餐慶功,劉老師都有份。

朱晨麗

講到《棟仁的時光》朱晨麗介入唐詩詠同袁偉豪之間,怕唔怕惹觀眾反感?佢直言:「好難演呀!無呢個經驗呀,哈哈哈哈!我同阿Ben(袁偉豪)第二次合作,唔知點解,啲編劇都要寫我係追佢,點解唔可以一個男仔正正經經嚟追我呢?其實我都唔係咁差㗎,哈哈哈!仲要係我追唔到佢,依家睇好似我係介入,但其實故事講我同阿Ben係青梅竹馬,只不過佢唔記得咗,呢個大家睇落去就會知。」

朱晨麗
《棟仁的時光》中唐詩詠遇見被玻璃割傷手掌的朱晨麗,幫她治理傷勢後成為好友,但朱晨麗卻介入她和袁偉豪之間。

朱晨麗

恨畀袁偉豪追

朱晨麗在《棟仁的時光》中演鋼管舞女,但佢本身原來唔識跳鋼管舞:「我真係唔識跳呀,阿Ben就真係勁嘞,為咗呢套劇我操咗好耐,先可以做到難度高少少嘅動作,但佢完全無試過,一去到,一上鋼管,成隻馬騮咁擒上擒落,可能佢平時操慣,有啲肌肉,有幫助,我覺得男仔跳鋼管舞都幾性感,可能下一套可以調轉個角色,佢跳鋼管舞兼追我,我唔忿氣,成日都追男仔。」朱晨麗又透露為跳鋼管舞嘅戲份真係有苦練:「初頭去學好大嘅挫敗感,我跳舞係專業㗎嘛,點解去到跳鋼管舞唔得嘅,最基本嘅動作都做唔到,老師都畀好多耐性我,話我知除咗操練,返到屋企仲要操腹肌、手臂,真係好辛苦,手瘀晒,腳因為夾住鋼管,內側起晒繭同水泡,你知嗰啲肉係最嫩,真係爭啲流血,老師都叫我要停,但套劇又就開拍,我唔希望下下用替身,你見到劇入面全部都係我嚟。」

朱晨麗
《棟仁的時光》中朱晨麗演鋼管舞蹈員,大跳鋼管舞,專業舞者身段成網民熱議焦點。

朱晨麗

拍《特技人》周身傷

講開唔用替身,朱晨麗拍《特技人》時都有好多危險動作,問佢點危險法?佢話:「好危險,真係火燒,當然著住防火燒嘅衫,同埋有好多飛車、撞車、爆炸,隔籬架車砰一聲咁爆,無人替我哋,我記得有一場戲同啲武師對打,全部都係男人嚟,佢哋啲手練開、好硬,打落嚟痛到呢,又要扮唔痛、好有型咁,但返到去瘀晒,有一下我踢個武師嘅胸骨,好硬,踢完,我自己受咗傷,腳趾腫咗兩個月,哈哈哈!」拍《特技人》嗰陣,連續拍三十幾個鐘,體力透支,朱晨麗直言:「暈咗,真係暈咗,送咗去醫院,手腳麻痺,自己見到都想笑,但係笑唔出,因為好驚,好驚因為呼吸唔到,手腳又麻痺,郁唔到,嗰時我要打電話搵媽咪,但我按唔到電話,個電話仲要入密碼,我又唔可以講密碼畀人知,個情境好好笑,好彩最尾都無事,大步檻過。」

朱晨麗
朱晨麗拍《特技人》大部分演出親身上陣,並有意繼續循動作打女方向發展,笑言:「如果刮花臉做有疤嘅角色就唔使化妝。」

朱晨麗