李施嬅

入行15年 獲讚最美皇后|李施嬅:無因為無獎唔開心

李施嬅03年選港姐,入行15年,演技備受肯定,在無綫卻總似跟獎項無緣,今次接受本刊訪問,她就大談對獎項的看法、事業的追求,以及現階段對感情的期許⋯⋯

撰文:東方新地|圖片:新傳媒圖片庫、李施嬅IG

李施嬅 唔旘做人

問李施嬅15年用番嫲嫲改嘅原名,各方面有無好咗?佢回應:「我覺得有唔同,我自己個性格唔同咗,我以前好內斂、好收埋自己,依家積極咗、愛自己工作多咗,唔知點解、好奇怪。」有無問過改名師傅個名利唔利自己?「無呀,嫲嫲對我已經係好大嘅祝福,佢畀咩我、喺我身邊嘅時候都係好,佢畀得呢個名我,我覺得for我嚟講係好,佢亦都會祝福我。」

李施嬅

而講到最初參選港姐嘅原因,李施嬅表示:「嗰時好想去布吉,嗰年個trip係去布吉,同埋係好細個開始,每年都有人叫我去做嘅事,最初都無諗嘅,因為我讀書係讀business,細個係想做生意或者幫屋企手,但講講吓,覺得今年再唔做就唔會去做,所以就做囉。」選港姐時係冷門定熱門?「我嗰時係熱門,大熱倒灶,哈哈哈哈⋯⋯」

李施嬅

網上指李施嬅爸爸動用工廠員工為佢投票,李施嬅澄清:「如果爸爸咁勁真係OK,真係得,我就唔選美,去選特首啦!因為嗰陣初賽我攞咗幾個獎,就變咗熱門,但最尾都係三甲不入,嗰時我連搭的士,個司機都話『睇好你呀!』令我個心好緊張,亦都好影響之後我見評判,我上到台語無倫次。」落選後點解繼續喺呢行發展?「開頭無諗過嘅,但我攞咗獎就一定要簽約,諗住完約再返去讀書,但啲機會不斷係咁嚟,劇接劇,啲角色又好好,就係咁囉,好似整定咁。」

李施嬅

曾做侍應

入行十五年,問李施嬅覺得自己發展成點?佢話:「我覺得都唔錯,初頭真係係咁拍,機會真係好多嘅,但我真係唔係好識做人,淨係focus去做戲,好想進步,但做咩行業都好,我覺得都係要識做人,我唔識得同人去打交道,一味淨係收埋自己,我覺得對事業進度都有影響。因為我由細到大比較內向,讀書嗰陣做暑期工,我選擇做侍應,因為我想訓練自己同人講嘢,但入咗行,大家都好外向,同埋佢哋講嗰啲笑話、潮語我唔明,我好似脫節咗咁,依家就進步咗好多嘞!」

李施嬅

期間經濟上有無捱過?有無諗過放棄?李施嬅答:「唔係經濟上嘅掙扎,好又一餐,唔好又一餐,香港好好,就算唔係搵好多錢,都可以食得好好嘅。但我覺得最掙扎反而係傳媒,有一段時間係咁畀人寫唔好嘅嘢,又話釣金龜,寫得好恐怖,我覺得好唔舒服,因為係咁畀人屈,屋企人睇到亦都好傷心,忽然間覺得好似入錯行,覺得好委屈,唔想再面對,但原來係無得唔面對,我有啲朋友離開咗娛樂圈十年、廿年,但一樣畀人寫,開始咗就無得停,只可以接受,正面啲去面對。心態好緊要,依家心態覺得花邊新聞,第二個禮拜啲人就會唔記得,依家我反而好鍾意我嘅工作,同埋好享受。早排有報道話我無獎、心灰意冷,我都會覺得好笑,幾有創意,唔緊要,當宣傳套劇啦,而唔會覺得委屈。」

李施嬅

未必離巢

《胡說八道真情假期》入面,李施嬅提到想喺TVB攞獎,最近亦有報道話佢想離巢,佢解釋:「我下年就滿約,加上出埋劇,啲人就攞番啲嘢出嚟講,我喺《胡說八道真情假期》係好有感觸,因為喺外國攞咗兩個獎,感受真係湧晒出嚟。無論做邊行,有啲時刻會好氣餒、好無信心,我都有呢啲時刻,諗自己係咪唔夠好,咁耐以嚟都無獎攞,但係攞獎嘅嘢,唔係淨係講演技,有好多嘢要夾,要收視好、角色突出、人氣,係好多嘢,我唔會因為喺TVB無獎而唔開心,我喺出面攞咗獎,真係瞓覺都笑醒啦,我得呢個獎都係TVB栽培我,我先得到呢個獎,所以我完全無唔開心、無心灰意冷,我係好感激TVB,依家傾緊合約,但仲係好初步嘅嘢,所以我都唔可以同大家講到個方向係點,因為仲係好初期。」

講到喺《天命》嘅演出備受讚賞,李施嬅就指:「《天命》係大家好有心機製作,拍咗五個月,呢個劇有段時間我拍到頭髮都甩埋,真係好用心,有血有汗咁去拍,都好多謝大家嘅讚賞,喜歡我古裝嘅扮相。都好耐無出劇,兩年無出劇,出番嚟大家有咁正面嘅讚賞,我覺得都好好,同埋第一次同譚俊彥合作,都有啲火花,男演員嚟講,佢應該最喊得、最多眼淚,我都算多眼淚,但佢仲多過我,佢係好用心、好用力嘅演員。」

皇上,生日快樂。你的禮物就是…我同諴妃決定和好喇。👭萬歲萬歲萬萬歲。也辛苦所台前膜後忠臣,想看#天命 的大結局就要去網上看喇。#李施嬅 #selenalee #皇貴妃娘娘 #感謝 #謝謝大家支持

Selena Lee 李施嬅(@selenaleelalee)分享的貼文 於 張貼

Selena Lee 李施嬅(@selenaleelalee)分享的貼文 張貼

自覺變靚

獲網民讚《天命》古裝扮相靚過同劇唐詩詠,李施嬅笑言:「我唔知點解要同唐詩詠比,我都有睇報道話我古裝靚、皇后靚⋯⋯我都好開心,由出道開始,大家都覺得我適合拍古裝,頭嗰五、六年,八成係古裝,覺得好搞笑,因為我喺外國長大,有時有啲人會覺得我個樣有啲mix,都唔知點解會係古裝樣,可能我道眉古裝啩,哈哈,開心嘅,唔打得都睇得嘛!」

對於有網民指佢個樣變化多端,李施嬅就話:「讚我嘅嘢我會睇多啲,彈我或者是是非非嘅嘢,我記憶體唔係好多,我會選擇睇有建設性嘅挑剔,令我可以進步,女藝人唔係話整容就係釣金龜,等嫁、等生仔,啲人覺得我以前唔靚或者點,我淨係想講如果真係咁差,應該都贏唔到『最上鏡小姐』,依家的而且確係識得打扮、化妝,我都覺得自己真係靚咗,哈哈,我覺得我啲姊妹全部靚咗,惟有多謝佢哋覺得我靚咗囉!」

赴美學戲

2015年《樓奴》之後,好似突然消失咗、唔見咗人?「其實我去咗外國,大概四、五年前,去到一個位,我覺得演技停咗,我好想進步,好想人鬧我、話畀我聽有咩唔夠好,但我喺公司拍,無人鬧我,可能佢哋客氣啦,所以我去咗美國學戲,亦搵過詹Sir(詹瑞文)上堂,同埋想知演技好唔好,仲有個方法,就係去外國casting,因為佢哋唔會理你係邊個,演技好至會用你,開頭都爭少少,之後中咗一個,又中第二個,而且每次同出面嘅導演合作,都會話畀我聽點會更加好,拍完我真係會對自己嘅演技要求高咗,同有唔同嘅睇法,上年我喺加拿大拍電視劇,講我要殺一個愛嘅人,拍咗十三個take,好多情緒,去到100%。平時喺香港最多兩、三個take,出面拍每次都學到嘢,到再返嚟香港拍,我覺得好有用。」

李施嬅
李施嬅對上一部作品係兩年前嘅純熟意外,當時有指佢戲份被大幅刪減,原因可能係大台一心力捧同劇嘅蔡思貝。

而講到感情狀況,李施嬅笑說:「好得意,我哋成班姊妹都工作為重、好工作狂,呢幾年我都變咗好熱愛我嘅事業,無咁focus喺感情上面,愈唔focus就無咁多,喺呢刻畀我最大滿足感係我事業,感情如果有就有、無就無,我亦都唔會刻意去識人,隨緣啦,識到咪識,唔會係我首要做嘅事。」37歲,屋企人急唔急?「唔急,我屋企人又無嘢,同埋無得急㗎嘛,如果想結婚,真係可以結嘅喎,以前拍拖都可以結婚啦,但無理由為咗結婚而結㗎嘛,真係要有一個想結婚先結㗎嘛!」

李施嬅
《寒山潛龍》劇照

想生BB

好多未係最愛,結咗婚就好愛?李施嬅反駁:「啲人唔係咁講,啲人話係愈嚟愈唔愛、愈嚟愈淡,我覺得唔一定結婚嘅,結婚都係簽張紙啫,我反而係想生小朋友,唔使結婚都得,呢個係一個愛嘅傑作,真係要搵個愛嘅人,一齊開心就得,結唔結婚真係冇乜所謂。」理想對象係點?經濟條件係咪考慮因素?「經濟係考慮因素,但就係唔想佢太有錢,哈哈哈,因為好麻煩,太有錢要顧及屋企、好多嘢,做呢行其實係唔適合嫁畀一啲屋企太有錢嘅人,因為太多是非,但我真係要搵一個叻嘅,因為我自己都好積極、好有事業心,所以如果個男仔係好懶或者唔知點咁,我係唔會尊重佢,唔係樣樣都要叻嘅, 佢一定要有樣嘢令到我好『嘩!』可能佢唱歌好叻、我已經好OK,同埋佢要照顧到自己,唔可以要我照顧佢,如果佢照顧到我,我梗係開心啦,但呢一刻,我好滿意自己嘅生活、好開心依家擁有嘅嘢。」

我這張人肉椅舒服嗎? 按摩力度夠嗎?❤️. Baby Brendan enjoying the fatty leg massage. #肥🐷仔 #米之蓮bb #babyLEE #heartbreaker #新一代男神 #myo快d生多個 #女版babyLee #pleaseandthankyou #基因強大
Selena Lee 李施嬅(@selenaleelalee)分享的貼文 於 張貼

胡說八道會係咪到依家都好開心?「好開心,好感恩有一班咁嘅姊妹,咩都講得,唔啱聽都照講,係好真誠,覺得佢今日唔靚,會照講,唔會遮掩,大家事業心都重,互相扶持,我哋日日都喺電話群組撩大家傾偈,開心、唔開心都會講,所以係好緊要。」唔會有內訌?「我哋有咩都會喺大家面前講,有時有不滿,會諗辦法同佢講,唔會收埋,同埋就算有時畀人話、頂撞會唔開心,但大家都知係為對方好,我哋無隔夜仇。」

李施嬅

講到曾開過化妝學校,李施嬅表示:「做咗兩年,但真係一心不能二用,一樣嘢做得好,對演藝事業始終有影響,一定要揀一樣嘢。」

Selena Lee 李施嬅(@selenaleelalee)分享的貼文 張貼

李施嬅直言不急於北上發展:「搵人仔個個都想,但政治或者人際上,太多嘢唔受控制,外國起碼有個公平機會去cast,所以要睇緣份。」

Selena Lee 李施嬅(@selenaleelalee)分享的貼文 張貼

現階段感情對她而言非首位,「唔結婚我都OK,因為我曾經好想結婚、生小朋友,依家無再好想,我自己都打個突,反而好想喺事業上突破自己。」

Selena Lee 李施嬅(@selenaleelalee)分享的貼文 張貼

現時工作以外,李施嬅最多是學戲進修:「唔係工作嘅時候,都好想搵嘢學,好想去進修。」

03年李施嬅選港姐大熱倒灶,成為首位得「最上鏡小姐」但三甲不入的港姐。

衝出國際

李施嬅在娘家無綫未獲獎項肯定,去年憑美國微電影《Once More》,奪得《European Cinematography Awards》及《Los Angeles Film Awards》最佳女主角,成雙料影后。

李施嬅
微電影《Once More》劇照

李施嬅

李施嬅古裝扮相被網民讚「最美皇后」。

李施嬅

說到有不少人欲為她介紹另一半,「我都無特別要去認識,我會話隨緣啦!」

胡說八道會衍生的《胡說八道真情假期》節目,當中包括好姊妹共浴。「呢幾年我改變咗好多,其中都係呢班女仔不停咁push,同我見到佢哋好叻,我又想好叻、想進步。」

李施嬅