楊明

【楊明犯法】試過十八個月無糧出 醉駕楊明:多謝睇唔起我嘅人!

楊明多次犯法,入行近20年,未坐過監,不過案底、社會服務令、罰款、停牌、守行為通通試齊,犯案經驗豐富,2020年8月再度於半山落斜涉醉駕炒車,更拒絕酒精測試!作為有案底藝人,竟再受無綫力捧屢次飾演警察,一直受觀眾質疑,早前在在訪問中,楊明就大談期間受到的冷言冷語及經濟壓力。

撰文:東方新地|圖片:新傳媒圖片庫、楊明IG

楊明犯法 重讀訓練班

楊明犯法頻率高過攞獎,係唯一一個讀兩次訓練班嘅藝人,佢直言:「我諗歷屆都係得我讀過兩期,第一次係第十三期同楊怡一齊讀,到廿一期,公司叫我入去再培訓,唔係因為好有潛質,所以畀多期我讀,嗰年我唔知因為醉酒駕駛定刑事毀壞出事,公司罰我入去讀,廿一期我更加多嘢吸收到,因為嗰時我做咗八年。」

上次醉駕無炒車,今次楊明揸Benz醉駕越線撞毁半邊車頭,案發於8月8日凌晨於半山馬己仙峽道,圖為早前在車廂自拍。(圖:楊明IG)
上次醉駕無炒車,今次楊明揸Benz醉駕越線撞毁半邊車頭,案發於8月8日凌晨於半山馬己仙峽道,圖為早前在車廂自拍。(圖:楊明IG)

醉駕楊明改名改幾次 跟過太婆姓林

而問到楊明個藝名點嚟?佢澄清:「我細個一向都係叫楊明,但就叫做林楊明。我阿爺係姓楊,係楊家將嘅後人,我老竇因為過繼畀太婆而改姓林,由細到大屋企人都叫我楊明,我老竇喺我訓練班就嚟畢業,幫我改身份證個名做林明樂,我覺得唔慣,到公司問我有無想改嘅藝名,我就改做楊明。又可以跟番祖宗個姓,所以可以話藝名,亦係自己由細到大嘅名。」

楊明犯法
用楊明呢個名行得順唔順?佢直言:「我由細叫楊明嗰陣,我覺得都差唔多,細個除咗讀書唔係好集中,其他嘢我覺得都好順,譬如我有好多朋友,到用咗楊明做藝名,有少少官非、唔如意嘅事,我諗都唔關個名事,一個人嘅人生都應該有唔同經歷,同埋其實係自己處理嘅問題。我到依家都用緊楊明做藝名,我覺得呢十年都幾順吖,開始順番自己個理想,我覺得係自己嘅思維改變咗,先至順番,可能十八歲初初出嚟,都係公司力捧,好多嘢理所當然,變咗好容易放棄一啲機會。依家大個仔咗,知道呢啲 機會唔係隨時都會有,所以會珍惜啲。」
楊明犯法

楊明回應犯法官非「好扮嘢、唔識尊重人」

講到過去嘅官非,問楊明嗰時係咪少不更事?畀佢返轉頭嘅話會點行?佢回應:「如果畀我返番轉頭,我梗係選擇定性啲,但我又唔後悔經歷咗咁多嘢,因為如果我嗰時唔係經歷咁多事,可能好唔識珍惜機會,或者可能變咗好扮嘢、唔識尊重人嘅人。我睇到呢行好多人,係爭一啲機會去表現自己,但我一個人,去浪費咗咁多機會,我好似浪費緊其他人好渴望嘅機會。好多同事喺我無乜嘢做嘅時候同我講:『你畀心機啦,畀著我哋犯你犯嘅任何一件錯事,公司可能都唔會繼續留我喺度!』呢句說話好入到我心,因為我犯咁多次事,公司真係有權唔同我續約,所以我唔應該再浪費機會。」

楊明犯法
繼05年被控醉駕後,07年楊明再醉酒在便利店鬧事,被控刑毁罪成。

楊明犯法 汪明荃畀機會

就係聽咗呢啲說話令佢領悟?楊明表示:「唔係一朝一夕領悟,唔係你哋見到我有成績嘅時候先領悟,做錯事可能好快畀人知道,但做好可能好多年都無人知,做番好要嘥好多時間,去令啲失望過嘅人或者放棄咗你嘅人知道你改變咗。我都嘥咗好多時間做番好,無論做咩角色我都接,我做咗好多年二世祖角色、強姦犯、壞人嘅角色,我都係想話畀之前幫過我、對我有信心嘅人聽,我會做番好,會畀心機做每個角色。好開心做咗幾年之後,畀阿姐 (汪明荃) 見到,阿姐問我:『你係咪想繼續做㗎?』我答:『梗係啦,唔係做咩仲喺度做呢啲角色。』阿姐就話:『如果你畀心機做,仲係想做落去,我會開始畀機會你!』無幾耐,我就入咗處境劇《天天天晴》,做咗百幾集,再做《誰家灶頭無煙火》,我諗佢想幫我入屋之餘,係幫我投入番做戲嘅心情,因為做處境劇日日都要返,朝九晚七,慢慢培養番我做嘢嘅心,雖然我做咗三、四年強姦犯、二世祖,但戲份唔多、個工作態度無咁強。」

楊明犯法
2010年拍《天天天晴》,同劇有陳智燊、李思捷同陳茵媺。

「有好多唔好聽嘅說話」

身邊同事同傳媒嘅嘴臉有無開始改變?楊明憶述:「其實喺低沉嘅時候,見到好多嘢嘅,低沉嘅時候,睇到好多人生百態,好多謝好多喺我低沉嘅時候,鼓勵過我嘅人,但亦好多謝有啲睇唔起我嘅人,有好多唔好聽嘅說話,或者唔好睇嘅面口我都睇過。其實有啲市民都會,有啲後生啲嘅觀眾,會有一啲難聽啲嘅說話,咪當聽唔到囉!我好多謝公司大部分嘅幕後,工作人員,同最鼓勵我嘅化妝、梳頭、服裝,佢哋由細睇到我大,每次見親我都不停鼓勵我,有啲甚至鬧我、問我做咩唔畀心機,好多謝佢哋陪伴我度過嗰啲低沉嘅時間。」

楊明犯法
2011年拍《誰家灶頭無煙火》,令楊明成功洗底入屋。

犯事導致停工 十八個月無糧出

經濟上,有無捱過麵包?楊明直言:「梗係有啦,啱啱入訓練班嘅時候,生活指數都係低少少,我諗一個文員有七、八千蚊人工,我哋訓練班入去就係三千五蚊,咁唔夠㗎嘛,點都係問媽咪攞㗎嘞,媽咪都撐咗好幾年㗎,到我訓練班出咗嚟幾年,我開始犯事,最艱辛就係我第二次入訓練班嗰半年,嗰半年因為入訓練班停工,要還之前簽落嘅騷公畀公司,嗰時公司仲要停我人工,停咗十八個月,之前儲落嘅錢都用得七七八八,好彩仲有啲模特兒工作,好少錢但都叫撐得住,嗰時係要問十三期訓練班嘅同學借錢,好艱辛先捱完嗰十八個月。嗰十八個月係最慘,要返工、即係要使錢,但又無糧出。」

楊明犯法

經常演奸角

講到終於守得雲開,攞「飛躍進步獎」,楊明笑言:「你見我上台笑自己咁老、叫自己『老飛』,其實心底我係好開心㗎,因為由公司有頒獎禮開始,我就好想攞呢個獎,因為我之前喺新加坡同馬來西亞都攞咗,係爭香港自己公司嘅獎未攞,好恨儲齊,呢個獎我恨咗好耐。」經常被派演奸角,有無唔開心?「無㗎,因為我知道自己做錯吖嘛,我嗰時乜嘢都無,我仲有咩資格去介意做咩角色呢!同埋做演員,唔應該介意做咩角色,同埋每個角色,只要做得好,都會畀人睇到。」

楊明犯法
除香港外,楊明近年在馬來西亞和新加坡亦先後攞到飛躍進步獎。

楊明自爆最初入行是為演消防員圓紀律部隊夢,「點知我做咗呢行二十年,都未做過消防員角色。」
去年楊明獲無綫安排主持真人騷節目《打工捱世界II》明捧。

楊明犯法

楊明犯法

2015年楊明擔演《收規華》兩大男主角之一,並跟楊怡有感情線,一步步重上一線。

楊明犯法

楊明笑言自己是偶像與實力派兩棲,最多是媽媽級粉絲。

楊明犯法

年初,四次提名「飛躍進步男藝員」的楊明終於獲得該獎,他不忘自嘲一把年紀才獲飛躍獎。

楊明犯法

延伸閱讀:

【延禧攻略】原班人馬開新劇!《皓鑭傳》邊個冇得留低?

【楊明犯法】試過十八個月無糧出 醉駕楊明:多謝睇唔起我嘅人!