歐鎧淳

歐鎧淳笑談入圍金像獎:我唔值得呢個提名

泳界女神歐鎧淳去年半隻腳踏入娛樂圈,更憑電影《春嬌救志明》中約五分鐘戲份競逐金像獎「最佳新演員」獎,但講到入圍嘅感受,佢竟然話係嚇親!

撰文:東方新地|圖片:新傳媒圖片庫、歐鎧淳IG

歐鎧淳:覺得好好彩

問歐鎧淳知道自己有份提名金像獎「最佳新人獎」時有咩反應?佢話:「我係覺得好驚訝,估唔到、唔知發生咩事。《春嬌救志明》對我嚟講係好耐之前嘅事,我以為上完畫就再冇後續,所以完全冇諗過會有任何嘢,估唔到會有提名,係嚇親,後來諗番都覺得真係唔值得呢個提名。因為由細細個睇,覺得金像獎係咁好、咁靚、咁盛大嘅一件事,從來都冇諗過自己會有機會參與,都好開心嘅,覺得好好彩!」

歐鎧淳
歐鎧淳話事前唔知道公司會申請角逐:「我乜嘢都唔知道,到公布我有份,我有啲朋友就打嚟恭喜我,其實都係笑我,哈哈⋯⋯佢哋都覺得好估唔到。」
歐鎧淳
回想《春嬌救志明》的演出,歐鎧淳笑言:「我覺得我講『我冇乜運動細胞』嗰句係幾好笑嘅,我覺得做到嗰個感覺就夠,之後都冇諗太多。同埋捉住隻手、有啲動作對我第一次拍戲嚟講,係比較容易入戲。」

網上有好多討論都質疑佢喺電影中出場時間唔長,歐鎧淳就話:「我完全明白呀!哈,我覺得好理性、大家講得好啱,連我都唔記得我得六句對白,係網上寫我先記得,識咗(男友)胡子彤之後,我亦都識咗好多新嘅演員,香港其實真係好多新晉、後生嘅演員,我更加覺得自己唔值得呢個提名,因為有好多好努力嘅新演員,而提名係每一個演員嘅夢想,被提名已經好犀利,所以我都開心嘅,可以有機會參加,但係就覺得自己唔值得。」

歐鎧淳
近年歐鎧淳踩過界出席不少商業活動及廣告演出。

歐鎧淳指金像獎舉行當日(4月15日)撞正佢要比賽:「4月14同15號喺體院都有亞運嘅選拔賽,我完咗比賽都要成六點,我唔知平時金像獎嘅rundown係點,但都希望安排到,但我唔知我趕得切邊一個環節。」佢又笑言上年喺電視睇男友胡子彤憑 《點五步》攞新人獎時好緊張:「因為一路入選金馬獎、亞洲電影大獎,都睇好佢攞金像獎,變咗令我更加緊張,但到我自己就唔會啦!」

歐鎧淳
歐鎧淳透露男友胡子彤有恭喜佢入圍金像獎:「佢好平淡,冇特別講咩,我哋平時好少講公事,都係講番自己嘢。」

游水行先

問歐鎧淳入圍金像獎會唔會令佢對拍戲更加有興趣?佢表示:「我覺得冇影響,因為純粹真係好彩,係天時地利人和,可能今年冇乜太多嘅戲畀到新演員演出,所以選到我出嚟,始終自己都知道自己要游水行先。」佢又憶述當初拍《春嬌救志明》嗰六句對白,都重複咗至少六次:「因為由頭到尾係要一take過,同埋最初我唔係好知彭導想我點做,係想我撩余文樂定純粹對滑板有興趣,彭導就話:『你當真係對個滑板有興趣,輕鬆自然就可以嘞!』」

歐鎧淳
歐鎧淳唔習慣被稱為女神,對大眾能講得出自己名字已感滿足。

歐鎧淳直言享受客串嘅過程:「我幾鍾意自己喺戲裡面嘅戲份,都幾得意。但喺拍嘅時候,其實自己幾擔心,因為我係第一次拍咁大場面,因為現場踩滑板、跑步嘅五、六十個人,全部都係請番嚟,就係為咗我嗰六句對白,我覺得拍戲係真係唔容易。我都係游番水,游水係我強項,我會覺得最舒服同有信心多啲。」

歐鎧淳
說到電影「新人獎」睇好邊個,歐鎧淳預測:「導演會啱啱頒咗畀《藍天白雲》梁雍婷(Rachel),我覺得佢呼聲都好高,另外凌文龍《黃金花》都係,應該都係佢兩個其中一個。」

問佢係咪多咗好多片商搵佢拍戲?歐鎧淳答:「其實我唔覺得有好多,可能公司都幫我擋咗好多,因為想我專心啲游水,因為亞運嚟緊,6月都要去台灣集訓,都會唔接活動,因為訓練要休息,唔休息會冇爆發力,所以要專心。亞運之後會有一段休息時間,都有啲話會等我,安排咗喺亞運之後。」

歐鎧淳
問到有冇信心攞獎?歐鎧淳笑答:「絕對冇啦!哈!」

延伸閱讀:

林子善補擺喜酒 眼濕濕講愛的宣言