梅小青

【深宮計】藝人愛將逐個數|金牌監製梅小青點名讚:黃心穎會係⋯⋯

製作過《今生無悔》、《原振俠》、《洛神》、《法證先鋒》系列、《宮心計》系列、《公主嫁到》等大熱劇集的無綫金牌監製梅小青,在與本刊的訪問中,大談她欣賞的藝人愛將,包括黎明、王菲、李嘉欣、佘詩曼同林峯等,仲點名力讚「心穎BB」黃心穎將會係⋯⋯

撰文:東方新地|圖片:新傳媒圖片庫、梅小青微博

梅小青:李嘉欣最靚

問小青姐同咁多藝人合作過,覺得邊個最靚?佢即答:「李嘉欣,真係好靚,我同佢拍《原振俠》,鏡頭由佢對腳影到個頭,到拍完,套劇over要剪片,我都唔願意剪佢。」

梅小青
小青姐語錄:「李嘉欣由頭靚到落腳!」

梅小青

小青姐續說:「男仔當然係黎明,我同佢合作《飛躍霓裳》、《回到唐山》、《今生無悔》、《原振俠》⋯⋯我覺得佢有今時今日絕對應得,因為任何劇要宣傳,佢無論喺任何地方,都自費飛返嚟出席,嚟足咁多次,紅咗都一樣係咁;直到依家,每次佢開演唱會,都會畀票我。」

梅小青
「黎明抵佢紅!」

梅小青

讚完黎明同李嘉欣,小青姐又提及:「《原振俠》入面仲有王菲,有次睇完場戲我話唔得,要重拍,仲要睇住佢做,叫佢要跟我方法講對白,因為我係咁創作個角色,後尾我先知,王菲嘅風格係表情唔多,有佢獨特嘅風格、韻味,啓發我放下,同演員互相去調節,因應佢嘅特點,一路去改劇本。」

梅小青
「王菲個性獨特!」

梅小青

阿佘靚又捱得

而講到邊個藝人宜古宜今,時裝古裝一樣得?小青姐就答:「絕對係阿佘(詩曼),宜古宜今,我同佢大家都鍾意靚,佢要求嘅靚仲係啱角色嘅靚,做平民唔會整到自己鬼火咁靚,佢好捱得,好攰都好,一嗌埋位,佢就好精神,同埋佢永遠將儀容保持得好好,佢有自己嘅諗法,但又好配合你嘅諗法,盡量做到你嘅要求,我好鍾意佢。」

梅小青
「佘詩曼宜古宜今!」

梅小青

而時裝古裝一樣得嘅男演員,小青姐就有兩個心水選擇:「馬仔(馬浚偉)都係,要求自己儀容好整齊。家豪哥同林峯合作好多,我第一次同林峯合作係拍《衛子夫》,嘩,啲眼神好正,我又係唔捨得剪佢啲片,都係好用心去做,佢尤其係眼中有淚水、控制幾時流落嚟,好正、對眼好識做戲,好欣賞佢。」

「林峯雙眼識做戲!」
深宮計
「馬仔要求自己儀容好整齊。」

睇好黃心穎係下個鍾嘉欣

問小青姐近年睇好邊個演員?佢話:「馬仔絕對已經係好好,馬國明我都好鍾意。近年嚟講,蕭正楠我都幾睇好,佢好努力、好用心去做好個劇,仲有(黃)心穎,我今次同佢合作《深宮計》,我覺得佢笑容好自然,有啲好討好嘅戲,一過火就會造作,我覺得佢會係下個鍾嘉欣,做一啲好sweet嘅角色,你唔會討厭佢,會覺得佢好可愛、好自然,愈睇我愈鍾意,一路加佢戲份,喺跟住嘅《法政先鋒4》亦都加強佢戲份。」

「心穎我愈睇愈鍾意,一路加佢戲份。」
梅小青
「蕭正楠夠努力!」

深宮計

小青姐又指今次《深宮計》係佢同周秀娜第一次合作:「未知角色佢已經應承、好信任我,有場日景,化妝時間係凌晨一點,佢問點解?我話啱㗎嘞,化妝化到五點,坐車去場地,去到啱啱好天光開機!佢聽完「哦」一聲就照做,佢好捱得,同埋好nice,我哋全組人都好鍾意佢。」

宮心計2深宮計

劉心悠一字馬出場

小青姐續指:「(劉)心悠都好好,我搵佢嗰時,佢話咁啱想拍劇,原來張智霖同佢講想練好廣東話就拍TVB劇啦!但佢話:『你聽吓我啲廣東話得唔得先啦!』我聽過,無問題呀,點知古裝對白文縐縐,有少少兩回事,我將佢角色改成喺北方長大,口音有唔同,開拍前同佢圍讀劇本,佢好努力,出到嚟相當好。」

深宮計

小青姐又大讚劉心悠同周秀娜動作戲勁:「佢(心悠)仲同我講佢啲動作好得、做到一字馬,我話得,你就做一字馬出場,娜姐動作得,我都畀佢舞劍,盡量發揮佢哋所長。」

梅小青
「娜姐心悠動作勁!」

後悔帶梅小惠入行

最後問到梅小惠係小青姐妹妹,小青姐有冇刻意幫吓佢?小青姐憶述:「我好錫佢,自細佢幫我湊BB、換床單打點屋企好多嘢,後尾佢同我講想入行,我見佢遇到壓力,都會怪自己,覺得如果唔係我,佢都未必入呢行,唔使喺娛樂圈識人、拍拖,人生可能係另外一樣嘢。」

梅小青

小青姐續說:「但佢(小惠)同我講喺呢行識到好多好朋友,祥仔(阮兆祥)、欣欣(江欣燕)⋯⋯仲可以用名氣做善事,佢做好多善事,好多都無公開,心慈則貌美,我覺得佢好靚。佢依家做公關,咪睇佢大癲大肺,但做嘢好認真、好好!同佢做嘢嘅人都好鍾意佢,佢做得好開心,我亦都引以為榮。」

梅小青