梅小青

【深宮計】感激恩師麥當雄、蕭若元|金牌監製梅小青:當年喺麗的做到散晒

無綫金牌監製梅小青製作過《今生無悔》、《原振俠》、《洛神》、《法證先鋒》系列、《宮心計》系列、《公主嫁到》等多部大熱劇作,捧紅了黎明等藝人,在與本刊的訪問中,她大談入行由低做起,一步步踏上監製路的經歷,又分享她創作的靈感來源,以及製作背後的秘辛⋯⋯

撰文:東方新地|圖片:新傳媒圖片庫、梅小青微博

梅小青 發揚香港製作

問到小青姐當年點入行?小青姐表示:「我喺台灣讀電視製作,返嚟入咗麗的電視,嗰時鍾景輝請我,我初時係做綜藝節目落字幕,我不甘於淨係做落字幕,自己兼埋做戲劇,兩邊做,但人工無多到,做做吓,有人覺得呢個𡃁妹都幾做得喎,麥當雄就歸咗我入佢嗰組,跟麥當雄,後來亦都係麥當雄升我做導演、監製,係我開門老師同恩師。蕭若元都係,蕭若元教我寫劇本,有幸嗰個年代跟到佢兩位。」

2014年梅小青與劉家豪兒子結婚,麥當雄(右)與麥當傑都有到賀。

麥當雄同蕭若元都出名性格剛烈,問佢一個女仔點頂?小青姐直言:「我幾勁㗎,啲助導個個做到劈炮辭職走晒,嗰時我七十磅、紮住條馬尾,一個人幫晒咁多個導演,到出片尾字幕,落字幕嗰啲問係咪落錯,點解套套導演名之後都係梅小青?我話真係得番我一個做!嗰時真係學到好多嘢。」

蕭若元。

小青姐表示:「我嘅性格係一定要搞得掂!我屋企好窮,我係大女,我爸爸都供我去讀書喎,我肩負好大責任,讀完書返嚟就要好努力做嘢。我好孱弱,喺麗的電視擒上擒落,直頭做到散咗,我爸爸都心痛,話:『你唔得就唔好做嘞!』我話唔得,我一定要做,一定要堅持落去。」

梅小青

小青姐續說:「嗰時麥當雄都話:『如果係我請,我唔會請你,七十磅、咁細粒,不過你係我唯一睇錯、走漏眼嘅!』佢咁講我心好甜。我矮嘛,嗰時我練到著住對高屐都走得好快,攔人、做起嘢上嚟都幾狠!嗰時佢淨係收男徒弟,有次佢話:『你飲咗呢杯酒,我收你做徒弟!』佢未講完,我已經成杯白蘭地飲咗落去,但之後佢話:『其實你唔飲,都係我徒弟嚟嘅!』麗的之後就入亞視,都有幾套作品,之後TVB挖角過咗去,一直做咗好多年,都離開過,出去Now TV拍咗《衛子夫》,今次再返TVB,拍咗《深宮計》。」

梅小青

爆《深宮計》中心思想

提到《深宮計》,小青姐憶述:「九年前拍咗《宮心計》,係我好有情意結嘅劇集,當年機緣下喺佛堂收到張傳單,上面寫住『說好話、做好事、存好心』,我就諗可以將『三好』呢個理念放喺劇集度,出嚟成績好好,想拍續集,但當時情況唔容許,再拍咗《公主嫁到》、《法證先鋒》,一路到今次公司搵我返嚟,我二話不說就拍《深宮計》,今次都有個中心思想,『行善天不欺,善行收善果,作惡天不赦』。」

小青姐話《深宮計》入面會「作惡天不赦」!

問小青姐係咪偏愛拍宮廷劇?佢話:「其實我係鍾意靚,我睇靚嘅畫面係好開心,同埋我畀我爸爸訓練到一睇個畫面,未睇到靚嘅嘢,就先睇到瑕疵。我爸爸好鍾意睇我拍嘅劇,尤其我監製、(胞妹梅)小惠做嘅,睇見字幕出我哋個名,就由心笑出嚟。佢睇完就同我講:『有啲嘢唔得,嗰個人頭髮跌咗落嚟、隻襪跌咗落嚟⋯⋯』我就愈嚟愈小心,將個質素提高咗,同埋原來製作認真仲有其他人識欣賞,會話我啲造型好靚。」

梅小青

同丈夫良性競爭

小青姐嘅丈夫劉家豪都係著名金牌監製,問佢哋兩公婆有冇互相交流或者競爭?小青姐直言:「心底唔多唔少都有,譬如佢《溏心風暴2》50點收視,我就會諗可唔可以超前,到我《宮心計》50點,我開心嘅,但仲會諗點解唔畀我51點呢?」

梅小青
丈夫劉家豪。

小青姐續言:「以前睇對方嘅作品會就住講,老夫老妻咗之後就好直接:『如果呢個畀我就唔會咁拍嘞⋯⋯』佢會話:『你又唔明當時情況⋯⋯』整整吓,有少少唔開心,索性唔再一齊睇嘞,呢啲經歷我擺咗喺《法政先鋒3》,有一場黎耀祥同張可頤講:『你批評吓我啲嘢!』到人哋批評又唔係好接受,呢啲生活點滴我都會放喺劇度。」

梅小青
小青姐曾借黎耀祥同張可頤在《法政先鋒3》的劇情描寫夫妻間的相處點滴。

創作有冇遇過樽頸位?小青姐答:「好多,因為做咗咁多年,同埋好多時想更加好,譬如我再睇番《原振俠》、《今生無悔》發現有嘢想改,但播咗出街嘅嘢係無得改,惟有喺拍嘅時候再瞓少啲、再改好啲。」

小青姐再睇番《原振俠》,曾發現有嘢想改。

國內拍劇資源多

國內同香港拍劇有冇咩分別?小青姐分析:「分別係資源會更加多,多咗好多錢,《深宮計》係我從事影視咁多年,budget最多嘅,錢多咗,製作上每樣嘢、演員都可以多好多,要求嘅畫面都可以好靚。」有傳內地對宮廷劇限制多咗,對小青姐嘅創作界限有冇影響?小青姐表示:「古裝劇比較好啲,有歷史根據,唔可以點改,我哋只不過再去豐富劇情。上次我拍《衛子夫》47集,送檢淨係cut咗30秒,今次《深宮計》30集一啲都無cut過。」

梅小青

平時見小青姐好nice、好sweet,問佢做嘢嘅時候惡唔惡?小青姐笑言:「我都控制唔到自己,杜生(無綫節目及製作副總經理杜之克)話我『你拍起嘢上嚟,兩個人嚟!』我入到現場,『你啲頭髮未得喎!』、『唔該執好呢度啦!』我講句唔該都唔同平時,所以一見我行入片場,佢哋就會自動自覺整好啲嘢。」

梅小青

討壓山頭文化

最後講到汪阿姐(明荃)喺台慶話希望少啲山頭文化,問小青姐點演繹佢呢句說話?小青姐慨嘆:「出嚟做嘢,尤其愈大機構,我覺得係在所難免,我好好彩,能夠自己做自己嘢,你叫我做行政我麻麻,你畀我閂埋門做劇,我就好開心,我好少理人哋嘅嘢。同埋絕對唔係我專長,我直頭係討厭呢樣嘢㖭。我覺得呢幾年我做得幾瀟灑同埋無懼,以前要養家,囝囝又未畢業、又要供樓,做好多嘢之前會問:『咁樣得唔得先?』依家邊樣得唔得已經心裡有數,同埋我囝囝大個咗、結埋婚,依家我哋會做自己鍾意做嘅嘢。」

梅小青
囝囝大個咗、結埋婚,小青姐話依家只會做自己鍾意做嘅嘢。

小青姐對製作、審美出名要求高:「想畀大家睇到香港做嘅古裝劇都大型嘅、都好睇,製作係良好。」

深宮計

小青姐嘅創作來自日常看書、電影、劇集,甚至日常生活:「我爸爸好錫屋企,所以我有《絕世好爸》、《當旺爸爸》⋯⋯行街見到個媽媽對個小朋友唔好,我會諗係咪親生?如果係拐帶,佢人生咪改變?我將呢個構思放咗喺《法證先鋒4》入面。」

梅小青
小青姐近日開拍《法證先鋒4》,早前就上載了自己參觀法證儀器的照片。

小青姐丈夫劉家豪同為金牌監製,作品包括《蓋世豪俠》、《他來自江湖》、《大家族》、《溏心風暴》系列等。兩人自麗的電視起,結識並共事,小青姐笑言:「後尾嫁埋畀佢。」

梅小青

關鍵詞
深宮計