鄧建明

讚囝囝遺傳自己好節奏感|鄧建明 音樂連繫父子情

太極樂隊吉他手鄧建明(Joey Tang)今年4月曾喺太極紅館演唱會上同兒子Justin合體現身表演,並兩父子合奏〈樂與悲〉,今次在與本刊嘅訪問中,Joey就坦言音樂可以連繫到佢哋嘅父子情⋯⋯

撰文:東方新地|圖片:新傳媒圖片庫、鄧建明FB太極FB

鄧建明 全隊齊戒煙

問鄧建明點解身形fit咗咁多?佢笑答:「多謝我嘅鼓手KB,介紹咗一個朋友畀我,有日見面,佢話:『你好似肥咗啲!』我話係呀,身體檢查發現有少少脂肪肝,佢話:『不如一齊操吓啦!』原來佢係trainer,打從兩年前嘅聖誕節開始,佢日日陪住我操,每日操兩個鐘,我覺得係上天送畀我嘅一份禮物,救咗我條命。」

鄧建明
Joey Tang近兩年修身成功、全身上下無贅肉,質疑佢為靚唔食飯,佢話:「唔會,啱啱先食咗成個鮮茄豬扒飯。」

鄧建明續說:「同埋大約三年前,成隊太極(樂隊)一齊戒咗煙,源於有日做騷我覺得唱得唔好,我打畀我結他師傅,佢話:『一早叫你唔好食煙啦!』我諗吓係喎,特登入愉景灣打golf,食晒嗰包煙,覺得個喉嚨咁唔舒服嘅,回程掉咗個打火機同剩低嘅煙,嗰日開始覺得煙好難食,隔咗兩個禮拜,Patrick(雷有輝)又唔食,唔知點解其他幾個有食嘅都喺嗰個月內戒咗。」

鄧建明

為囝囝學配音

講到鄧建明比較多瓣數,佢反駁:「係彈結他、演唱會同夾band,冇嘞喎!配音(《玩轉極樂園》)配過一次咋喎!配音都係我死chur,你知嗰間公司幾嚴厲㗎啦,我要配一個唔同我年齡嘅角色,fail咗,嗰間公司話:『不如搵專業配音員配,你淨係負責唱幾隻歌就算!』但我睇咗套戲,覺得好感人,我就諗呢個可能係留番畀我個仔嘅紀念,就求佢哋畀我再試一次,問朋友應該點配、有晒準備,終於pass到。」

鄧建明
4月,鄧建明兒子Justin現身太極紅館演唱會,表演打鼓,兩父子並合奏〈樂與悲〉。

問鄧建明係咪鍾意做幕後方面嘅工作?佢否認:「我其實無一個主旨係鍾意或者準備第時做咩嘅一個人,所以坐喺度等佢發生,但係喺呢十幾廿年,做Band Leader呢個崗位,學識咗樣嘢,就係平時等無問題,但個job嚟到,就要100%專注、唔可以懶。」

提到〈Crystal〉證明到佢係識得唱歌嘅人,鄧建明就笑言:「前幾日同幾個相熟記者朋友食飯,有人話:『我遮住隻眼,你真係可以做我條仔有餘,嘩,你把聲呢⋯⋯』我心諗,我(外形)已經好咗好多,我決定遲吓整少少。」

鄧建明

睇囝囝訪問感動爆喊

問鄧建明兒子Justin(17歲)有冇遺傳到佢嘅音樂天份?如果囝囝話要入行,佢又畀唔畀?鄧建明大讚:「佢同我一樣節奏嗰方面好,佢因為呢樣嘢造就到佢讀一間好嘅學校,因為學校有樂團,由小學到中學,都幫學校參加好多比賽、演出,我覺得保護到佢唔使畀人欺負,老師都會錫吓佢,幾開心、恭喜佢吖!哈哈!」

鄧建明又感慨表示:「佢(Justin)有日做一個關於管弦樂嘅訪問,佢平時唔講嘢乜滯,我睇番都喊咗出嚟,佢話:『因為我爹哋係Joey Tang,所以我唔可以做錯嘢,我要小心去做每一樣嘢。』我心諗,雖然你喺屋企成日做錯嘢,但原來我令到你受咁大壓力,我好感動。」

鄧建明

鄧建明囝囝 打非洲鼓入名校

太極樂隊結他手鄧建明(Joey Tang)用音樂教仔,製造父子共通語言,早年他曾接受Sunday Kiss訪問,表示他不會強逼囝囝學結他,讓他自由選擇。囝囝Justin在11歲時已學會非洲鼓,並參加學校管弦樂團、中樂團、合唱團,更在太極演唱會中粉墨登場。在Joey眼中,Justin是個不想長大、簡單、易照顧的孩子,但這簡單的孩子多才多藝,絕不平凡。

鄧建明
Justin愛打非洲鼓,但說不想學爸爸彈結他, 因爲怕按弦時會痛。

BB學聽Rock

鄧建明與搖滾畫上等號,連教子之道也不離音樂。他憶述:「我小時候愛聽黑膠唱片和英文歌,覺得好有型,聽聽下就開始彈結他了⋯⋯那時讀書成績不好,唯獨英文科較好,會考隻有3科合格,但英文考到C,我就知道聽英文歌有用。」Joey與圈外人太太婚後誕下囝囝,Joey想到用音樂培育他:「由Justin還未學行開始,我已駕車帶他上山頂、去主題樂園等地四處遊玩。我在車上不停播自己喜愛的音樂,約3歲時,我發現他能哼出歌曲的鼓beat(節拍),我見他拍子頗準,就進一步讓他看樂隊的video,結果他一聽歌就不停說『face drum、face drum』。起初我也不明白,後來想起『Queen (英國搖滾班霸樂隊)』的drum set畫上了人面的特寫,原來他愛看Queen,一聽歌就動起來。」

鄧建明

Joey笑說囝囝從不煩人,即使舉家到日本旅行也不會扭計,只要帶他去買一隻「Queen」的CD或DVD,他便乖乖乘BB車陪爸媽行街。故Justin雖年紀小小,已成了Queen唱片的收藏家,擁有不少外國版或限定版CD,訪問時Joey更帶囝囝的珍藏來「show off」。

鄧建明

在Justin 4歲時,他去看太極周年演出,其他成員的孩子都在後台玩,他卻走出觀衆席看騷,太太說他全晚都目不轉睛看Ricky (太極鼓手朱翰博)演出,即使要去洗手間也不願起身,結果還濑尿!Joey就是如此發現Justin對音樂的執着。

鄧建明
幾位太極第二代中,Justin與雷有輝(Patrick)兒子(圖左)最熟絡,因爲住得近,經常一起打波嬉戲。Joey與Patrick情如兄弟,Patrick兒子也曾說有興趣與Justin組太極二代。

結他爸爸 教出非洲鼓手

Joey從不逼囝囝跟他學結他,反而讓他自己選要學的樂器,他把私家車變成孩子的band房,在車上放置鼓棍,Justin跟着車上播放的歌曲在椅背打鼓,對拍子掌握準確,3、4歲已能打出整首歌,更熱忱得把車子椅背都打爛了!雖然Justin喜歡看Ricky打鼓,但卻沒有學習drum set。因太太巧合在YMCA看到由非籍樂手親授的非洲鼓班,Justin一學即愛上,已學到最高級,並加入了非洲鼓樂團,經常參加演出。

鄧建明
除非洲鼓外Justin也有學西樂,參加管弦樂團當敲擊樂手,讀譜比爸爸更叻。

Joey曾說仔要趁嫩生,好讓能父子檔夾Band。Justin在爸爸09年的首次個唱「Joey Tang Guitar Hero Show」中擔任過表演嘉賓,成爲演唱會的高潮之一,Joey說當時需要非洲鼓樂手,他想起囝囝也經常表演,又習慣與自己jam歌,就決定讓他粉墨登場。之後太極演唱會Justin多次參與演出,技術更純熟,大家再不用遷就他,還可以應付到獨奏部分。不過男孩子興趣多,記者問Justin有否想過將來夾band玩音樂,他反而表示喜歡車,想當汽車設計師。

鄧建明

助入直資名校

也許有人覺得rock友特别「好火」,但在管教上Joey自言絕不打仔,最多也是輕輕打手掌。Joey說他與太太的教仔法是「不停鬧加上不停錫」,Justin做錯事,即直接指出。他坦言自己工作忙碌,囝囝的功課、升學也交由太太跟進。Justin之前就讀St. Catherine國際英文幼稚園,及在九龍區的直資一條龍名校就讀,Joey不肯公開校名,但他表示很滿意孩子能入讀心儀的學校,他表示當時已獲自己的母校 —— 油麻地天主教小學取錄,但接獲該直資小學waiting list的取錄通知後,最後也忍痛放棄母校,讓兒子就讀一條龍學校。

鄧建明
Joey說Justin的學業問題都交給太太,自己則負責「玩」與「鬧」。

Joey說:「我覺得音樂是種語言,不關乎天分,他兒時聽過一些節奏,就能記在腦内,到正式學習時,就能演奏出。」他笑言Justin自幼獲正統的音樂訓練,樂理比自己更強,更爲升小學加分,他分享心得:「敲擊手雖然冷門,但學校有很大需要,會獲老師重視。學音樂前不妨先學敲擊,能在學校做個『有用的人』,但當然也不要強逼孩子,否則很難成功。」囝囝加入了學校的管弦樂團和中樂團當敲擊手,也有參加合唱團,代表學校參加學界比賽,更獲得冠軍。Joey也有到場支持,大讚老師有經驗,訓練有方,爲囝囝選對了學校。

鄧建明
Joey認爲孩子學音樂,後天配合比天分更重要。

關鍵詞
鄧建明