關楚耀

《喜愛夜蒲2》成轉捩點 關楚耀:導演鍾意我有故事!

藝人專訪

廣告

關楚耀 (Kelvin) 入行12年,星途經歷過大起大跌,他大談如何度過人生困境事業低潮、契爺譚詠麟對他的教誨,以及身邊幫助過自己的人。

撰文:東方新地|圖片:新傳媒圖片庫、關楚耀IG

關楚耀 有故事的人

問關楚耀細個想做咩?佢話:「我想做生意,因為我鍾意打機,想開賣遊戲嘅舖頭,所以我讀書都係朝呢個方向,讀數學、business。」咁點解入行?「都要講番我爸爸,我爸爸做音樂呢行,由細到大有意無意培養咗啲音樂天份畀我同妹妹。」佢又透露最近有新歌出:「〈求生〉,講我入行以嚟喺娛樂圈高低起跌,求生嘅本能,最緊要我覺得呢隻歌啱大家聽,依家香港社會好壓迫,好多壓力,要搵一個位抒解情緒。另外,上年喺TVB拍嘅《特技人》終於都播,期待咗好耐。」

我這個世界變了戰區 #求生 現場版 #focuslive2018 @mastamic
Kelvin Kwan 關楚耀(@uglykwan)分享的貼文 於 張貼

問到《特技人》係咪好多危險動作,有無損傷?關楚耀表示:「我反而就少,我嘅角色係導演,但我好鍾意呢個角色,同我本人好唔同。朱晨麗就最博,佢演特技人,好多危險嘅嘢都親身上陣,跳樓、跳山,我對呢位弱質纖纖嘅美少女加好多分,好少女仔會做咁多危險嘅動作。」

你就傻傻地。。。May🐷 #特技人
Kelvin Kwan 關楚耀(@uglykwan)分享的貼文 於 張貼

喺TVB拍劇有咩感覺?「好大分別係,工作同休息時間唔成正比,拍完我好佩服TVB啲演員,一埋位已經入咗狀態,腦袋、所有嘢轉得好快,特別係一班女演員,化妝時間要多啲,收凌晨5點,6、7點又要再化妝整頭,好敬業,我成日都同傅嘉莉講:『你真係犀利,收工一個鐘,又要再返工準備。』同感受到台前幕後大家嗰種團隊精神。」

Kelvin Kwan 關楚耀(@uglykwan)分享的貼文 張貼

對套劇期望大唔大?關楚耀笑言:「收視都唔到演員去理,最緊要拍攝過程好enjoy,亦都交到好朋友,當然想入到屋、受觀眾歡迎,但呢啲未必到我控制。」鍾意唱歌定拍戲多啲?「我乜嘢崗位都有做吓,唱歌、拍戲、節目主持都有做,最艱辛係做烹飪節目,要諗煮咩餸、請咩嘉賓,事前仲要同我阿媽、工人姐姐去買餸煮,迫屋企人試食,煮嘅時候,要記住每個step,又唔可以冷落嘉賓,對我嚟講係好好嘅訓練。」

講到關楚耀當年一出道即紅,初頭有無飄飄然?佢反駁:「我唔係一出道即紅,只不過初頭『校長契仔』呢個名,大家比較留意多啲啫!冇乜特別飄飄然,可能我性格又唔會特別去認叻,好多人都話我性格唔太啱做幕前,因為我比較害羞、唔係太多嘢講,表演慾唔係太強。」問到佢當年TVB音樂頒獎禮新人獎攞銀獎,金獎同銅獎係邊個?「泳兒同衛詩,當年係我、衛詩、泳兒、鄺祖德、王浩信,嗰年新人特別少,可能咁我先至有機會攞到獎。」

應份保護衛詩

提及關楚耀喺演唱會都有主動講番日本嗰件事 (藏毒被捕),問佢當時心情係點?「當然係迷失,唔知嚟緊會有咩發生,嗰時喺拘留所等法官判,唔知返香港仲有咩機會、使唔使轉工,真係有諗好多呢啲問題,但後尾自己都覺得,與其用咁大勇氣離開,倒不如留低,亦都好開心當時唱片公司繼續畀機會我。」當時將件事攬晒上身?「又唔係攬晒上身,不過當下我第一個反應,我同我當時女朋友 (衛詩) 講:『你咩都唔好理,唔需要講任何嘢,我嚟、我講!』作為男朋友嘅自然反應,點都係想保護咗個女仔先。」後尾點解分開?「當時日本返到嚟,我第一時間去佢屋企搵佢,嗰時仲有好多媒體等候我哋,我記得轉咗三架車先 去到佢屋企,大家見面嘅時候係冇乜點講嘢、對住喊,跟住佢慢慢返教會,再之後佢同我講想將 個心擺落耶穌基督度,佢可能想有新嘅生活,我當然係尊重佢,大家好了解之下分開咗。」

而講到同校長、契爺譚詠麟嘅緣份,關楚耀就憶述:「我爸爸做音樂監製,嗰時譚詠麟仲係新人,分配咗畀我爸爸,慢慢佢哋做咗好朋友,爸爸幫佢揀好多當年金曲,日常生活好多嘢都好投契、好相似,嗰時校長知道我媽咪有咗,就話:『我唔理係男定女,我都一定要契咗佢!』出道佢已經好支持我,同我合唱〈大喊包〉,大大小小嘅活動佢都會帶埋我,最記得12年前佢贈咗我一句,『做藝人最緊要當自己喺個金鐘罩裡面,只要focus做好自己本份,出面啲人嘅閒言閒語唔需要理,因為閒言閒語好快過去、好快人哋就唔記得,最緊要做好自己本份,其實人哋係會睇到。』依家我開始明呢個道理,可能前幾年低潮過,慢慢做好自己本份,原來人哋係會睇到。」

Kelvin Kwan 關楚耀(@uglykwan)分享的貼文 張貼

關楚耀續說:「當年發生事,校長都有嬲過,嗰時我喺日本,每一日,佢都好擔心,打畀我爸爸問我點,到我離開拘留所,同我爸爸媽媽一齊,我第一個打電話畀佢,話畀佢聽判咗無罪,無案底、出入日本係自由,令佢放心咗先,返到嚟當然有見佢,聽佢講咗好多人生、做人嘅道理,最得著係我當時處於低潮,所有嘢都係灰色,最記得佢話:『好彩呢件事喺你年青嘅時候發生,再遲就無得救,人生流流長,最重要點將發生過嗰點,轉化做正能量,令人生行得更加光明。』我慢慢明白、感受到嗰種道理。」

犯事得張敬軒支持

當年有無睇到好多現實嘅嘴臉?關楚耀指:「有好多圈內朋友都好關心支持,當然亦都有朋友離我而去,我唔會怪任何人,有一啲人反而更加支持、關心,例如張敬軒,喺傳媒方面幫我講好多嘢,甚至當年我喺日本,我媽咪喺香港有咩需要,佢都會去幫手。我嘅粉絲亦寫好多信集結起嚟,搵人交畀我,每一封我都睇到喊。」有無睇網上評論?「我無特別去睇,唔想影響自己情緒,但出街嘅時候,兜口兜面講我都聽過,話『衰咗嗰個、冇事咩?』佢哋話我都係正常、因為自己真係犯過錯事,做咗個壞榜樣。」

《喜愛夜蒲2》成轉捩點

跌低都要努力爬番起身,問關楚耀有無邊個機會覺得係一道光?佢話:「當然係唱片公司,畀機會我再做音樂,另外係呢件事之後,反而多咗導演搵我拍戲、拍電視劇,港台搵我拍《火速救兵》,嗰套劇大家會覺得我演戲都OK啦,慢慢錢國偉導演搵我拍《喜愛夜蒲2》,都算係我一個轉捩點,我都有問佢點解搵我拍,佢話:『因為你有故事,我覺得一個演員背後有經歷過,係唔同嘅!』我聽完更加有信心、更加放去演,過咗6年,好多人依然講緊我係做《喜愛夜蒲》嗰個,尤其內地有啲未必記得我個名嘅都咁講,一個藝人有部代表作,我都幾開心。」

女朋友唔使追

兩年無拍拖,係咪好dry?點解唔拍拖?關楚耀回答:「當然有認識一啲異性,但自己個心唔想拍拖住,反而幾嚮往單身嘅自由,去邊唔使同人交代,幾鍾意種感覺。我覺得未遇到啱啫,遇到嘅時候就全心全意。」有多次被分手紀錄?「⋯⋯都係嘅,男女嘅嘢,無所謂嘅,女仔講分手先啫!」

而講到關楚耀啲女朋友都好索、好靚,例如韓國索模女友Miu Kim,問佢追女仔係咪有一手?佢話:「我覺得女仔唔使追嘅,係大家感覺啱、情投意合,我覺得成日要食飯、送嘢、睇戲,係個女仔要睇吓個男方會有咩打動自己,可能禮物大唔大、去邊度食飯,我覺得呢類女仔比較計得多啲,反而我鍾意啲女仔係唔需要點樣追,大家當下有感覺,係就係,我都好期待遇到一見鍾情嘅女仔。」最後問佢有無結婚時間表?佢笑言:「以前會諗住25歲結婚,30歲生小朋友,依家又過咗五年,我要快啲生嘞!」

父親關維麟曾為寶麗金唱片高層及唱片監製,「當時同爸爸商量入行,佢話要做就梗係做咗先,讀完書就遲,睇法同其他父母好唔同。」

關楚耀曾被指是譚詠麟私生子,「我自己都覺得似,我問過媽媽,佢好肯定唔係,我都問過 (譚) 校長,佢都好肯定唔係,我姓關嘅!哈哈!」

跟前度衛詩再見仍是朋友,「佢第一次出番嚟出新歌,喺公開場合見到,有擁抱同互相問候。」

接連拍《喜愛夜蒲2》、《愛·尋·迷》、《12金鴨》,亦曾擔心過被定型,「嗰期好多人搵我拍,有套仲要露股,有次我同華哥任達華傾偈,問佢點好,佢話:『黐線,我哋做演員,梗係咩角色都要接,我當年拍《香港舞男》、三級片⋯⋯總之劇本好,有發揮就得!』我諗吓又係喎!」

最近在麥花臣開個人演唱會,「香港開演唱會有人投資好難得,有人買票睇我仲難得,事前準備、所有嘢去盡佢,過程好開心,台上聽到掌聲,事後喺網上睇番大家反應,畀咗好多信心我,好想下一站係紅館,一場都好!」

回想於日本藏毒被捕,「影響咗自己一生,真係會跟一世,因為我犯嘅錯傷害咗身邊人,尤其我媽咪,佢因為壓力患情緒病生蛇,當時唯一諗唔可以再令到屋企人失望。」

母親節快樂💓📸
Kelvin Kwan 關楚耀(@uglykwan)分享的貼文 於 張貼

笑言感情交白卷,「大家都鍾意聽我唱慘情歌,可能唱得多,感情都冇咩著落!」

說到身上紋身,關楚耀指:「我想生個仔,組織家庭,我想仔或者女個名叫Kloud、雲,就紋咗,諗住30歲生,但依家35歲都無,生條毛咩!」

Kelvin Kwan 關楚耀(@uglykwan)分享的貼文 張貼

近年加入操肌行列,健身打波跑步是基本,「最近我買咗一條類似浮潛用嘅呼吸管去游水,因為唔需要做抖氣動作,成件事好focus,對心肺功能同肌肉線條係幾好,我幾推薦!」

Kelvin Kwan 關楚耀(@uglykwan)分享的貼文 張貼

今晚劇情夠爆🤟 #特技人
Kelvin Kwan 關楚耀(@uglykwan)分享的貼文 於 張貼

Kelvin Kwan 關楚耀(@uglykwan)分享的貼文 張貼