陳家樂

陳家樂事業逆流再上:「搵番自己」

早前憑 《逆緣》擔正上位的陳家樂,入行已有12年,事業有如坐過山車,經過高低潮,由參加新秀、由TVB《四葉草》到去HKTV拍劇,佢更分享當年到同小紅姐喺電影《幸運是我》入面嘅首次合作嘅感受!

撰文:東方新地|圖片:新傳媒圖片庫

陳家樂:唔想參加新秀

訪問中首先講到陳家樂03年參加新秀,問佢係咪本身想向唱歌發展?佢竟然答:「一講起新秀我就尷尬,新秀就好似係我嘅黑歷史,其實我唔想參加新秀,係當時嘅女朋友幫我報咗名,其實我唔識唱歌,因為我好鍾意模仿人,佢以為我鍾意做明星,而唔知有歌手同演員之分,咁嗰時中學生報名費百幾蚊都好貴,咪去囉,我仲記得我拎咗隻有人聲嘅CD去,咁唔得㗎嘛,嗰時吳雨大哥就叫我清唱,但因為清唱,我唱低咗個key,變咗好聽咗,好好彩入咗一百強,仲識咗陳偉霆個歌唱老師,教咗我唱一首歌,好好彩入到十六強。」

陳家樂
問到陳家樂咁高大、靚仔,細個有冇星探搵過佢入行?佢話:「第一次係幼稚園,喺公園玩有啲哥哥姐姐畀卡片畀我媽咪,叫我去casting,之後有拍過一、兩次廣告,但每次都做唔成主角,因為次次都太細膽,本來預我做主角講最重要嗰句對白,但我太細聲,變咗做咗配角。」

陳家樂續說:「入到十六強之後喺一個商場比賽,真係原形畢露,又緊張、又驚,唱到甩晒嘴又勁細聲,我嗰時已經好鍾意(容)祖兒,佢嗰日做評判,唱完,祖兒同其他參賽者握手,同佢哋講:『你唱得好好呀!』但冇同我講,我就問祖兒我唱成點,祖兒就話:『你唱番大聲啲先啦!』結果輸咗,但隔咗三年,搞呢個比賽嘅同事對我有印象,嗰時公司開一套戲,想簽新人,搵咗我casting,就簽咗依家呢間公司嘞!」

陳家樂
陳家樂天生童顏,佢話初頭係有少少阻礙:「一路做唔到好男人嘅戲,係真係去到三十歲先有機會做到,二十至三十歲我每一年都要著校服演學生,到今年三十二歲先唔使再著,同埋可以試留鬚、做奸角、紀律部隊。」

低潮期靠家人接濟

講到入行十二年來嘅發展,陳家樂直言:「我覺得可以話係坐過山車,開頭幾順利、比好多人都順利,因為一入行,機會都好多,簽約幾日就拍咗梁洛施嘅一個音樂電影,冇幾耐就拍陳木勝導演嘅《保持通話》,個角色本來唔係好重,但同導演見完面之後,又加咗好多戲,跟住拍《四葉草》,跟住又拍公司開、幾多戲份嘅《很想和你在一起》,年幾時間就拍咗好多作品,而且當時人氣都唔錯,出到街幾多人認識,以為好順利,點知拍完《很》,突然好似消失咗喺呢行,一路唔明點解,後尾睇番我覺得係當時太順利、太有信心,以為自己做得好好,原來出嚟係做得唔好,突然間冇晒嘢做。好彩入行之前有打工,儲咗少少錢,到積蓄用到七七八八,好唔知點、好慌,屋企人又對我好好,知我冇晒錢,間唔中擺一百蚊、五百蚊喺我銀包畀我,默默咁支持我,其實我更加難受。因為我覺得自己都大個仔,係長子,要照顧屋企人。」

陳家樂
陳家樂感激家人一直以來的支持:「佢哋唔係好有錢,都畀錢我學唱歌、跳舞、做戲,全部都係錢,但佢哋都畀我。」

陳家樂憶述:「喺最徬徨之際,我已經諗要離開呢行,做番我之前做嘅保險同銀行Sales,好好彩當時遇到一個好錫我嘅導演麥㬢茵,佢搵我演《DIVA華麗之後》一個角色,佢同我講睇到我好有熱誠,畀好多信心我,佢令我識點同導演溝通、點去了解個故事,傾我個角色點去做,令我重新投入番,同埋我同自己講,呢套戲我一定要交最努力嘅嘢出嚟,因為呢套可能係我最後一套戲,得就得,唔得就離開呢行,拍完呢套戲之後,有人睇到我嘅付出,多咗好多機會。」

陳家樂
數年前曾轉戰HKTV拍劇,惜最終開不成台,陳家樂笑言:「整定嘅,我覺得嗰時我都未係好ready,拍劇對我嚟講都係希望喺拍攝入面慢慢進步、吸收多啲經驗,有冇畀觀眾睇到,對我嚟講唔係最重要。」

慢慢沉澱了解自己

當年拍《四葉草》嘅對手衛詩雅、洪卓立、羅仲謙、龔嘉欣等,都發展得好好,有啲仲結埋婚,陳家樂話都有感覺到唏噓:「當佢哋好多劇拍、好多歌好紅,我都仲係冇人認識,成日問自己點解咁失敗,行唔到去一個位,係咪我唔夠努力?係咪我唔識做人呢?慢慢檢討,發覺以前自己真係幾唔識做人,唔識講嘢,仲以為自己做戲做得好,之後我咪慢慢去學,冇嘢做嗰幾年我學做戲,學做戲最好嘅一樣嘢係了解自己,慢慢沉澱搵番最真嘅自己。」

陳家樂
說到同門師兄陳偉霆、關智斌在國內發展理想,陳家樂表示:「佢哋發展得好好,啱啱聽到陳偉霆推咗唔知幾多個億嘅戲,我都希望有咁嘅發展機會,冇嘢做嗰幾年我有學普通話,希望再努力學好啲。」

講番屋企人,陳家樂表示:「我爸爸啱啱退休,我都要承擔照顧屋企人嘅責任,我屋企都係普通打工仔嘅屋企,當我冇嘢做,我係好有壓力,所以到依家我都好驚放假,拍緊部戲,會好擔心下部幾時開,我成日都催谷啲同事,希望可以緊接啲,因為我真係好驚有空檔期會唔知等幾耐。因為以前等得太長時間,希望盡量都唔會再有呢種感覺。我會努力搵錢,希望可以照顧番佢哋。」

陳家樂
陳家樂去年憑《幸運是我》得到華語青年影像論壇的「年度新銳男演員」獎。

感激小紅姐點醒

最後講到在電影《幸運是我》中同小紅姐(惠英紅)嘅合作,陳家樂笑言:「《幸運是我》我諗係暫時最多人睇到我進步嘅一部戲,呢個功勞全部要歸於紅姐,因為紅姐好睇到我嘅問題,佢睇到我太認真、太緊張,我演戲盡量跟足程序規規矩矩,跟足晒對白,有個逗號,我都會跟足停一停唔講住,好穩陣,但紅姐話我冇生命喺入面,冇將理解呈現畀觀眾,紅姐拎走我份劇本,現場同我走位、對戲,直情對戲都畀晒真感情我、喊晒,令我明白對白係有生命,有好大得著!」

陳家樂
拍罷《幸》後,陳家樂連拍了兩部鬼片及溫拿自傳電影。

延伸閱讀: