馬浚偉

馬浚偉入行25年:直覺唔會攞視帝

剛有新劇《宮心計2深宮計》開播的馬浚偉,日前接受本刊訪問,今年入行25年的他,大談由入行被噓,到發展到擁有自己的公司,他都一一道來,更直言唔期望攞視帝:「有機會攞都唔係攞演員獎!」

撰文:東方新地|圖片:新傳媒圖片庫、馬浚偉FB

馬浚偉 入行被噓足兩年

馬浚偉憶述入行第一間唱片公司係華納唱片,第一隻唱片係《幸運就是遇到你》:「當時Paco(黃柏高)簽我,喺華納三年,出咗三隻唱片。之後冇再做唱片,唔關當年唱片市道唔好事,係我自己第三隻碟唔賣得啫。我似唔似黎明?以前似㗎,特別係以前入行嗰時個髮型!」

馬浚偉
出道時被指似黎明,馬浚偉笑言:「我知佢最近嘅大喜事,我好戥佢開心呀!」

講到當年首張大碟唱片公司用「他不是學友、他不是克勤、他不是黎明」做宣傳口號,馬浚偉笑言:「有行內人直頭話:『乜你唱片公司度句咁嘅嘢?害死你!』我真係畀人噓足兩年,但唱片OK、第一、第二隻都賣得嘅,但真係每次出場,好多其他嘅fans都會噓,佢哋未必會明白,句嘢都唔係我度嘅,但唱片公司咁度有冇原因呢?有!因為嗰時我9月出碟,負責同事話:『年尾嘞,你一定要有啲嘩眾取寵少少嘅嘢去吸引人注意。』我覺得『吓?』但我唔會怪佢哋,因為喺市場策劃上唔係完全冇道理,但的確令我條路難行咗,如果新人係要由零分開始,我嗰時係由負十分開始,去到《妙手仁心》出街,我係完全feel到啲觀眾另一種態度,個個好友善:『嗰個醫生仔,好得意、好好!』嗰時開始演藝事業有幾大轉變。」

馬浚偉
01年唱〈怪我未夠登對〉,馬浚偉曾搵趙學兒做MV女主角。

滿足於自由身

講到入行以來嘅發展,馬浚偉表示:「事業上,我係屬於爬樓梯式嘅藝人,一級一級慢慢行,唔會有突然澎一聲或者突然間好低、好高,今年九月我入行就25年,我幾享受過往嘅歷程,當然有難行,有開心嘅、有唔開心嘅時候,感覺自己能夠掌握嘅嘢係愈嚟愈多,以前喺唱片公司去到無綫,喺無綫長大,去到離開無綫,有自己嘅公司、自己嘅製作、自己嘅團隊,一個藝人能夠掌控番自己嘅嘢,我覺得好滿足。」

馬浚偉
問馬浚偉仲鍾唔鍾意唱歌?佢爽快話:「鍾意!嚟緊我做舞台劇,都會出隻Soundtrack。」

問馬浚偉有冇試過經濟拮据?佢答:「坦白講,冇喎!因為我係一個幾穩陣嘅人,識我嘅朋友都知,我有投資,但我唔會做啲好進取嘅投資,投資上,我係非常保守,我賺十蚊,大概使兩蚊,我有八蚊係做咗投資或者儲蓄,而且我早出嚟做嘢,我13歲已經出嚟打工,我唔會有好亂嚟、好揮霍嘅歲月,so far好感恩,你話好富有?唔係,但我唔會夠膽講我有拮据嘅日子,我照顧到家人、照顧到自己、照顧到公司、照顧到我班同事,我覺得差唔多啦,算係咁!」

馬浚偉
當日有女士拍攝訪問過程,馬仔禮貌告知不便拍攝,並主動跟她自拍,該女士表示可引薦他到國內發展,馬仔四両撥千斤巧妙帶過:「我喺國內發展好耐,華誼兄弟係我拍檔。」該女再提出想約會他,他大方回應:「多謝你先!」盡顯從容胸襟。

做電台得著多

講到查小欣曾大讚馬浚偉:「你睇馬浚偉幾紅,依家全世界都有聽佢個電台節目!依家做電台節目最紅係佢!」馬浚偉笑言:「多謝小欣姐,小欣姐一向都偏心我。點解會做電台?其實我好多年前,喺香港電台做過主持,港台第二台嘅杜雯惠一放假就搵我去頂,或者同佢一齊主持節目。我對廣播係有興趣嘅,亦都有班人話我把聲適合做電台,呢樣嘢烙印咗喺個心入面。去年商台《晴朗的一天出發》之後,有半個鐘頭嘅節目時間,係Stephen(陳志雲)做,我有聽,一路到曾鈺成先生嘅《鈺成千里目》,到田北俊先生嘅《田式生活》,到吳雨大哥嘅《娛樂大哥》,因為我好早起身,成日都聽到晒呢啲節目。有次同陳志雲傾開偈,我話:『有時間我做啦!』就係咁,《偶然・馬浚偉》呢個名唔係我諗,係商台陳聰、郭志仁知道我會再做《偶然・徐志摩》所以諗出嚟。」

馬浚偉
馬浚偉去年9月起主持電台節目,嘉賓來自不同界別,包括周慧敏、陳寶珠、鄧萃雯、劉慧卿、林鄭月娥、范徐麗泰等:「咁多冇可能接受訪問嘅人都接受咗我訪問,喺我演藝又好,馬浚偉人生歷程又好,我都有好大得著。」

馬浚偉指做電台節目有好多得著:「因為今次我全部嘉賓都係我自己約,有啲係我識嘅,有好多我唔識嘅,我真係厚住面皮,最後個個都接受我訪問,當中都有啲好有爭議性嘅嘉賓,譬如好多人唔明我點解會訪問陳淑莊、特首,咁多政界嘅人,我唔係特別鍾意訪問政界,而係我鍾意訪問唔同界別嘅人,而我喺節目入面唔係同佢討論佢嗰個界別嘅嘢,係我想透過我嘅節目去還原一個人。」

馬浚偉
依家國內同香港工作比例有幾多?馬浚偉答:「好難劃分比例,不停都有劇本搵我,但我真係想選擇啱嘅先做,我唔分地方,只分劇本同角色,啱嘅,天南地北我都去。唔啱嘅,我亦都唔想勉強自己。」

對獎項冇期望

問佢對獎項有冇期望?馬浚偉坦言:「到依家仲期望?有平台上有朋友、fans話:『你要加油,希望《深宮計》會攞視帝。』唔會㗎,我唔係話公司公唔公平,我覺得我將來有機會攞獎都唔係攞演員獎,最受歡迎男主角、男演員,我直覺總係覺得唔會,但我將來會唔會攞到編劇獎、導演獎、製作人獎或者舞台劇方面嘅獎、最受歡迎主題曲、插曲,唔知!但我唔會完全抹殺呢個機會,如果有日各地電視台願意頒畀我,我當然願意去攞,亦都當然會想,冇人唔想,但會唔會係我考慮嘅前提?對唔住,完全唔係。」

馬浚偉
馬浚偉笑言愛演古裝:「添哥(監製李添勝)話我清裝樣嘛、個樣得五條線,同歷史書裡面啲清裝人一樣。」

延伸閱讀:

【深宮計】做女主角冇相又冇名?周秀娜宣傳海報突然被消失…