黃嘉樂

無野心到唔忿氣 黃嘉樂:係程序上錯咗!

39歲嘅黃嘉樂入行十七年,多演閒角、「眾人細佬」,甚至曾經歷零工作事業低潮,到近日憑《果欄中的江湖大嫂》過氣江湖大佬一角演出受注目,再次受無綫重用,在訪問中佢大談自己當年入行嘅經過,以及事業上嘅高低潮⋯⋯

撰文:東方新地|圖片:新傳媒圖片庫、黃嘉樂IG

黃嘉樂初入行 謠言滿天飛

訪問中黃嘉樂首先講到自己嘅入行經過,原來佢以前係喺電通訊公司做,因一次入TVB做嘢而被發掘:「不過第一次問我,我嘅性格唔係太social,覺得未必handle到娛樂圈嘅人事關係,所以考慮再考慮,到第二次再問我,我充滿好奇心,又貪慕虛榮啦,哈哈哈,就盲舂舂入咗行。」之後喺01年加入藝員訓練班:「入行有少少插科打諢,諗住入嚟見識吓,見識夠就走,但係我忽略咗自己原來好勝心藏在骨子裡,跟住唔忿氣,同埋可能個程序錯咗,讀訓練班嗰時,諗住做四、五年路人甲、乙,慢慢到做有角色嘅戲份,但我唔係,訓練班一出嚟其實機會多嘅,《無考不成冤家》(02年)做Liza姐(汪明荃)個仔,戲份都多,一嚟就有咁重戲份嘅角色,但謠言滿天飛,話我有啲咩關係,我當然係無關係啦,之後我做番啲行行企企嘅角色、一句對白都無,程序上錯咗,其實呢行係唔容易㗎嘛!」

黃嘉樂
初出道冇耐,黃嘉樂即在《無考不成冤家》演汪阿姐個仔,因此被謠傳有特別關係而受提攜。

由有角色變跑龍套,黃嘉樂說自己心理上平衡到:「因為個程序應該係咁㗎嘛,我只係行番啱嘅軌道,我以前讀書係讀理科,我係好鍾意一個個step去做嘅人,跳咗step我反而唔識點去做,我底子係唔夠。但我其實係呢幾年先醒覺,呢幾年先接受自己底子係唔夠,呢幾年開始有人覺得我係進步咗,角色嘅多變性亦多咗,唔再千篇一律做人細佬。同埋跑龍套都係好短時間,年零後,《青出於藍》開始,多番啲有戲份嘅角色。」

黃嘉樂
04年約26歲在《青出於藍》演中四學生,開始多番啲戲份,當時老師有郭可盈、陶大宇,同學仔則有周永恒、趙頌茹和鄭俊弘等,劇中仲同阿Yu做一對。

黃嘉樂

有諗過轉行

問佢咁靚仔,點解無去做啲形象上或者時裝方面嘅嘢?黃嘉樂就話:「喺呢行嚟講,初段嘅時候,我諗我叫無野心,因為我係人馬座,開心就得㗎嘞,開頭我都仲覺得好開心,有好多嘢無去睇得好深入,同埋唔係我主動要入呢行,變咗個心態上唔一樣,人哋可能喺呢行要有咩目標,但我係OK吖、生活到喎,其實係嘥緊時間,我入行前都有人覺得我上鏡,搵我影硬照、拍TVC,入行後反而少咗,如果好似你講,我識得雙線發展,可能會行得順啲。」

黃嘉樂

問到佢入行都唔短時間,中途有無諗過放棄?黃嘉樂直言:「中間有段時間、30歲嗰時,有諗過不如轉行,做番自己老本行,穩陣吖嘛!因為當時身邊嘅舊同學有啲做到高級或者已經做緊老闆,佢哋都有叫我入番行,我都掙扎過,因為有段時間覺得自己點解仲係做緊『細佬』角色,但無去檢討自己點解仲係做『細佬』角色,而係埋怨,後尾當然無離開,因為老土啲,都係唔忿氣,死唔斷氣,死係想做到自己想做嘅嘢,同埋做咗咁耐,慣咗呢個生活模式,都會諗打正常工、會唔會唔慣呢?同埋嗰時我親細佬事業都開始穩定,佢又係做電腦相關嘅工作,屋企開始冇畀咩壓力。」

黃嘉樂

拍《守業者》解財困

黃嘉樂又透露自己一路喺TVB,直至到07年、30歲時:「嗰年原先好順,又keep住有嘢拍、又第一次拍電影,拍葉念琛導演嘅《我的最愛》,跟住之後嗰年,唔知點解成年都唔夠嘢做,但電視仲播緊我有份參與嘅作品,嗰年突然覺得,咁樣唔係辦法喎,咁樣落去就完結㗎喎!大約年零後,有人問我有無興趣簽其他經理人公司,話會有大陸劇拍,因為開始覺得生活唔夠保障,同埋爸爸開始身體唔好,都想搵多啲錢傍身,就出去試吓啦!出咗去有少少事與願違,好辛苦至拍到啲大陸劇,諗住終於都雨過天青,點知當時經理人公司過分去追求酬勞,但其實我未係企穩咗㗎嘛,好不容易開咗個頭,開始有少少泉水湧出嚟,就要抽走晒佢,咁死啦,最徬徨嗰時,材叔(無綫監製梁材遠)問我有無興趣拍《守業者》,啱啱好銜接到,解決到我經濟上嘅困難。」

黃嘉樂
黃嘉樂指自己陷入經濟困境時,獲監製梁材遠(前排左二)賞識,搵佢拍《守業者》,啱啱好幫佢走出困境。

講到08年所拍嘅電影《我的最愛》有過千萬票房,黃嘉樂表示:「以本土愛情片嚟講,係好犀利!其實嗰時係可以食住個勢繼續拍電影,但我嗰時無經理人,我唔係咁識social,我有得拍《我的最愛》都係因為導演見我之前拍側田MV表現好,畀機會我。」而講到去國內拍劇,黃嘉樂就笑言:「我個人比較衰,嗰時知道戲份多,真係出盡九牛二虎之力,後尾返TVB拍《巨輪》,我覺得係有啲唔同咗嘅,但就未去到成個人成熟晒。」

黃嘉樂
08年黃嘉樂在電影《我的最愛》演劈腿賤男。

主動要求留鬚

而對於《果欄中的江湖大嫂》入面嘅過氣江湖大佬角色,黃嘉樂直言的確幫到佢好多:「心理上都畀番好多信心,我淨係諗盡力做好佢,都無諗過效果會點。我都係咁做,唯一自主個造型,同埋演繹方法,因為開頭有人同我講我唔夠粗魯、唔夠似江湖大佬,但我睇晒劇本,劇入面我要同江嘉敏拍拖,如果真係好粗魯,好似泊埋唔太match,同埋我角色已經咁好打,都唔需要特登做一啲好粗魯嘅形態吖,同埋我同監製講我一定要留鬚,因為李天翔做我手下,但泊埋去,其實我似佢條𡃁多啲,出到嚟大家都覺得個造型有驚喜。」

黃嘉樂

黃嘉樂擁有青靚白淨嘅逆齡外貌,豈料成事業羈絆,更因多次被派演細佬角色,而被封「御用細佬」。

黃嘉樂

黃嘉樂話無預計會憑《果欄》爆出:「戲份唔算多,得六、七集戲,但睇住自己Instagram人數係咁加、新聞又每日有講,呢套劇亦為我帶嚟最多訪問。」

黃嘉樂

Ka Lok Wong(@wongkalok1214)分享的貼文 張貼

Ka Lok Wong(@wongkalok1214)分享的貼文 張貼

曾於電影《我的最愛》中演賤男,令黃嘉樂在影圈曇花一現:「角色係賤男,但唔知點解好多女仔鍾意,呢幾年間中有新人同事話:『我細細個就睇你做戲,我好鍾意你喺《我的最愛》阿俊個角色。』」

黃嘉樂

12年黃嘉樂擔任國內劇《媽祖》第一男主角, 跟主演「媽祖」的國內著名演員劉濤有不少對手戲。

黃嘉樂

最後講到對未來嘅展望,黃嘉樂直言:「返得TVB,梗係想做到主角位,所以繼續努力!」

黃嘉樂

黃嘉樂留鬚演出大突破 「暖男型」江湖大佬獲激讚

一直被封「御用細佬」的黃嘉樂今次在《果欄中的江湖大嫂》中留鬚演江湖大佬,造型大突破之餘,演出霸氣與柔情兼備,獲不少觀眾激讚!

黃嘉樂於《江湖大嫂》慘死

《果欄中的江湖大嫂》中,作為前江湖大佬的黃嘉樂,幾經辛苦先可以同乖乖女江嘉敏成為戀人,不過之後佢卻為救女友而被死對頭李天翔殺死!

黃嘉樂最終死在愛人懷裏。
江嘉敏全程投入,七情上面,睇到都覺得真係好心痛!

江嘉敏 馮盈盈鬥喊功

之後劇情講到馮盈盈去認番哥哥條屍,雖然盈盈演出經驗未算多,不過今次喊戲表現亦算不俗,睇到人好心痛!

「暖男型」江湖大佬

黃嘉樂今次喺《果欄中的江湖大嫂》純屬客串,只係短短出場六集,不過就令唔少觀眾對「勇哥」呢個角色留下深刻印象!首先嘉樂一改形象,留咗濃密鬍鬚扮演江湖大佬,不過呢位大佬既有霸氣亦有柔情一面,對女友江嘉敏同妹妹馮盈盈溫柔萬千,可謂一個「暖男型」的江湖大佬!

留鬚man爆

現年39歲的黃嘉樂入行多年,雖然一直未有咩代表作,但其實佢條件都相當唔錯,身高182cm,外表俊俏有型。之前黃嘉樂造型多是斯文靚仔,不過留鬚後佬味十足,眼神帶點憂鬱,加上角色勁有暖男feel,女觀眾們睇到心心眼!有唔少人仲覺得佢同關楚耀好似樣?

以往黃嘉樂俾人感覺都係青靚白淨、官仔骨骨,唔知大家鍾意佢邊一款style多啲呢?

無綫「 御用細佬 」

黃嘉樂雖然差唔多40歲,不過長得青靚白淨又帶點稚氣,扮演年紀輕的角色都完全無問題,話說佢入行15年至今,竟然飾演過14次弟弟角色!被譽為無綫的「 御用細佬 」!

《鐵馬尋橋》演鄭嘉穎及馬國明的細佬。
《點金勝手》演陳敏之細佬。
黃嘉樂喺《致命復活》中飾演王浩信細佬,奸到出汁。
雖然黃嘉樂演王浩信細佬,但現實中佢比對方年長5年!

黃嘉樂曾經講過,對於經常演年紀小的角色有點抗拒,甚至因為自己被定型而氣餒,不過幸好佢後來改變了心態,近年演出的角色都愈來愈多元化!希望嚟緊有更多機會畀黃嘉樂發揮啦!

《同盟》中飾演一個正直警察。
《心理追兇Mind Hunter》飾演王君馨老公。
《張保仔》中的獨眼龍韓勇。
《守業者》》中飾演「表少」,同馬浚偉有唔少對手戲。